ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ប្រធានាធិបតី​តួកគី​ប្រឆាំង​នឹង​ការ​ដាក់​ទណ្ឌកម្ម​របស់​សហរដ្ឋ​អាមេរិក​លើ​សេដ្ឋកិច្ច​តួកគី


ប្រធានាធិបតី​តួកគី​ Tayyip Erdogan ថ្លែង​នៅ​ក្នុង​សភា​អំពី​គណបក្សកាន់អំណាច AK Party អំឡុងកិច្ច​ប្រជុំ​មួយ​នៅ ក្នុង​ទីក្រុង​ Ankara ប្រទេស​តួកគី​កាលពី​ថ្ងៃទី​២៤ កក្កដា ឆ្នាំ ២០១៨។

កាល​ពី​ថ្ងៃ​សៅរ៍​ម្សិលមិញ ប្រធានាធិបតី​តួកគី​លោក Recep Tayyip Erdogan បាន​រិះគន់​ថា បញ្ហា​សេដ្ឋកិច្ច​ដែល​កើត​ឡើង​នៅ​ក្នុង​ប្រទេស​តួកគី​គឺ​បណ្ដាល​មក​ពី​សហរដ្ឋ​អាមេរិក និង​ប្រទេស​ដទៃ​ទៀត ដែល​ប្រទេស​ទាំង​នោះ​កំពុង​បង្ក​សង្គ្រាម​សេដ្ឋកិច្ច​ប្រឆាំង​នឹង​ប្រទេស​របស់​លោក។

លោក Erdogan រិះគន់​ដូច្នេះ​គឺ​ជា​ការ​ឆ្លើយតប​ចំពោះ​ការ​ធ្លាក់​ចុះ​នូវ​តម្លៃ​រូបិយវត្ថុ​លីរ៉ា​របស់​ប្រទេស​តួកគី បើ​ធៀប​ជាមួយ​នឹង​ប្រាក់​ដុល្លារ​អាមេរិក បន្ទាប់ពី​សហរដ្ឋ​អាមេរិក​បាន​ដាក់​ទណ្ឌកម្ម និង​យក​ពន្ធ​គយ​នៅ​ក្នុង​រយៈពេល​ពីរ​សប្ដាហ៍​កន្លង​មក​នេះ។

នៅ​ក្នុង​អត្ថបទ​បញ្ចេញ​មតិ​មួយ​នៅ​ក្នុង​កាសែត the New York Times កាល​ពី​ថ្ងៃ​សុក្រ លោក Erdogan បាន​សរសេរ​ថា៖ «ប្រសិនបើ​ទំនោរ​នៃ​ទស្សនៈ​ឯកតោ​ភាគី និង​ការ​មិន​គោរព​បែប​នេះ​មិន​ត្រឡប់​ទៅ​រក​សភាព​ដើម​វិញ​នោះ​ទេ នោះ​ប្រទេស​តួកគី​នឹង​ចាប់ផ្ដើម​ស្វែង​រក​សម្ព័ន្ធ​មិត្ត​ថ្មី»។

ប្រទេស​តួកគី និង​សហរដ្ឋ​អាមេរិក​ឈ្លោះ​ប្រកែក​កាល​ពី​សប្ដាហ៍​មុន​ទាក់ទិន​នឹង​ការណ៍​ដែល​តួកគី​មិន​ព្រម​ដោះលែង​បព្វជិត​គ្រិស្តសាសនា​អាមេរិកាំង​ម្នាក់​ឈ្មោះ Andrew Brunson ចេញ​ពី​ការ​ឃុំ​ឃាំង​ក្នុង​ផ្ទះ នៅ​ពេល​ដែល​លោក​កំពុង​រង់ចាំ​សវនាការ​កាត់​ទោស​រូប​លោក​ពី​បទ​ភេរវកម្ម។

លោក Brunson ត្រូវ​បាន​អាជ្ញាធរ​តួកគី​ឃុំ​ខ្លួន​អស់​រយៈពេល ២០ ខែ​មក​ហើយ ក្រោម​បទ​ចោទ​ប្រកាន់​ថា លោក​បាន​គាំទ្រ​ក្រុម​មួយ​ចំនួន​ដែល​រដ្ឋាភិបាល​តួកគី​ចាត់ទុក​ថា​ជា​ក្រុម​ភេរវជន។

ដើម្បី​ជា​ការ​ឆ្លើយតប​ទៅ​នឹង​ការ​មិន​ដោះលែង​លោក Brunson នេះ សហរដ្ឋ​អាមេរិក​បាន​ដាក់​ទណ្ឌកម្ម​លើ​មន្ត្រី​រដ្ឋាភិបាល​តួកគី​ពីរ​រូប។ បន្ថែម​ពី​នេះ​ទៀត កាល​ពី​ថ្ងៃ​សុក្រ ប្រធានាធិបតី​អាមេរិក​លោក Donald Trump បាន​សរសេរ​នៅ​លើ Twitter ថា លោក​នឹង​បង្កើន​ពន្ធ​គយ​លើ​ទំនិញ​ដែក​ថែប និង​អាលុយមីញ៉ូម​ដែល​នាំ​ចូល​មក​ពី​ប្រទេស​តួកគី ដោយ​ពន្ធ​លើ​អាលុយមីញ៉ូម​នឹង​កើន​រហូត​ដល់ ២០ ភាគរយ ចំណែក​ឯ​ពន្ធ​គយ​លើ​ដែក​ថែប​នឹង​កើន​រហូត​ដល់ ៥០ ភាគរយ៕

XS
SM
MD
LG