ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

លោក Trump ដក​សហរដ្ឋអាមេរិក​ចេញ​ពី​កិច្ចព្រមព្រៀង​នុយក្លេអ៊ែរ​អ៊ីរ៉ង់


លោក​ប្រធានាធិបតី ដូណាល់ ត្រាំ ថ្លែង​សុន្ទរកថា​ស្តី​ពី​កិច្ចព្រមព្រៀង​នុយក្លេអ៊ែរ​អ៊ីរ៉ង់​ នៅ​សេតវិមាន កាលពី​ថ្ងៃទី៨ ខែឧសភា ឆ្នាំ២០១៨ រដ្ឋធានី​វ៉ាស៊ីនតោន។

លោកប្រធានាធិបតី Donald ​Trump កាល​ពី​ថ្ងៃអង្គារ​បាន​សម្រេច​ដក​សហរដ្ឋអាមេរិក​ចេញពី​កិច្ចព្រមព្រៀង​អន្តរជាតិ​ឆ្នាំ២០១៥​ ដែល​មាន​បំណង​ទប់ស្កាត់​កម្មវិធី​នុយក្លេអ៊ែរ​របស់​អ៊ីរ៉ង់។ លោក​បាន​រិះគន់​កិច្ចព្រមព្រៀង​នេះ​ថា​ជា​កិច្ចព្រមព្រៀង «មហន្តរាយ» ​ដែល​នឹង​មិន​អាច​ទប់ស្កាត់​ក្រុងតេហេរ៉ង់​ពី​ការ​ផលិត​អាវុធ​នុយក្លេអ៊ែរ​ និង​អាច​បង្ក​គ្រោះថ្នាក់​ដល់​ពិភពលោក។

មេដឹកនាំ​សហរដ្ឋអាមេរិក​បាន​និយាយ​ថា​ លោក​នឹង​ដាក់​ទណ្ឌកម្ម​សេដ្ឋកិច្ច​ខ្លាំង​បំផុត​ឡើងវិញ​លើ​ប្រទេស​អ៊ីរ៉ង់។ លោក Trump បាន​ថ្លែង​បន្ត​ថា​លោក​បើក​ចំហរ​ធ្វើ​ការ​ជាមួយ​ប្រទេស​សម្ព័ន្ធមិត្ត​ក្នុង​ទ្វីបអ៊ឺរ៉ុប​ ដើម្បី​ចរចា​កិច្ចព្រមព្រៀង​ថ្មី​ជាមួយ​សាធារណរដ្ឋ​ឥស្លាម​ ដើម្បី​ទប់ស្កាត់​ការ​បាញ់​សាកល្បង​កាំជ្រួច​ម៉ីស៊ីល​ផ្លោង​ឆ្លងទ្វីប​របស់​អ៊ីរ៉ង់​ និង​ភាពជឿនលឿន​ខាង​វិស័យ​យោធា​ក្នុង​ប្រទេសស៊ីរី​ យេម៉ែន​ និងប្រទេស​ផ្សេង​ទៀត​ក្នុង​តំបន់​មជ្ឈិមបូព៌ា​ បើទោះបី​ជា​ទីក្រុង​តេហេរ៉ង់​បាន​ប្រកាស​រួច​ហើយ​ថា​ខ្លួន​មិន​ចាប់អារម្មណ៍​ក្នុង​ការ​ចរចា​កិច្ចព្រមព្រៀង​ថ្មី​នេះ​ក្តី។

លោក Trump បាន​ថ្លែង​យ៉ាង​ខ្លី​នៅ​ឯ​សេតវិមាន​ ដោយ​បាន​ហៅ​កិច្ចព្រមព្រៀង​ដែល​ចរចា​ដោយ​លោក​អតីតប្រធានាធិបតី Barack Obama ថា​ជា​កិច្ចព្រមព្រៀង​មាន​លក្ខណៈ​ «ផុយរលួយ»។

លោក​បាន​ថ្លែង​បន្ថែម​ថា​កិច្ចព្រមព្រៀង​នេះ​គឺ​ជា «រឿង​ប្រឌិត​យ៉ាង​ធំ​មួយ» ដែល​អ៊ីរ៉ង់​យក​លេស​ថា​គ្រាន់​តែ​ចង់​ផលិត​នុយក្លេអ៊ែរ​ដើម្បី​រក្សា​សន្តិភាព​ប៉ុណ្ណោះ។ ការ​សន្យា​របស់​អ៊ីរ៉ង់​គឺ​ជា​ការភូតកុហក»៕

XS
SM
MD
LG