លោកប្រធានាធិបតីសហរដ្ឋអាមេរិក ដូណាល់ ត្រាំ បានបង្កើនការតានតឹងបន្ថែមទៀតជាមួយប្រទេសតួកគីកាលពីថ្ងៃសុក្រ ដោយបានប្រកាសបង្កើនពន្ធគយយ៉ាងខ្លាំងលើការនាំចូលដែកថែបនិងអាលុយមីញ៉ូម។
លោកប្រធានាធិបតី ត្រាំ បាននិយាយនៅការចុះផ្សាយសារតាមប្រព័ន្ធ Twitter កាលពីព្រឹកថ្ងៃសុក្រថា «ខ្ញុំទើបតែអនុញ្ញាតឲ្យបង្កើនពន្ធគយទ្វេដងលើដែកថែបនិងអាលុយ មីញ៉ូមដល់ប្រទេសតួកគី»។
នៅក្នុងការប្រកាសយកពន្ធគយ២០ភាគរយលើអាលុយមីញ៉ូមនិង៥០ភាគរយលើដែកថែប ប្រធានាធិបតី ត្រាំ និយាយថា «រូបិយប័ណ្ណតួកគី Lira បានធ្លាក់ចុះតម្លៃយ៉ាងឆាប់រហ័ស បើប្រៀបធៀបទៅនឹងប្រាក់ដុល្លារដ៏ខ្លាំងរបស់យើង»។
ការប្រកាសរបស់ប្រធានាធិបតី ត្រាំ បានកើតមានឡើងរយៈពេល២ថ្ងៃបន្ទាប់ពីគណៈ ប្រតិភូការទូតតួកគីបានទៅបំពេញទស្សនកិច្ចរដ្ឋធានីវ៉ាស៊ីនតោន នៅក្នុងការស្វះស្វែងបន្ធូបន្ថយភាពតានតឹងរវាងប្រទេសទាំង២។ ពួកអ្នកវិភាគបានព្រមានថា ការកើនឡើងនូវភាពតានតឹងរវាងសហរដ្ឋអាមេរិកនិងតួកគីនឹងធ្វើឲ្យមានវិបត្តិហិរញ្ញវត្ថុនៅក្នុងប្រទេសតួកគី។
កាលពីថ្ងៃច័ន្ទ រូបិយប័ណ្ណ Lira របស់តួកគីបានរងការប៉ះពាល់យ៉ាងខ្លាំងដោយការធ្លាក់ថ្លៃយ៉ាងខ្លាំងបំផុតដែលគេមិនធ្លាប់ឃើញក្នុងរយៈពេលមួយទសវត្សរ៍នេះបន្ទាប់ពីមានសេចក្តីរាយការណ៍ថា រដ្ឋបាលរបស់លោកប្រធានាធិបតី ត្រាំ បានពិចារណាពីការបញ្ចប់ការមិនយកពន្ធគយទំនិញរបស់តួកគីចូលក្នុងទីផ្សារសហរដ្ឋអាមេរិក។ សារតាមប្រព័ន្ធ Twitterកាលពីថ្ងៃសុក្ររបស់ប្រធានាធិបតីត្រាំបានបណ្តាលឲ្យរូបិយប័ណ្ណរបស់តួកគីបានធ្លាក់តម្លៃយ៉ាងខ្លាំង។
ការតានតឹងរវាងសហរដ្ឋអាមេរិកនិងតួកគីបានចាប់ផ្តើមរីកកាន់តែធំឡើងកាលពីសប្តាហ៍មុនដោយប្រធានាធិបតី ត្រាំ បានដាក់ទណ្ឌកម្មសេដ្ឋកិច្ចលើមន្រ្តី២នាក់របស់តួកគីលើបញ្ហាឃុំឃាំងលោក Andrew Brunson អ្នកគ្រូគង្វាលអាមេរិកាំង៕
