ប្រធានាធិបតីសហរដ្ឋអាមេរិកលោកដូណាល់ ត្រាំ បានជំទាស់ប្រឆាំងជាយូរយារណាស់មកហើយដល់សកលភាវូបនីយកម្មនិយម និងពហុភាគីនិយមដែលជាគ្រឹះរបស់អង្គការសហប្រជាជាតិ។ ទោះជាយ៉ាងណាក៏ដោយ ក្នុងឋានៈជាមេដឹកនាំរបស់ប្រទេសដែលធ្វើជាម្ចាស់ផ្ទះអង្គការពិភពលោកនេះ លោកប្រធានាធិបតី ត្រាំ តម្រូវចូលរួមហើយថ្លែងទៅកាន់មហាសន្និបាតរបស់អង្គការសហប្រជាជាតិជារៀងរាល់ឆ្នាំដែលលោកនឹងធ្វើសុន្ទរកថាលើកទី៣នៅថ្ងៃអង្គារនេះ។
ក្នុងអំឡុងនៃការថ្លែងសុន្ទរកថា លោកប្រធានាធិបតីសហរដ្ឋអាមេរិក ត្រូវបញ្ជាក់ពីការដឹកនាំរបស់អាមេរិក ហើយនិងបញ្ជាក់ថា អាមេរិក ជាជម្រើសវិជ្ជមានមួយជំនួសរបបផ្តាច់ការ។ នេះតាមការបញ្ជាក់របស់មន្រ្តីរដ្ឋបាលរបស់ប្រធានាធិបតីត្រាំ។
ក្នុងអំឡុងនៃការថ្លែងសុន្ទរកថាកាលពីឆ្នាំទៅៗកាន់មហាសន្និបាតអង្គការសហប្រជា ជាតិ លោកប្រធានាធិបតីត្រាំ បានធ្វើឲ្យមានការសើចនៅពេលដែលលោកសរសើរថា រដ្ឋបាលរបស់លោក បានសម្រេចច្រើនជាងរដ្ឋបាលអាមេរិកមុនៗនៅក្នុងប្រវត្តិសាស្រ្តរបស់សហរដ្ឋអាមេរិក។
ក្នុងការស្ទង់មតិ អតីតឯកអគ្គរដ្ឋទូត និងក្រុមមន្រ្តីសន្តិសុខជាតិកំពូលៗរបស់អាមេរិកមកពីរដ្ឋបាលទាំងខាងគណបក្សប្រជាធិបតេយ្យនិងសាធារណរដ្ឋ បាននិយាយថា ពួកគេជឿថា ឥទ្ធិពលរបស់អាមេរិកនៅលើឆាកអន្តរជាតិ បានធ្លាក់ចុះក្នុងអំឡុងនៃការកាន់អំណាចរបស់ប្រធានាធិបតីត្រាំ ខណៈដែលគូសត្រូវរបស់អាមេរិកកាន់តែខ្លាំងឡើង។
នៅសប្តាហ៍នេះ លោកប្រធានាធិបតីអាមេរិកដូណាល់ ត្រាំ ក៏ធ្វើការជួបមួយទល់នឹងមួយជាមួយប្រមុខរដ្ឋាភិបាលផ្សេងទៀត ហើយនឹងចូលរួមពិធីខាងការទូតយ៉ាងតិចណាស់ក៏មួយដែរ ហើយនិងទទួលទានអាហារថ្ងៃត្រង់ដែលរៀបចំឡើងដោយលោក Antonio Guterres អគ្គលេខាធិការអង្គការសហប្រជាជាតិ៕
