ប្រធានាធិបតីសហរដ្ឋអាមេរិកលោក ដូណាល់ ត្រាំ បានទស្សន៍ទាយថា អាចមានថ្នាំវ៉ាក់សាំងការពារជំងឺកូវីដ១៩ នៅពេលបោះឆ្នោតនៅឆ្នាំនេះ ដែលនៅមិនដល់៩០ថ្ងៃទៀតផង។
លោកប្រធានាធិបតី ត្រាំ បានប្រាប់ពួកអ្នកយកព័ត៌មាននៅសេតវិមានកាលពីថ្ងៃព្រហស្បតិ៍ថា៖ «ខ្ញុំមានសុទិដ្ឋិនិយមថា អាចនឹងមានថ្នាំវ៉ាក់សាំងហើយនៅពេលនោះ»។
លោកប្រធានាធិបតីបានទទួលស្គាល់ថា៖ «ការមានវ៉ាក់សាំងមុនថ្ងៃបោះឆ្នោតទី៣វិច្ឆិកានេះ នឹងមិនធ្វើឲ្យខូចខាតដល់ឱកាសនៃការជាប់ឆ្នោតម្តងទៀតរបស់លោកទេ»។
លោកថ្លែងទៀតថា៖ «ខ្ញុំមិនមែនធ្វើដើម្បីសន្លឹកឆ្នោតទេ។ ខ្ញុំចង់ឲ្យមានវ៉ាក់សាំងឆាប់ ពីព្រោះខ្ញុំចង់សង្គ្រោះជីវិតមនុស្សជាច្រើន»។
ក្រោយមកទៀត នៅពេលធ្វើកំណត់សម្គាល់នៅរោងចក្រផលិតម៉ាស៊ីនបោកខោអាវ ក្នុងរដ្ឋ Ohio លោកប្រធានាធិបតី ត្រាំ បាននិយាយឡើងវិញថា នឹងមានថ្នាំវ៉ាក់សាំងនៅពេលឆាប់ៗនេះ។
សហគមន៍អ្នកវិទ្យាសាស្ត្រ រួមមានពួកអ្នកជំនាញជំងឺឆ្លងល្បីៗដូចជា វេជ្ជបណ្ឌិត Anthony Fauci ដែលជាសមាជិករបស់ក្រុមការងារមេរោគកូរ៉ូណារបស់សេតវិមានមិន រំពឹងថា នឹងមានវ៉ាក់សាំងដែលកំពុងសាកល្បងលើមនុស្សនៅពេលឥឡូវនេះ មុនចុងឆ្នាំនេះឬដើមឆ្នាំ២០២១ទេ។
លោកប្រធានាធិបតី ត្រាំ កាលពីថ្ងៃព្រហស្បតិ៍បាននិយាយអំពីវ៉ាក់សាំងនិងការព្យា បាលអ្នកជំងឺកូវីដ១៩ក្នុងអំឡុងទស្សកិច្ចទៅកាន់រដ្ឋ Ohio ដែលជារដ្ឋដ៏សំខាន់មួយដែលមិនគាំទ្រគណបក្សណាឲ្យបានទៀងទាត់នោះ។ ការស្ទង់មតិបង្ហាញថា នៅរដ្ឋនេះ លោកបានទទួលការគាំទ្រស្មើគ្នានឹងលោក Joe Biden ដែលគេរំពឹងថានឹងទទួលការតែងតាំងជាបេក្ខជនប្រធានាធិបតីខាងគណបក្សប្រជាធិបតេយ្យ។
លោកប្រធានាធិបតី ត្រាំ បានថ្លែងទៅកាន់ក្រុមអ្នកគាំទ្រនៅពេលទៅដល់ទីក្រុង Cleveland កាលពីថ្ងៃព្រហស្បតិ៍ថា៖ «យើងនឹងឈ្នះកាន់តែខ្លាំងឡើងនៅក្នុងរដ្ឋ Ohio ជាងយើងឈ្នះកាលពី៤ឆ្នាំមុន»៕
