ភ្ជាប់​ទៅ​គេហទំព័រ​ទាក់ទង

ឆ្នាំ​ជាតិ​អ៊ុយក្រែន​ពីរ​នាក់​ទៀត​ស្លាប់​នៅ​មន្ទីរពេទ្យ​ដោយសារ​របួស​ក្នុង​បាតុកម្ម​ហិង្សា


ប្រធានាធិបតីអ៊ុយក្រែន Petro Poroshenko ដាក់​កម្រង​ផ្កា​នៅ​ជិត​រូបថត​មន្ត្រី​ប៉ូលិស​ដែល​ត្រូវ​បាន​សម្លាប់​ក្នុង​បាតុកម្ម​ហិង្សា​កាលពីថ្ងៃទី១ ខែកញ្ញា ឆ្នាំ២០១៥។

ឆ្មាំជាតិ​អ៊ុយក្រែន​ពីរ​នាក់​ទៀត​បាន​បាត់បង់​ជីវិត​ដោយសារ​មុខ​របួស​បណ្តាល​មក​ពី​ការ​ផ្ទុះ​គ្រាប់បែក​ដៃ​មួយ​គ្រាប់​នៅ​ក្នុង​ការ​ធ្វើបាតុកម្ម​មាន​អំពើ​ហិង្សា​មួយ​កាល​ពី​ថ្ងៃចន្ទ​នៅ​ក្នុង​រដ្ឋធានី​គាវ​ (Kyiv) ហើយ​ការស្លាប់​នេះ​បាន​នាំឱ្យ​ចំនួន​មនុស្ស​ស្លាប់​កើន​ឡើង​ដល់​បី​នាក់​ហើយ។​

ពួក​មន្ត្រី​បាន​ប្រកាស​អំពី​ការ​ស្លាប់​នៃ​ទាហាន​ពីរ​នាក់​នេះ​កាល​ពី​ថ្ងៃ​អង្គារ មួយ​ថ្ងៃ​ក្រោយ​ពី​ពួក​អ្នក​ជាតិនិយម​បាន​ប៉ះទង្គិច​ជាមួយ​កងកម្លាំង​សន្តិសុខ​នៅ​ខាង​ក្រៅ​អាគារ​សភា​របស់​ប្រទេស​អ៊ុយក្រែន។

ពួកអ្នក​ជាតិ​និយម​បាន​ធ្វើ​បាតុកម្ម​ប្រឆាំង​នឹង​ការ​ធ្វើ​វិសោធនកម្ម​រដ្ឋធម្មនុញ្ញ​ដែល​ស្នើ​ដោយ​រដ្ឋាភិបាល​ដែល​នឹង​ផ្តល់​ស្វ័យភាព​ច្រើន​ជាង​មុន​ដល់​ផ្នែក​នានា​ក្នុង​ប៉ែក​ខាងកើត​នៃ​ប្រទេស​អ៊ុយក្រែន​ដែល​ត្រួតត្រា​ដោយ​ពួក​ទាមទារ​បំបែក​រដ្ឋ​គាំទ្រ​ដោយ​ប្រទេសរុស្ស៊ី។ សេចក្តី​ព្រាង​ច្បាប់នេះ​បានទទួល​ការ​អនុម័តិ​ដំបូង​ដោយ​សភា​កាលពី​ថ្ងៃ​អង្គារ។

នៅ​ក្នុង​បាតុកម្ម​នោះ​ មាន​បាតុករ​ម្នាក់​បាន​គ្រវែង​គ្រាប់បែក​ដៃ​មួយ​គ្រាប់​បណ្តាល​ឱ្យ​របួស​បុគ្គលិក​ខាង​ការ​ពង្រឹង​ច្បាប់​រាប់សិបនាក់​ដោយ​មាន​រួម​បញ្ចូល​ទាំង​ឆ្មាំ​ជាតិ​ម្នាក់ផង​ ដែល​បាន​បាត់បង់ជីវិត​នៅ​ក្នុងមន្ទីរពេទ្យ​កាលពី​ថ្ងៃចន្ទ។​

គេហទំព័រ​របស់​លោក​ប្រធានាធិបតី​អ៊ុយក្រែន​ Petro Poroshenko បាន​និយាយ​កាល​ពី​ថ្ងៃ​អង្គារ​ថា ​មុខ​របួស​របស់​កង​កម្លាំង​សន្តិសុខ​ក៏​បញ្ជាក់​ដែរ​អំពី​«ការ

ប្រើប្រាស់​វត្ថុ​ធុន​ធ្ងន់​និង​មុតជា​ច្រើន»​ដោយ​ពួក​បាតុករ។​ មាន​មនុស្ស​ប្រមាណ​១៤០នាក់​បាន​សម្រាក​ក្នុង​មន្ទីរពេទ្យ​ដើម្បី​ទទួល​ការ​ព្យាបាល​មុខ​របួស​ដែល​ជា​លទ្ធផល​នៃ​អំពើហិង្សា​កាល​ពី​ថ្ងៃចន្ទ​ដោយ​ភាគ​ច្រើន​ជា​ពួក​មន្ត្រី​ពង្រឹង​ច្បាប់៕

XS
SM
MD
LG