ប្រធានាធិបតីសហរដ្ឋអាមេរិក លោក ដូណាល់ ត្រាំ កាលពីថ្ងៃចន្ទបានគ្រោងនឹងកាត់ទំហំផ្ទៃដីរបស់ឧទ្យាជាតិធំៗចំនួនពីរស្ថិតនៅប៉ែកខាងលិចនៃ រដ្ឋUtah ដោយលោកបានថ្កោលទោសនូវអ្វីដែលលោកពណ៌នាថាជាការរំលោភយកដីសហព័ន្ធដោយរដ្ឋាភិបាល។
លោក ត្រាំបានធ្វើដំណើរទៅកាន់ទីក្រុង Salt Lake ក្នុងរដ្ឋUtah ដើម្បីធ្វើការប្រកាសដកចេញនូវបទបញ្ជានានាដែលបានចុះហត្ថលេខាដោយអតីតប្រធានាធិបតីពីរ
រូបពីខាងគណបក្សប្រជាធិបតេយ្យ គឺលោក Bill Clinton និងលោក Barack Obama ដែលបានបង្កើតឧទ្យានជាតិ Bears Ears National Monument ដែលមានផ្ទៃដី៥សែន២ម៉ឺន៦ពាន់ហិកតា និងឧទ្យានជាតិ Grand Staircase-Escalante National Monument ដែលមានផ្ទែដី៧សែន៦ម៉ឺន៩ពាន់ហិចតា។
បទបញ្ជារបស់លោក ត្រាំ នឹងកាត់បន្ថយទំហំឧទ្យាជាតិ Bears Ears ចំនួន៨៥ភាគរយ និងកាត់បន្ថយទំហំឧទ្យានជាតិ Grand Staircase ចំនួនពាក់កណ្តាល ប៉ុន្តែត្រូវតែទទួលបានការផ្តល់សច្ចានុមតិពីសភាជាមុនសិន។ លោក ត្រាំមានបំណងអភិវឌ្ឍឧទ្យានជាតិទាំងនេះបន្ថែមទៀត ដោយរួមទាំងការខួងយករ៉ែ និងការចិញ្ចឹមគោនៅលើវាលស្មៅក្នុងឧទ្យាននេះផងដែរ។
ខណៈធ្វើដំណើរចាកចេញពីរដ្ឋធានី វ៉ាស៊ីតោន លោក ត្រាំបានថ្លែងថា៖ «យើងនឹងធ្វើអ្វីៗគ្រប់យ៉ាងដែលរដ្ឋ Utah និងរដ្ឋផ្សេងៗទៀតចង់បានជាច្រើនឆ្នាំមកហើយ។ វានឹងក្លាយទៅជារឿងដ៏អស្ចារ្យមួយក្នុងចំណោមរឿងដ៏អស្ចារ្យនានា នៅក្នុងប្រទេសនេះអស់រយៈពេលជាយូរមកហើយ។ ការណ៍នេះមានសារៈសំខាន់ណាស់សម្រាប់សិទ្ធិរបស់រដ្ឋ និងសារៈសំខាន់សម្រាប់ពលរដ្ឋទាំងអស់ក្នុងរដ្ឋUtah»។
ក៏ប៉ុន្តែភ្លាមៗនោះ ពលរដ្ឋជនជាតិដើមអាមេរិកាំង និងក្រុមអ្នកបរិស្ថានបានប្តេជ្ញាថា នឹងដាក់ពាក្យបណ្តឹងដើម្បីរារាំងបទបញ្ជារបស់លោក ត្រាំ ដោយពួកគេនិយាយថា ការកំណត់ឲ្យឧទ្យានជាតិមានទំហំធំ ចាំបាច់ត្រូវតែរក្សាទុកដដែល ដើម្បីការពារសត្វព្រៃ ទីកន្លែងពិសិដ្ឋ និងវត្ថុបុរាណដែលមានអាយុកាលរាប់សតវត្សរ៍ជាដើម៕
