សមាជិកសភាខាងគណបក្សសាធារណរដ្ឋ និងគណបក្សប្រជាធិបតេយ្យមួយក្រុមកំពុងតែដាក់សម្ពាធរដ្ឋបាលរបស់លោកប្រធានាធិបតី Donald Trump ឲ្យបញ្ចេញប្រាក់ចំនួន ២០ លានដុល្លារ ដែលអនុម័តដោយរដ្ឋសភា ដើម្បីបង្កើនការទទួលបានសេវាអ៊ីនធឺណិតនៅទូទាំងពិភពលោក ជាពិសេសនៅតាមបណ្ដាប្រទេសផ្ដាច់ការ ដូចជាប្រទេសចិន និងប្រទេសអ៊ីរ៉ង់ជាដើម។
លោក Michael McCaul សមាជិកជាន់ខ្ពស់ខាងគណបក្សសាធារណរដ្ឋ នៃគណៈកម្មាធិការកិច្ចការបរទេស បានថ្លែងក្នុងសេចក្ដីថ្លែងការណ៍មួយថា៖ «មូលនិធិផ្គត់ផ្គង់អ៊ីនធឺណិត The Open Technology Fund ផ្ដល់នូវលទ្ធភាពទទួលបានសេវាអ៊ីនធឺណិតសម្រាប់ពលរដ្ឋរស់នៅក្រោមរបបគាបសង្កត់នានា។ តែជាអកុសល កម្មវិធីដ៏សំខាន់មួយនេះកំពុងតែប្រឈមនឹងការបិទ»។
សមាជិកព្រឹទ្ធសភានៃរដ្ឋ New Jersey លោក Robert Menendez ដែលជាសមាជិកខាងគណបក្សប្រជាធិបតេយ្យនៃគណៈកម្មាធិការកិច្ចការបរទេសនៅព្រឹទ្ធសភា បានហៅការបង្កកថវិកាសម្រាប់សហគ្រាសនេះ គឺជាកាដូសម្រាប់រដ្ឋាភិបាលគាបសង្កត់នានានៅក្នុងប្រទេសចិន អ៊ីរ៉ង់ និងនៅទីណាៗទាំងអស់»។ នេះបើយោងតាមកាសែត Washington Post។
ការឆ្លើយតបរបស់សមាជិកសភានេះត្រូវបានធ្វើឡើង បន្ទាប់ពីអ្នកស្រី Laura Cunningham នាយកប្រតិបត្តិស្ដីទីរបស់ Open Technology Fund ដែលមានទីស្នាក់ការនៅរដ្ឋធានីវ៉ាស៊ីនតោន បានចោទប្រកាន់ទីភ្នាក់ងារសហរដ្ឋអាមេរិកសម្រាប់ប្រព័ន្ធផ្សព្វផ្សាយសាកល ហៅកាត់ថា USAGM និងនាយកប្រតិបត្តិរបស់ទីភ្នាក់ងារនេះ គឺលោក Michael Pack ថាបានបង្ខំមូលនិធិ Open Technology Fund ឲ្យផ្អាកគម្រោងសេរីភាពអ៊ីនធឺណិតចំនួន ៤៩ ក្នុងចំណោមគម្រោងទាំង ៦០ របស់ខ្លួន។ គម្រោងទាំងនោះជួយដល់បញ្ហាសិទ្ធិមនុស្ស និងការតស៊ូមតិឲ្យគាំទ្រលទ្ធិប្រជាធិបតេយ្យ នៅក្នុងប្រទេសចំនួនប្រមាណ ២០០ ដោយសារតែបញ្ហាថវិកា។
ទីភ្នាក់ងារ USAGM បានឆ្លើយតបនឹងលិខិតរបស់អ្នកស្រី Cunningham នៅក្នុងសេចក្ដីថ្លែងការណ៍មួយទៅកាន់សំឡេងសហរដ្ឋអាមេរិក VOA ដោយមិនបានបញ្ជាក់ថាតើទីភ្នាក់ងារនេះមានគម្រោងនឹងបញ្ចេញថវិកានោះឬក៏អត់ទេ ប៉ុន្តែបានឲ្យដឹងថា «ការបង្កើនសេវាទទួលបានអ៊ីនធឺណិត និងការការពារសុវត្ថិភាពរបស់អ្នកកាសែត និងសកម្មជន គឺស្ថិតក្នុងចំណោមអាទិភាពចម្បងរបស់ទីភ្នាក់ងារ USAGM»។ សេចក្ដីថ្លែងការណ៍នោះក៏បានចោទប្រកាន់មូលនិធិ Open Technology Fund អំពីបញ្ហាសុវត្ថិភាព ដែលមិនបានបញ្ជាក់ឲ្យជាក់លាក់ ដែលអាចប៉ះពាល់ដល់បេសកកម្មរបស់ខ្លួន និងសុវត្ថិភាពរបស់អ្នកដែលធ្វើការដើម្បីបង្កើនការផ្ដល់សេវារបស់ពលរដ្ឋផងដែរ។
មូលនិធិ Open Technology Fund គឺជាស្ថាប័នមួយនៅក្រោមទីភ្នាក់ងារ USAGM ដែលផ្ដល់ថវិកាដោយរដ្ឋាភិបាលសហរដ្ឋអាមេរិក ដោយរួមទាំង VOA ដែលដឹកនាំដោយលោក Pack ផងដែរ។ លោក Pack ចូលកាន់តំណែងជានាយកប្រតិបត្តិទីភ្នាក់ងារ USAGM កាលពីខែមិថុនា ក្រោមការតែងតាំងរបស់លោកប្រធានាធិបតី Donald Trump៕
