ប្រធានាធិបតីសហរដ្ឋអាមេរិកលោក Donald Trump ធ្វើដំណើរទៅកាន់ក្រុង Kenosha រដ្ឋWisconsin នៅថ្ងៃអង្គារ ដែលនៅទីនោះ អ្នកតវ៉ាប្រឆាំងជាច្រើននាក់ បានបង្កអំពើហិង្សា កាលពីសប្តាហ៍មុន បន្ទាប់ពីមន្ត្រីប៉ូលិសស្បែកសម្នាក់ បានបាញ់ទៅលើបុរសស្បែកខ្មៅឈ្មោះ Jacob Blake ចំនួន ៧ គ្រាប់ ចំលើខ្នងរបស់បុរសនោះ នៅពេលដែលមន្ត្រីប៉ូលិសទាំងនោះ ព្យាយាមចាប់បុរសរូបនោះ។
លោក ត្រាំ បាននិយាយនៅថ្ងៃចន្ទថា លោកមិនមានគម្រោងជួបជាមួយក្រុមគ្រួសារជនរងគ្រោះនោះទេ ដោយសារតែពួកគេចង់ឲ្យមេធាវីចូលរួមជាមួយដែរ។
លោក ត្រាំ ក៏មិនបានរិះគន់ដល់អំពើរបស់ក្មេងជំទង់ស្បែកសម្នាក់ឈ្មោះ Kyle Rittenhouse ដែលត្រូវបានចោទប្រកាន់ថា បានបាញ់សម្លាប់មនុស្ស ២ នាក់ និងធ្វើឲ្យមនុស្សម្នាក់ផ្សេងទៀតរងរបួស ក្នុងពេលដែលមានការធ្វើបាតុកម្មតវ៉ាតាមដងផ្លូវក្នុងទីក្រុង Kenosha បន្ទាប់ពីមានការបាញ់លោក Blake រួចមក។ ក្មេងជំទង់ស្បែកស Rittenhouse អះអាងថា ខ្លួនធ្វើការបាញ់ប្រហារ ក្នុងបំណងការពារហាងជំនួញតែប៉ុណ្ណោះ។ យុវជនរូបនេះទទួលរងការចោទប្រកាន់បទឧក្រិដ្ឋចំនួន ៥ ដែលក្នុងនោះរួមបទមនុស្សឃាតដោយចេតនា ក្នុងកម្រិតទី១។
លោក ត្រាំ បានថ្លែងប្រាប់អ្នកសារព័ត៌មានថា ក្រុមបាតុករបានធ្វើការវាយប្រហារមកលើយុវជនរូបនោះ។ លោកបន្តថា យុវជនរូបនោះប្រហែលជាត្រូវក្រុមបាតុករសម្លាប់ ប្រសិនបើគាត់មិនបាញ់ទៅលើក្រុមបាតុករនោះទេ។
អភិបាលរដ្ឋ Wisconsin លោក Tony Evers បានស្នើកុំឲ្យលោកប្រធានាធិបតីមកធ្វើទស្សនកិច្ចក្នុងទីក្រុង Kenosha ក្នុងថ្ងៃអង្គារនេះ ព្រោះដំណើរទស្សនកិច្ចរបស់លោក ត្រាំ នៅពេលនេះ នឹងបង្អាក់នូវភាពធូរស្រាលឡើងវិញរបស់ទីក្រុងនេះ។ លោក Tony Evers ថ្លែងថា លោកមានការបារម្ភ ព្រោះវត្តមានរបស់លោក ត្រាំ នឹងពន្យារពេលនៃការផ្សះផ្សារ ការបែកបាក់ និងការួបរួមគ្នាតែប៉ុណ្ណោះ។
ដំណើរទស្សនកិច្ចរបស់លោក ត្រាំ ទៅកាន់រដ្ឋ Wisconsin កើតមានឡើង បន្ទាប់ពីរូបលោកនិងគូប្រជែងក្នុងការបោះឆ្នោតរបស់លោក គឺអតីតអនុប្រធានាធីបតីលោក Joe Biden បានចោទប្រកាន់គ្នាទៅវិញទៅមកពីបញ្ហាសន្តិសុខ និងព័ណ៌នាជីវិតរបស់ពលរដ្ឋអាមេរិកកាំង ក្រោមការដឹកនាំរបស់បេក្ខជនម្ខាងទៀតថា នឹងមិនមានសុវត្ថិភាពនោះទេ៕
