ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

លោក​ត្រាំចោទ​សារព័ត៌មាន​ថា​ធ្វើ​ឲ្យ​ខូច​លទ្ធិប្រជាធិបតេយ្យ​ជុំវិញ​ការ​ចេញ​សេចក្តី​រាយការណ៍​អំពី​ជំនួប​កូន​ប្រុស​របស់​លោក​នឹង​រុស្ស៊ី


លោក Donald Trump Jr. (ឆ្វេង) កំពុង​និយាយ​ជាមួយ​ឪពុក​របស់​លោក​គឺ​លោក​ ដូណាល់ ត្រាំ កាល​ពី​អំឡុង​ពេល​ឃោសនា​បោះ​ឆ្នោត​នៅឆ្នាំ​២០១៦ នៅរដ្ឋ​ Ohio។
លោក Donald Trump Jr. (ឆ្វេង) កំពុង​និយាយ​ជាមួយ​ឪពុក​របស់​លោក​គឺ​លោក​ ដូណាល់ ត្រាំ កាល​ពី​អំឡុង​ពេល​ឃោសនា​បោះ​ឆ្នោត​នៅឆ្នាំ​២០១៦ នៅរដ្ឋ​ Ohio។

លោក​ប្រធានាធិបតី​អាមេរិក ដូណាល់ ត្រាំ​ បាន​ព្រលះ​ប្រព័ន្ធ​ផ្សព្វផ្សាយ​អាមេរិក​កាល​ពី​ថ្ងៃ​អាទិត្យ ដោយ​បន្ទោស​ថា​ធ្វើ​ឲ្យ​«ខូច​ដល់​លទ្ធិប្រជាធិបតេយ្យ‍» ​នៅ​ក្នុង​សេចក្តី​រាយការណ៍​នានា​អំពី​ជំនួប​របស់​កូន​ប្រុស​ច្បង​របស់​លោក​កាល​ពី​ឆ្នាំ​មុន​ជាមួយ​នឹង​មេធាវី​រុស្ស៊ី​ម្នាក់ ​ដែល​លោក​បាន​គិត​ថា ​នឹង​ផ្តល់​ព័ត៌មាន​មិន​ល្អ​អំពី​លោក​ស្រី Hillary Clinton ខាង​គណបក្ស​ប្រជាធិបតេយ្យ​នៅ​មុន​ការ​បោះឆ្នោត​ប្រធានាធិបតី​ឆ្នាំ​២០១៦​កន្លង​ទៅ​នេះ។

នៅ​ក្នុង​ប្រអប់​បញ្ចេញ​មតិ​មួយ​ចំនួន​លើ​បណ្តាញ​សង្គម​ Twitter ដែល​លោក​ផ្ញើ​ចេញ​ពី​រមណីយដ្ឋាន​វាយ​កូនហ្គោល​របស់​លោក​នៅ​ទីក្រុង​ Bedminster ​រដ្ឋ​ New Jersey​ លោក ត្រាំ​ បាន​ការពារ​កូនប្រុស​ច្បង​របស់​លោក គឺ​លោក Donald Trump Jr. ដែល​បាន​ជួប​ជាមួយ​នឹង​អ្នកស្រី ​Natalia Veselnitskaya ​កាល​ពី​ខែ​មិថុនា​ឆ្នាំ​២០១៦ ​បន្ទាប់​ពី​អន្តរការី​ម្នាក់​ប្រាប់​ថា អ្នកស្រី​គឺ​ជា​មេធាវី​របស់​រដ្ឋាភិបាល​រុស្ស៊ី​ ដែល​នឹង​ផ្តល់​ព័ត៌មាន​ដល់​លោក​ ដើម្បី​ជា​ផ្នែក​មួយ​នៃ​ការ​គាំទ្រ​របស់​រដ្ឋាភិបាល​ក្រុង​មូស្គូ​ដល់​លោក ត្រាំ​ ក្នុង​ការ​យក​ឈ្នះ​លើ​លោកស្រី​ Clinton។ ​

លោក ត្រាំ​ បាន​សរសេរ​នៅ​ក្នុង​សារ​មួយ​ថា​ «លោកស្រី​ Hillary Clinton ​អាច​ទទួល​បាន​ដោយ​ខុស​ច្បាប់​នូវ​សំណួរ​អំពី​ការ​សួរ​ដេញ​ដោល​មតិ​និង​លុប​សារ​អ៊ីមែល​ចំនួន​៣៣០០០​ច្បាប់​ ប៉ុន្តែ​ហេតុ​អ្វីបាន​ជា​កូន​ប្រុស​របស់​ខ្ញុំ ​Don ​កំពុង​តែ​រងការ​ប្រមាថ​ដោយ​ប្រព័ន្ធ​ផ្សព្វផ្សាយ​ព័ត៌មាន​ប្រឌិត‍»? ​លោក ត្រាំ​ និយាយ​សំដៅ​ទៅ​លើ​សារ​អ៊ីមែល​ដែល​លោកស្រី​លុប​ចេញ​ពី Server ​កុំព្យូទ័រ​ឯកជន​របស់​លោក​ស្រី ខណៈ​ដែល​លោក​ស្រី​ធ្វើ​ជា​រដ្ឋមន្ត្រី​ក្រសួង​ការ​បរទេស​និង​ត្រូវ​បាន​គេ​ផ្តល់​សំណួរ​ឲ្យ​មុន​ចំនួន​មួយ​នៅ​មុន​ការ​ដេញ​ដោល​មតិ​មួយជាមួយ​នឹង​គូប្រជែង​ដែល​ជា​សមាជិក​ខាង​គណបក្ស​ប្រជាធិបតេយ្យ​ម្នាក់​ រយៈ​ពេល​ប៉ុន្មាន​ខែ​មុន​ពេល​ការ​បោះឆ្នោត​ជាតិ​ដែល​លោក​ស្រី​បាន​ចាញ់​លោក ត្រាំ៕

XS
SM
MD
LG