ប្រធានាធិបតីអាមេរិក លោក ដូណាល់ ត្រាំ បានប្រាប់សមភាគីតួកគីរបស់លោកថា សហរដ្ឋអាមេរិក នឹងឈប់ផ្តល់អាវុធដល់ក្រុមប្រយុទ្ធឃឺដ YPG តទៅទៀតហើយ។ នេះបើយោងតាមការសរុបសេចក្ដីដែលធ្វើឡើងដោយមន្ត្រីតួកគីម្នាក់ ក្រោយការសុន្ទនាតាមទូរស័ព្ទកាលពីថ្ងៃសុក្ររវាងមេដឹកនាំនៃប្រទេសទាំងពីរ។
រដ្ឋមន្ត្រីការបរទេសតួកគីគឺលោក Mevlut Cavusoglu បានមានប្រសាសន៍ថា លោក ត្រាំ បានធ្វើអត្ថាធិប្បាយបែបនេះ កាលពីថ្ងៃសុក្រ បន្ទាប់ពីនិយាយគ្នាតាមទូរស័ព្ទជាមួយប្រធានាធិបតីតួកគីគឺលោកRecep Tayyip Erdogan ។
យោងតាមលោករដ្ឋមន្ត្រីការបរទេសតួកគីដដែល លោកត្រាំ បានថ្លែងថា លោកបានផ្ដល់ការណែនាំយ៉ាងច្បាស់ថា មិនឲ្យមានការផ្តល់អាវុធដល់ក្រុមប្រយុទ្ធឃឺដ YPG ទេ។
លោករដ្ឋមន្ត្រីការបរទេសតួកគី ក៏បានដកស្រង់ប្រសាសន៍របស់ប្រធានាធិបតីអាមេរិក ដោយថ្លែងថា «ទង្វើដែលមិនបានការនេះ គួរណាស់តែបញ្ចប់តាំងតែពីយូរយារណាស់មកហើយ»។
សេចក្តីថ្លែងការណ៍មួយរបស់សេតវិមាន ដែលបានចេញកាលពីល្ងាចថ្ងៃសុក្រ បានឲ្យដឹងថា លោក ត្រាំ បានជូនដំណឹងដល់លោក Erdoganអំពី «ការកែសម្រួលដែលកំពុងធ្វើចំពោះការគាំទ្រផ្នែកយោធា ដែលអាមេរិកបានផ្តល់ដល់ដៃគូរបស់ខ្លួនក្នុងប្រទេសស៊ីរី»។
សេចក្ដីថ្លែងការណ៍របស់សេតវិមានដដែល បានពណ៌នាការកែប្រែនេះថា «ជាការស្របនឹងគោលនយោបាយពីមុនរបស់អាមេរិក» ហើយវាក៏បានឆ្លុះបញ្ចាំងពីដំណាក់កាលថ្មីនៃការប្រយុទ្ធ ក្រោយពីការដួលរលំនៃក្រុងRaqqa ដែលជារដ្ឋធានីរបស់ក្រុមរដ្ឋឥស្លាម ដែលបានប្រកាសខ្លួនឯងថាជាអ្នកស្នងតំណែងព្យាការី Muhammad ។
សេចក្ដីថ្លែងការណ៍របស់សេតវិមាន បានសរសេរថា «សមរភូមិនៃក្រុងRaqqa បានចង់សព្វគ្រប់ហើយ ហើយយើង កំពុងវិវត្តទៅដល់ដំណាក់កាលធ្វើឲ្យមានស្ថិរភាព ដើម្បីធានាថា ក្រុមរដ្ឋឥស្លាម នឹងមិនអាចវិលត្រឡប់មកក្រុងនេះវិញបានទេ»។ប៉ុន្តែ សេចក្ដីថ្លែងការណ៍ដដែល មិនបានបញ្ជាក់ចំឈ្មោះ YPG នោះទេ។
យោងតាមសេតវិមាន លោក Erdogan និងលោក ត្រាំ ក៏បានពិភាក្សាគ្នាអំពីការទិញសព្វាវុធយោធាពីសហរដ្ឋអាមេរិកផងដែរ៕
