មុនពេលសមាជិកសភាសហរដ្ឋអាមេរិកចូលរួមស្ដាប់ការថ្លែងសុន្ទរកថាប្រចាំឆ្នាំរបស់លោកប្រធានាធិបតី Donald Trump អំពីស្ថានការណ៍ប្រទេសជាតិនៅថ្ងៃអង្គារនេះ សមាជិកព្រឹទ្ធសភានឹងមានឱកាសថ្លែងនៅក្នុងអង្គជំនុំជម្រះទោសលោក Trump ដើម្បីបង្ហាញអំពីគោលជំហររបស់ខ្លួនលើការកាត់ទោសដើម្បីដកលោក Trump ពីតំណែងនេះ។
ការថ្លែងរបស់សមាជិកព្រឹទ្ធសភា ដែលដើរតួជាគណៈកម្មាធិការវិនិច្ឆ័យនៅក្នុងការជំនុំជម្រះនេះ គឺមិនមែនជាផ្នែកផ្លូវការនៃការជំនុំជម្រះនេះទេ និងទំនងជាមិនមានភាពខុសគ្នាខ្លាំងជាមួយនឹងការសម្រេចដែលគេរំពឹងទុកជាមុនរបស់ព្រឹទ្ធសភាដែលថា លោក Trump គ្មានទោស នៅពេលដែលព្រឹទ្ធសភាធ្វើការបោះឆ្នោតសម្រេចចុងក្រោយនៅថ្ងៃពុធស្អែក។
ក្រុមសមាជិកគណបក្សប្រជាធិបតេយ្យនៃរដ្ឋសភាដែលដើរតួជារដ្ឋអាជ្ញាចោទប្រកាន់លោក Trump និងក្រុមមេធាវីការពារលោក Trump បានបង្ហាញអំណះអំណាងបញ្ចប់របស់ខ្លួនកាលពីថ្ងៃចន្ទម្សិលមិញ បន្ទាប់ពីការជំនុំជម្រះទោសលោក Trump នេះដំណើរការបាន ២ សប្ដាហ៍។
លោក Adam Schiff ដែលជាប្រធានក្រុមរដ្ឋអាជ្ញាចោទប្រកាន់លោក Trump ដើម្បីទម្លាក់ពីតំណែងនេះ បានស្នើសមាជិកព្រឹទ្ធសភាទាំង ១ រយរូបដែលដើរតួជាគណៈកម្មាធិការវិនិច្ឆ័យថា៖ «ពួកយើងបានបង្ហាញភស្តុតាងឲ្យឃើញថាលោក Trump ពិតជាមានកំហុស។ ឥឡូវនេះ សូមកាត់ទោសលោកដោយយុត្តិធម៌មិនលម្អៀងទៅ»។
លោក Pat Cipollone ដែលជាមេធាវីមួយរូបការពារលោក Trump បានបញ្ជាក់នៅក្នុងអង្គជំនុំជម្រះរបស់ព្រឹទ្ធសភាថា គ្មានភស្តុតាងណាមួយដែលបង្ហាញថា លោក Trump បានធ្វើខុសនោះទេ ហើយជាជាងការដកលោកពីតំណែង ដំណោះស្រាយតែមួយគត់ដែលត្រូវធ្វើគឺ «ទុកឲ្យអ្នកបោះឆ្នោត» ជាអ្នកសម្រេចអំពីជោគវាសនារបស់លោកចុះ៕
