មនុស្សមួយក្រុមដែលមានគ្នា ៣៦ នាក់ បានដាក់ពាក្យបណ្ដឹងជាលើកដំបូងបង្អស់ប្រឆាំងនឹងការហាមប្រាមការធ្វើដំណើរដែលធ្វើឡើងដោយរដ្ឋបាលរបស់ប្រធានាធិបតីអាមេរិកលោក Donald Trump បន្ទាប់ពីតុលាការកំពូលសហរដ្ឋអាមេរិកបានសម្រេចគាំទ្រវិធានការនេះកាលពីខែមិថុនាកន្លងទៅនេះ។
អង្គការ Muslim Advocates អង្គការ Lotfi Legal LLC ក្រុមហ៊ុន Immigrant Advocacy & Litigation Center PLLC និងក្រុមហ៊ុន Public Counsel បានដាក់ពាក្យបណ្ដឹងរួមគ្នាតំណាងឲ្យមនុស្សមួយចំនួនដែលត្រូវបានរដ្ឋបាលរបស់លោក Trump បដិសេធទិដ្ឋាការរបស់ពួកគេដោយគ្មានហេតុផលត្រឹមត្រូវ ឬក៏ពាក្យសុំទិដ្ឋាការរបស់ពួកគេត្រូវបានជាប់គាំង។
សេចក្ដីប្រកាសរបស់លោកប្រធានាធិបតី Trump នៅក្នុងការហាមប្រាមការធ្វើដំណើរនេះ អនុញ្ញាតឲ្យមានការលើកលែងមួយចំនួននៃការដាក់កំហិតការធ្វើដំណើរនេះ។
ការលើកលែងទាំងនេះត្រូវបានផ្ដល់ឲ្យមួយករណីម្ដងៗ នៅក្នុងលក្ខខណ្ឌដែលអ្នកសុំទិដ្ឋាការអាចបង្ហាញថា ការដាក់កំហិតនេះអាចបណ្ដាលឲ្យមានការរងទុក្ខវេទនាហួសហេតុ ពួកគេមិនមែនជាការគំរាមកំហែងចំពោះសន្តិសុខជាតិ និងការធ្វើដំណើរមកដល់សហរដ្ឋអាមេរិកនេះគឺមិនប៉ះពាល់ដល់ផលប្រយោជន៍របស់សហរដ្ឋអាមេរិក។
អ្នកដាក់ពាក្យបណ្ដឹងទាំងនេះ ស្នើតុលាការថ្នាក់ស្រុកមួយរបស់សហរដ្ឋអាមេរិកឲ្យបញ្ជាឲ្យរដ្ឋបាលរបស់លោក Trump បញ្ឈប់ការអនុវត្តខុសច្បាប់របស់ខ្លួន ចាត់ទុកជាមោឃៈចំពោះការបដិសេធទិដ្ឋាការកាលពីលើកមុន ពិនិត្យឡើងវិញនូវពាក្យសុំនីមួយៗក្នុងមួយករណីម្ដងៗ និងផ្ដល់ការណែនាំឲ្យបានជាក់ច្បាស់អំពីថាតើនរណាដែលអាចទទួលបានការលើកលែងនេះ៕
