ជាច្រើនឆ្នាំមកនេះ សហរដ្ឋអាមេរិកបានចេញសេចក្តីណែនាំ ការព្រមាននានាទៅដល់អ្នកដំណើរដែលអាចធ្វើដំណើរទៅប្រទេសដែលខេ្ទចខ្ទីដោយអំពើភេរវកម្ម ឬដោយសារជម្លោះប្រដាប់អាវុធ។ ក៏ប៉ុន្តែនាពេលបច្ចុប្បន្ន អង្គការសិទ្ធិមនុស្សអន្តរជាតិ Amnesty International រដ្ឋាភិបាលប្រទេសជប៉ុន អ៊ុយរ៉ាហ្គាយ និងប្រទេសផ្សេងៗទៀតបានចេញការព្រមានអំពីគ្រោះថ្នាក់នៃការធ្វើដំណើរមកសហរដ្ឋអាមេរិកដោយសារបញ្ហាអំពើហិង្សាកាំភ្លើង។ ការព្រមាននេះបានធ្វើឲ្យមានការឆ្លើយតបខ្លាំងៗពីលោកប្រធានាធិបតី Donald Trump។
ខណៈមានហេតុការណ៍បាញ់សម្លាប់មនុស្សកើតឡើងនៅអំឡុងពេលប៉ុន្មានៗថ្ងៃជាប់គ្នា ដូចជាការបាញ់នៅឯពិពណ៌ម្ហូបអាហារនៅរដ្ឋកាលីហ្វញ៉ា ការបាញ់នៅទីក្រុង El Paso រដ្ឋTexas និងហេតុការណ៍បាញ់មួយទៀតនៅតំបន់ទីប្រជុំជនក្នុងទីក្រុង Dayton រដ្ឋ Ohio បានធ្វើឲ្យពលរដ្ឋអាមេរិកាំងមានការភ័យខ្លាច។
អង្គការសិទ្ធិមនុស្សអន្តរជាតិ Amnesty International ប្រទេសជប៉ុន អ៊ុយរ៉ាហ្គាយ និងប្រទេសផ្សេងៗទៀតបានចេញការព្រមានដល់ពលរដ្ឋរបស់ពួកគេអំពីការធ្វើដំណើរចូលមកសហរដ្ឋអាមេរិក ដោយសារអំពើហិង្សាកាំភ្លើង។
ការព្រមានទាំងនោះបានធ្វើឲ្យដល់លោកប្រធានាធិបតី Trump ខឹងសម្បារ។ លោកប្រធានាធិបតីសហរដ្ឋអាមេរិក Donald Trump បានថ្លែងថា៖ «ខ្ញុំមិនគិតថាគេធ្វើអ៊ីចឹងទេ ប៉ុន្តែប្រសិនបើបណ្តាប្រទេសនានាធ្វើដូច្នេះ នោះយើងនឹងវាយបកត្រឡប់ទៅវិញ។ យើងនឹងវាយបកទៅវិញក្នុងនាមជាប្រទេសដែលមានខ្ញុំជាអ្នកដឹកនាំ។ នៅពេលអ្នកណាធ្វើរឿងមិនល្អដាក់ប្រទេសរបស់យើង យើងនឹងវាយបកទៅលើពួកគេវិញ»។
ដោយលើកឡើងអំពីហេតុការណ៍បាញ់សម្លាប់មនុស្សនៅក្នុងវិហារសាសនាគ្រិស្តក្នុងទីក្រុង Charleston រដ្ឋ South Carolina កាលពីឆ្នាំ២០១៥ និងហេតុការណ៍បាញ់កាំភ្លើងនៅកន្លែងផ្សេងទៀត អង្គការសិទ្ធិមនុស្ស Amnesty បានអំពាវនាវឲ្យមានការប្រុងប្រយ័ត្ន។ អង្គការនេះបានចេញសេចក្តីថ្លែងការតាមសម្តីដើមថា ត្រូវប្រយ័ត្ន! ជីវិតមនុស្សរស់នៅក្នុងសហរដ្ឋអាមេរិកប្រឈមនឹងការភ័យខ្លាចដោយសារការប្រើកាំភ្លើងនៅក្នុងប្រទេសនេះ»។ លោក Ernest Coverson មកពីអង្គការ Amnesty International បានថ្លែងថា៖ «ជនរងគ្រោះទៅវិហារគ្រិស្តសាសនានៅរដ្ឋ South Carolina ដើម្បីទៅសូត្រធម៌និងអធិដ្ឋាន ប៉ុន្តែត្រូវបានខ្មាន់កាំភ្លើងបាញ់ឲ្យរបួសនិងស្លាប់។ ដូចដែលយើងឃើញកាលពីសប្តាហ៍មុន ឬកាលពីពីរសប្តាហ៍មុននៅឯពិធីពិពណ៌ម្ហូបអាហារ ដែលជាពិធីប្រចាំឆ្នាំនោះ មនុស្សបានទៅចូលរួមយ៉ាងសប្បាយរីករាយ និងចំណាយពេលជាមួយក្រុមគ្រួសារ ប៉ុន្តែត្រូវបានរងគ្រោះថ្នាក់ ហើយឥឡូវកន្លែងនេះក្លាយជាកន្លែងដែលគ្មានមនុស្សទៅទៀតទេហើយហាងលក់ទំនិញ Walmart ក៏អ៊ីចឹងដែរ»។
អ្នកជំនាញផ្សេងទៀតបានលើកឡើងអំពីមាត្រាទីពីរនៃរដ្ឋធម្មនុញ្ញសហរដ្ឋអាមេរិក ដែលបានចែងថា សហរដ្ឋអាមេរិកគឺជាប្រទេសតែមួយគត់ដែលធានាដល់សិទ្ធិកាន់អាវុធ។ អ្នកស្រី Amy Swearer មកពីមូលនិធិ Heritage Foundation បានថ្លែងថា៖
«ពេលខ្លះវាមានការលំបាកសម្រាប់សហគមន៍អន្តរជាតិ ដើម្បីយល់អំពីភាពខុសគ្នានៃការសន្ទនានៅអាមេរិក ដោយសារតែមាត្រាទីពីរនៃរដ្ឋធម្មនុញ្ញនិងដោយសារតែប្រវត្តិសាស្រ្តនៃការកាន់កាប់កាំភ្លើងដ៏យូរលង់ណាស់មកហើយ»។
ក៏ប៉ុន្តែពលរដ្ឋអាមេរិកាំងកាន់តែច្រើនឡើងកំពុងអំពាវនាវដល់ក្រុមអ្នកដឹកនាំនយោបាយរបស់ពួកគេឲ្យការពារពួកគេពីអំពើហិង្សាបង្កឡើងដោយកាំឡើង។
ពលរដ្ឋអាមេរិកាំងជិត៤ម៉ឺននាក់ត្រូវបានសម្លាប់ដោយសារអាវុធជារៀងរាល់ឆ្នាំ ហើយករណីស្លាប់ភាគច្រើនកើតឡើងដោយការធ្វើឃាតខ្លួនឯង៕
ប្រែសម្រួលដោយ ស៊ូ ពេជ្រចិន្តា
