កាលពីថ្ងៃសៅរ៍ម្សិលមិញ ប្រធានាធិបតីសហរដ្ឋអាមេរិកលោក Donald Trump បានចេញវិធានការឲ្យបន្តផ្ដល់ប្រាក់ជំនួយបាត់បង់ការងារ ដែលបានផុតកំណត់ពីរសប្ដាហ៍មកហើយ ដល់ពលរដ្ឋអាមេរិកាំងរាប់សិបលាននាក់ ដែលបានបាត់បង់ការងារធ្វើដោយសារវិបត្តិជំងឺកូវីដ១៩ និងលើកពេលដល់ការយកពន្ធលើប្រាក់បៀវត្សរ៍។
លោក Trump ចេញវិធានការដូច្នេះ បន្ទាប់ពីការចរចារបស់សេតវិមានជាមួយនឹងសភាអំពីកញ្ចប់ជំនួយថ្មីសម្រាប់វិបត្តិជំងឺកូវីដ១៩ បានបរាជ័យ។
ដោយសារការឆ្លង និងការស្លាប់ដោយសារជំងឺកូវីដ១៩ នៅក្នុងសហរដ្ឋអាមេរិក នៅតែបន្តកើនឡើង លោក Trump បានអំពាវនាវឲ្យមានការបន្ថែមប្រាក់ជំនួយសម្រាប់អ្នកបាត់បង់ការងារចំនួន ៤០០ ដុល្លារក្នុងមួយសប្ដាហ៍ ដែលតិចជាងកាលពីលើកមុនដែលមានចំនួន ៦០០ ដុល្លារក្នុងមួយសប្ដាហ៍។
លោក Trump បានបញ្ជាក់ដូច្នេះក្នុងសន្និសីទកាសែតនៅរមណីយដ្ឋានឯកជនរបស់លោកក្នុងក្រុង Bedminster រដ្ឋ New Jersey ដូច្នេះថា៖ «នេះគឺជាថវិកាដែលពួកគេត្រូវការ។ នេះគឺជាថវិកាដែលពួកគេចង់បាន។ នេះគឺជាថវិកាដែលផ្ដល់ការលើកទឹកចិត្តដល់ពួកគេឲ្យត្រឡប់ទៅធ្វើការវិញ»។
លោក Ron Wyden សមាជិកជាន់ខ្ពស់ខាងគណបក្សប្រជាធិបតេយ្យនៃគណៈកម្មាធិការហិរញ្ញវត្ថុនៃព្រឹទ្ធសភា បាននិយាយថា៖ «តាមរយៈការចេញបទបញ្ជានីតិប្រតិបត្តិខុសច្បាប់នេះ លោក Donald Trump កំពុងព្យាយាមបង្វែរអារម្មណ៍សាធារណជនកុំឲ្យផ្ដោតលើភាពបរាជ័យរបស់លោករឿងបន្ថែមពេលផ្ដល់ប្រាក់ជំនួយចំនួន ៦០០ ដុល្លារក្នុងមួយសប្ដាហ៍សម្រាប់អ្នកបាត់បង់ការងារធ្វើ»។
ជាងនេះទៀត លោក Trump បានផ្អាកការយកពន្ធលើប្រាក់បៀវត្សរ៍រហូតដល់ចុងឆ្នាំនេះសម្រាប់អ្នកធ្វើការណាដែលរកចំណូលបានតិចជាង ១ សែនដុល្លារក្នុងមួយឆ្នាំ។ ទោះជាយ៉ាងណាក៏ដោយ នៅទីបំផុត ពន្ធលើប្រាក់បៀវត្សរ៍ចំនួន ៧% នឹងត្រូវបង់ដដែល លុះត្រាតែសភាអនុម័តលើរឿងនេះ ប៉ុន្តែកន្លងមក គេឃើញមានការជំទាស់ពីគណបក្សទាំងពីរនៅសភាចំពោះរឿងនេះ។
លោក Wyden ថ្លែងថា៖ «ការកាត់ពន្ធបែបក្លែងក្លាយនេះ គឺជាការភ្ញាក់ផ្អើលដ៏ធំមួយចំពោះអ្នកធ្វើការដែលគិតថា ពួកគេទទួលបានប្រយោជន៍ពីការកាត់ពន្ធនេះ ដោយតាមការពិត វាគ្រាន់តែជាការពន្យារពេលបង់ពន្ធប៉ុណ្ណោះ។ នៅថ្ងៃខាងមុខ អ្នកធ្វើការទាំងនេះនឹងត្រូវបង់ពន្ធទាំងនេះឡើងវិញដដែល»។
ចំណុចចុងក្រោយមួយទៀត លោក Trump បាននិយាយថា លោកបន្ថែមពេលការពារអ្នកជួលផ្ទះ ដែលរងការគំរាមបណ្ដេញចេញដោយសារគ្មានប្រាក់បង់ថ្លៃផ្ទះ និងបានពន្យារពេលសងកម្ចីសម្រាប់និស្សិត ក៏ដូចជាមិនយកការប្រាក់លើកម្ចីដែលផ្ដល់ដោយរដ្ឋាភិបាលសហព័ន្ធផងដែរ៕
