លោករដ្ឋមន្ត្រីការពារប្រទេសស.រ.អា. Mark Esper បានមានប្រសាសន៍ថាការវាយលុករបស់ប្រទេសតួកគីប្រឆាំងនិងពួកជនអំបូរ ឃឺត ក្នុងភាគឦសាននៃប្រទេសស៊ីរីជារឿង«គ្មានហេតុផលល្អ» ហើយរដ្ឋាភិបាលក្រុងអង់ការ៉ា «កំពុងឋិតនៅក្នុងផ្លូវខុស» នៅក្រោយមានកិច្ចព្រមព្រៀងរបស់ខ្លួនជាមួយប្រទេសរុស្ស៊ីក្នុងការយាមល្បាតរួមគ្នានៅក្នុង«តំបន់មានសុវត្ថិភាព» មួយនៅក្នុងប៉ែកនោះនៃប្រទេសស៊ីរី។
លោក Esper បាននិយាយនៅឯមូលនិធិ Marshall អាល្លឺម៉ង់នៅមុនការប្រជុំមួយរបស់អង្គការអូតង់នៅក្នុងរាជធានីប្រ៊ុចសែល នៅថ្ងៃព្រហស្បតិ៍ថា«ប្រទេសតួកគីបានដាក់យើងក្នុងស្ថានភាពអាក្រក់ណាស់»។
កងកម្លាំងតួកគីបានចូលលុកលុយក្នុងភាគខាងជើងនៃប្រទេសស៊ីរីកាលពីឲក្នុងខែមុននេះបន្ទាប់ពីស.រ.អា.សម្រេចដកកងកម្លាំងខ្លួនចេញពីទីនោះ។ស.រ.អា.បានជួយសម្របសម្រួលឱ្យបទឈប់បាញ់គ្នាមួយនៅក្នុងការវាយលុករបស់ តួកគី។
លោកប្រធានាធិបតី Donald Trump បាននិយាយកាលពីថ្ងៃពុធថាប្រទេសតួកគី បានធានារ៉ាប់រងប្រាប់លោកថាបទឈប់បាញ់គ្នានេះនឹងមានភាពអចិន្ត្រៃយ៍ដែលជាព្រឹត្តិការណ៍មួយលោកថ្លែងថាអនុញ្ញាតឱ្យស.រ.អា.លប់ចោលការដាក់ទណ្ឌកម្មកាលពីពេលថ្មីៗលើរដ្ឋាភិបាលក្រុង អង់ការ៉ា។ លោកបានថ្លែងថាប្រទេសឯទៀតៗគួរមានការទទួលខុសត្រូវថែរក្សាសន្តិភាពនៅក្នុងតំបន់នោះ។
លោក Trump បាននិយាយអំពីកិច្ចខិតខំប្រឹងប្រែងរបស់ស.រ.អា.ក្នុងការបញ្ឈប់ការប្រយុទ្ធគ្នារវាងប្រទេស តួកគី ដែលជាសម្ព័ន្ធមិត្តមួយក្នុងអង្គការអូតង់និងកងកម្លាំងប្រជាធិបតេយ្យស៊ីរីដែលមានយុទ្ធជនភាគច្រើនជាជនអំបូរ ឃឺត ដែលជាដៃគូសំខាន់មួយក្នុងយុទ្ធនាការដឹកនាំដោយស.រ.អា.ក្នុងការយកជ័យជំនះលើពួករដ្ឋ ឥស្លាម។ លោកបានថ្លែងថា«យើងបានធ្វើសេវាធំមួយសម្រាប់ពួកគេ»។
លោកប្រធានាធិបតីបាននិយាយថា«នេះជាលទ្ធផលមួយដែលយើងស.រ.អា.បានបង្កើតឱ្យមានហើយគ្មាននរណាធ្វើឱ្យមានទេ។ នៅពេលនេះយើងចាកចេញពីទីនោះ...ទុកឱ្យនរណាទៀតប្រយុទ្ធគ្នាដណ្តើមតំបន់មានដីខ្សាច់ប្រឡាក់ឈាមយ៉ាងវែងនោះចុះ»៕
