ភ្ជាប់​ទៅ​គេហទំព័រ​ទាក់ទង

លោក Trump៖ គណកម្មការ​ស៊ើបអង្កេត​ការ​លួច​បន្លំ​សន្លឹក​ឆ្នោត​នឹង​មាន​តម្លាភាព​


រូបភាព​ឯកសារ៖ ប្រអប់ឆ្នោត​នៅ​ក្នុង Dixville Notch រដ្ឋ New Hampshire កាលពីថ្ងៃទី០៧ វិច្ឆិកា ២០១៦។

ប្រធានាធិបតី​សហរដ្ឋ​អាមេរិក​លោក Donald Trump កាលពីថ្ងៃ​ពុធ​បាន​ថ្លែង​ថា គណកម្មការ​ស៊ើបអង្កេត​ការ​លួច​បន្លំ​សន្លឹក​ឆ្នោត​ដែល​ត្រូវ​បាន​បង្កើត​ឡើង​ក្រោម​រដ្ឋបាល​គ្រប់គ្រង​របស់​លោក​នោះ​ នឹង​មាន​តម្លាភាព​ខ្លាំង ហើយ​លទ្ធផល​នឹង​ដាក់​បង្ហាញ​ជា​សាធារណៈ​នៅ​ពេល​ដែល​របាយការណ៍​ត្រូវ​បាន​សរសេរ​ហើយ​រួច​រាល់។

កិច្ចការ​របស់​គណកម្មការ​នេះ​នឹង​មាន​លក្ខណៈ​បើក​ចំហ​ខ្លាំង​សម្រាប់​គ្រប់​គ្នា​ នេះ​បើយោង​តាម​លោក Trump ដែល​បាន​ថ្លែង​ក្នុង​អំឡុង​ពេល​កិច្ច​ប្រជុំ​លើក​ដំបូង​របស់​គណកម្មការ​នេះ។ លោក​ថ្លែង​ប្រាប់​គណកម្មការ​ទាំង​នោះ​ថា៖ «អ្នក​ទាំង​អស់​គ្នា​នឹងកាន់​កិច្ច​ការ​ដ៏​សំខាន់​ ដោយ​ការ​បើក​ចិត្ត​ឲ្យ​ទូលាយ​និង​មិន​ត្រូវ​មាន​ការ​សន្និដា្ឋន​ជា​មុន​នោះ​ទេ។ អ្នក​នឹង​ត្រូវ​ធ្វើ​ទៅ​តាម​ការ​ពិត​ប្រកប​ដោយ​ភាព​យុត្តិធម៌​និង​ឥត​លំអៀង មិន​ថា​លទ្ធផល​ទៅ​ជា​យ៉ាង​ណា​នោះ​ទេ‍»។

គណកម្មការ​នេះ​បាន​ជួប​ជុំ​គ្នា​ដើម្បី​ស្បថ​ចូល​ជា​សមាជិក ហើយ​ពួក​គេ​បាន​បង្កើត​កម្មវត្ថុ​របស់​ពួកគេ​និង​បាន​ពិភាក្សា​ពី​ជំហាន​បន្ទាប់​ បន្ទាប់​ពី​ពួក​គេ​បាន​ស្នើ​សុំ​ព័ត៌មាន​អំពី​ការបោះឆ្នោត​ពី​រដ្ឋ​ទាំង​៥០​កាលពី​ខែ​មុន។

លោក Trump បាន​ប្រកាស​អំពី​ការ​បង្កើត​គណកម្មការ​នេះ​នៅ​ដើម​អាណត្តិ​របស់​លោក បន្ទាប់​ពី​លោក​បាន​ធ្វើ​ការ​ចោទ​ប្រកាន់​ដោយ​ឥត​ភស្តុតាង​ថា ក្រុម​អ្នក​បោះឆ្នោត​ខុស​ច្បាប់​រាប់​លាន​នាក់​បាន​ធ្វើ​ឲ្យ​លោក​ចាញ់​សំឡេង​ឆ្នោត​ប្រជាប្រិយ​នៅ​ក្នុង​ការបោះឆ្នោត​ជ្រើស​រើស​ប្រធានាធិបតី​កាលពី​ឆ្នាំ​២០១៦។

លោក​អនុ​ប្រធានាធិបតី Mike Pence បាន​សន្យា​ថា​ គណកម្មការ​ស៊ើប​អង្កេត​ការ​បន្លំ​សន្លឹក​ឆ្នោត​នឹង​ធ្វើ​ការ​បម្រើ​ប្រជាពលរដ្ឋ​អាមេរិកាំង​ដោយ​មិន​បម្រើ​បក្ស​ណា​មួយ​នោះ​ទេ បើ​ទោះ​បី​ជា​សមាជិក​ខាងគណបក្ស​ប្រជាធិបតេយ្យ​ជា​ច្រើន​បាន​បង្ហាញ​ពី​មន្ទិល​សង្ស័យ​របស់​ពួក​គេ​ទៅ​លើ​ប្រសិទ្ធភាព​របស់​គណកម្មការ​នេះ ហើយ​ពួក​គេ​បាន​អំពាវនាវ​ឲ្យ​ដក​លោក Kris Kobach ចេញ​ពី​តំណែង​ជា​អនុប្រធាន៕

XS
SM
MD
LG