ក្រុមមន្ត្រីតួកគីបាននិយាយថា ប្រទេសតួកគីចាប់បានបងស្រីមេដឹកនាំពួករដ្ឋឥស្លាមឈ្មោះ Abu Bakr al-Baghdadi នៅក្នុងផ្នែកពាយ័ព្យនៃប្រទេសស៊ីរី។
ទីភ្នាក់ងារព័ត៌មាន Reuters និង AP បានដកស្រង់ពាក្យសម្តីមន្ត្រីជាន់ខ្ពស់ម្នាក់ដែលបាននិយាយថាគេបានរកឃើញអ្នកស្រី Rasmiya Awad អាយុ៦៥ឆ្នាំនៅក្នុងការឆ្មក់មួយកាលពីថ្ងៃទី៤ខែវិច្ឆិកានៅជិតក្រុង Azaz ត្រួតត្រាដោយតួកគីនៅក្នុងខេត្ត Aleppo។
មន្ត្រីនេះដែលបាននិយាយដោយមានលក្ខខណ្ឌមិនឱ្យគេបញ្ចេញឈ្មោះបានថ្លែងថាគេបានរកឃើញអ្នកស្រី Awad នៅក្នុងផ្ទះដែលអាចដឹកពីកន្លែងមួយទៅកន្លែងមួយទៀតដែលនៅទីនោះអ្នកស្រីបានរស់នៅជាមួយប្តី កូនប្រសាស្រី និងកូនប្រាំនាក់។
មន្ត្រីរូបនេះបាននិយាយថា អ្នកស្រី Awad អាច «ផ្តល់ព័ត៌មានសំខាន់ៗខាងការស៊ើបការសម្ងាត់»។
លោក Fahrettin Altun ប្រធានផ្នែកគមនាគមន៍របស់ប្រធានាធិបតីតួកគី Recep Tayyip Erdoganបានអបអរសាទរការចាប់ខ្លួននេះថាជា «ឧទាហរណ៍មួយទៀតនៃជោគជ័យខាងកិច្ចប្រតិបត្តិការប្រឆាំងនឹងភេរវកម្មរបស់យើង»។
គេដឹងតែបន្តិចបន្តួចប៉ុណ្ណោះអំពីបងស្រីរបស់ Baghdadi៕
