បេក្ខជនប្រធានាធិបតីនាំមុខគេខាងគណបក្សសាធារណរដ្ឋ គឺលោក Donald Trump បានឈ្នះការបោះឆ្នោតបឋមក្នុងរដ្ឋចំនួន៣ កាលពីថ្ងៃអង្គារ រួមទាំងរដ្ឋ Florida ដែលជារដ្ឋដ៏សំខាន់មួយដែរ។ ជ័យជម្នះរបស់លោក Trump បានបង្ខំឲ្យសមាជិកព្រឹទ្ធសភាលោក Marco Rubio ដកខ្លួនពីការប្រកួតនេះ ហើយបានបង្កើនចំនួនប្រតិភូសម្រាប់លោក Trump កាន់តែច្រើនឡើង លើសមាជិកព្រឹទ្ធសភាមកពីរដ្ឋតិចសាស់ គឺលោក Ted Cruz ។
រដ្ឋតែមួយប៉ុណ្ណោះដែលលោក Trump ចាញ់ គឺរដ្ឋ Ohio ដែលនៅទីនោះអភិបាលរដ្ឋគឺលោកJohn Kasich បានទទួលជ័យជម្នះជាលើកដំបូងក្នុងរដ្ឋរបស់ខ្លួនផ្ទាល់ នៅក្នុងការប្រកួត ដែលអ្នកឈ្នះ ទទួលបានប្រតិភូទាំងអស់។
មហាសេដ្ឋីអចលទ្រព្យលោក Donald Trump ឈ្នះនៅរដ្ឋ Florida ដោយសំឡេង១៩ភាគរយ និងឈ្នះនៅរដ្ឋ North Carolina និងរដ្ឋ llinois ដោយសំឡេងប្រកៀកប្រកិតជាមួយលោក Cruz ។
លោក Trump និងលោក Cruz ខាងគណបក្សសាធារណរដ្ឋដូចគ្នា កំពុងរង់ចាំមើលលទ្ធផលក្នុងរដ្ឋ Missouri ដែលមានលក្ខណៈប្រកៀកប្រកិតគ្នាពេក រហូតដល់គេមិនទាន់អាចប្រកាសបានថានរណាជាអ្នកឈ្នះបានទេ។
ដោយព្យាយាមបង្ហាញថា ការប្រកួតឥឡូវនៅសល់តែមនុស្សពីរនាក់នោះ លោក Cruz បានថ្លែងថា ឥឡូវដល់ពេល ដែលអ្នកគាំទ្រគណបក្សសាធារណរដ្ឋ រួបរួមគ្នាហើយដោយលោកស្វាគមន៍អ្នកគាំទ្រលោក Rubio ឲ្យចូលជាមួយលោកវិញ។
រីឯ លោក Trump វិញក៏បានថ្លែងថា ឥឡូវដល់ពេល ដែលគណបក្សសាធារណរដ្ឋរួបរួមគ្នាជាធ្លុងមួយដែរ ដោយបានប្តេជ្ញាថាលោកនឹងមិនឈប់ឡើយដរាបណាលោកមិនទាន់ឈ្នះ «នៅទូទាំងប្រទេស» នោះ។
ចំណែកខាងគណបក្សប្រជាធិបតេយ្យវិញ ដែលមិនសូវមានការបែកចែងគ្នាខ្លាំងដូចការបោះឆ្នោតរបស់គណបក្សសាធារណរដ្ឋ អតីតរដ្ឋមន្ត្រីការបរទេសលោកស្រី Hillary Clinton ឈ្នះនៅក្នុងរដ្ឋចំនួន៤ កាលពីថ្ងៃអង្គារ។
ជ័យជម្នះរបស់លោកស្រី នៅក្នុងរដ្ឋ Florida រដ្ឋ Illinois រដ្ឋ North Carolina និងរដ្ឋ Ohio រឹតតែបង្កើនចំនួនប្រតិភូ ដែលលោកស្រីទទួលបានយ៉ាងច្រើន លើសសមាជិកព្រឹទ្ធសភា លោក Bernie Sanders រួចទៅហើយ។
ប៉ុន្តែ ការប្រកួតរបស់បេក្ខជនទាំងពីរខាងគណបក្សប្រជាធិបតេយ្យនេះ នៅក្នុងរដ្ឋ Missouri ក៏មានលក្ខណៈប្រកៀកប្រកិតគ្នាពេក រហូតដល់គេមិនទាន់អាចប្រកាសបានថា នរណាជាអ្នកឈ្នះបាននៅឡើយទេ៕
