ប្រធានាធិបតីអាមេរិកលោក Donald Trump បាននិយាយនៅថ្ងៃចន្ទនេះថា រដ្ឋបាលរបស់លោក កំពុងពិចារណា ថាតើគួរអនុញ្ញាតឱ្យមានការខួងយកប្រេងក្នុងតំបន់ជម្រកសត្វព្រៃធម្មជាតិ Arctic ក្នុងរដ្ឋ Alaska របស់អាមេរិកដែលមានទំហំប្រមាណ៧,៧លានហិកតាដែលគេមិនបានកំណត់សម្រាប់ការខួងយកអស់រយៈពេលរាប់ទសវត្សរ៍មកហើយនោះ។
លោក ត្រាំបានប្រាប់ទូរទស្សន៍ Fox News ក្នុងបទសម្ភាសន៍មួយតាមទូរស័ព្ទនៅថ្ងៃចន្ទ នៅពេលត្រូវសួរអំពីរឿងនេះដែលត្រូវបានចុះផ្សាយដោយសារព័ត៌មាន Wall Street Journal ទាក់ទងនឹងគម្រោងជួលតំបន់យកប្រេងក្នុងដែនជម្រកនេះ ដោយលោក ត្រាំ និយាយថា រដ្ឋបាលរបស់លោក នឹងពិនិត្យមើលពីរឿងនេះ។
សារព័ត៌មានWall Street Journal បានផ្សាយថា ការយល់ព្រមរបស់ក្រសួងមហាផ្ទៃ ដែលអនុញ្ញាតឱ្យមានកម្មវិធីខួងយកប្រេងនេះ នឹងបើកផ្លូវឱ្យមានការជួលក្នុងការរុករកឧស្ម័ន និងប្រេង ដោយដាក់ឱ្យដេញថ្លៃនៅចុងឆ្នាំ២០២០នេះ។ ការសម្រេចនេះនឹងមានការលំបាកលុបចេញវិញ បើទោះបីជាលោក Trump ត្រូវចាញ់ឆ្នោតលោក Joe Biden នៅក្នុងការបោះឆ្នោតប្រធានាធិបតីអាមេរិកក្នុងខែវិច្ឆិកា ខាងមុខនេះក៏ដោយ។
កាសែត Washington Post ក៏បានរាយការណ៍ផងដែរថា រដ្ឋបាលរបស់លោកត្រាំ កំពុងរៀបចំសម្រេចចំណុចចុងក្រោយនូវគម្រោងផែនការនេះនៅថ្ងៃចន្ទ ដើម្បីដាក់តំបន់ប្រេងនេះសម្រាប់ការរុករកខួងយកប្រេង។
ក្រុមជនជាតិដើមអាមេរិកនិងអ្នកបរិស្ថានបានប្រឆាំងចំពោះផែនការអភិវឌ្ឍតំបន់ដែនជម្រកនោះ បន្ទាប់ពីច្បាប់មួយដែលអនុញ្ញាតឱ្យមានការរុករកខួងយកប្រេងនិងឧស្ម័នក្នុងតំបន់នេះ ត្រូវបានអនុម័តក្នុងឆ្នាំ២០១៧មក៕
