ប្រធានាធិបតីសហរដ្ឋអាមេរិក លោក Donald Trump កាលពីថ្ងៃអង្គារ បានសម្តែងនូវក្តីបារម្ភជាថ្មីរបស់លោកដែលថា សហរដ្ឋអាមេរិកកំពុងធ្វើតេស្តច្រើនពេកដើម្បីរកមើលអ្នកឆ្លងវីរុសដែលបង្កជំងឺកូវីដ១៩។
លោកត្រាំបានសរសេរសារនៅក្នុងបណ្តាញ Twitter ថា៖ «ចំនួនករណីឆ្លងនៅសហរដ្ឋអាមេរិកមានការកើនយ៉ាងខ្លាំងដោយសារយើងកំពុងធ្វើតេស្តច្រើនជាងប្រទេសផ្សេងណាទាំងអស់ ហើយកាន់តែពង្រីកការធ្វើតេស្តនេះ»។ លោកបន្តថា៖ «ប្រសិនបើយើងធ្វើតេស្តតិចជាងមុនក៏នឹងឃើញករណីឆ្លងតិចជាងមុនដែរ»។
កន្លងមក លោកប្រធានាធិបតីនិងក្រុមមន្ត្រីអាមេរិកអះអាងថា មកដល់ពេលនេះសហរដ្ឋអាមេរិកបានធ្វើតេស្តលើពលរដ្ឋចំនួន២៥លាននាក់។ មន្ត្រីសេតវិមានកន្លងមកក៏បានអះអាងថា ការទទូចរបស់លោកត្រាំឲ្យមានការធ្វើតេស្តតិចជាងមុននេះគឺគ្រាន់តែជាសម្តីលេងសើចរបស់លោកប៉ុណ្ណោះ។ ប៉ុន្តែកាលពីថ្ងៃអង្គារ លោកត្រាំថាលោកមិនបាននិយាយលេងសើចចំពោះរឿងនេះទេ។
សហរដ្ឋអាមេរិកកំពុងនាំមុខពិភពលោកខាងរាលដាលជំងឺកូវីដ១៩ ដោយមានចំនួនអ្នករកឃើញថា បានឆ្លងវីរុសកូរ៉ូណាចំនួនជាង២,៣លាននាក់ និងអ្នកស្លាប់ពីមេរោគដ៏ប្រល័យនេះចំនួនជាង១២០.០០០នាក់។ អ្នកជំនាញអាមេរិកាំងតែងអះអាងថា គន្លឹះមួយក្នុងការគ្រប់គ្រងការផ្ទុះរាតត្បាតនៃជំងឺនេះគឺការធ្វើតេស្តលើពលរដ្ឋឲ្យបានច្រើនបំផុតតាមដែលអាចធ្វើទៅបាន ហើយប្រសិនបើជនណាម្នាក់ត្រូវរកឃើញថាមានជំងឺកូវីដ១៩ នោះត្រូវតាមធ្វើតេស្តបន្តចំពោះអ្នកដែលជននោះបានទាក់ទងផ្ទាល់ជាមួយ។
ប៉ុន្តែនៅក្នុងបរិបទនយោបាយអាមេរិក លោកដូណាល់ ត្រាំ ហាក់កាន់តែមានការបារម្ភចំពោះចំនួនកើនឡើងច្រើននៃករណីឆ្លងជំងឺកូវីដ១៩នៅសហរដ្ឋអាមេរិកនៅមុនការបោះឆ្នោតក្នុងខែវិច្ឆិកាខាងមុខ។ និន្នាការនេះគឺខុសពីការទស្សន៍ទាយរបស់លោកដែលថា ជំងឺរាតត្បាតនេះនឹងធ្លាក់ចុះវិញឬបាត់ទៅវិញទាំងស្រុងនោះ។ ការស្ទង់មតិបង្ហាញថា ប្រជាប្រិយភាពរបស់លោកត្រាំបានធ្លាក់ចុះ តិចជាងគូប្រជែងរបស់លោកគឺលោក Joe Biden អតីតអនុប្រធានាធិបតីដែលទំនងក្លាយជាបេក្ខជនប្រធានាធិបតីពីគណបក្សប្រជាធិបតេយ្យ។
នៅក្នុងថ្ងៃអង្គារដែរ មន្ត្រីជំនាញខាងសុខភាពសាធារណៈកំពូលៗ រួមទាំងលោក វេជ្ជបណ្ឌិត Anthony Fauci អ្នកជំនាញនាំមុខខាងជំងឺឆ្លង និងលោកវេជ្ជបណ្ឌិត Robert Redfield ប្រធានមជ្ឈមណ្ឌលប្រយុទ្ធប្រឆាំងនឹងជំងឺឆ្លង CDC របស់សហរដ្ឋអាមេរិក នឹងផ្តល់សក្ខីកម្មនៅចំពោះមុខគណៈកម្មការមួយរបស់រដ្ឋសភាសហរដ្ឋអាមេរិកអំពីរបៀបឆ្លើយតបរបស់រដ្ឋបាលលោកប្រធានាធិបតី ដូណាល់ ត្រាំ ចំពោះការកើនឡើងកាន់តែខ្លាំងនៃចំនួនករណីឆ្លងវីរុសកូរ៉ូណានិងចំនួនអ្នកត្រូវចូលសម្រាកព្យាបាលក្នុងមន្ទីរពេទ្យ៕
