ប្រធានាធិបតីសហរដ្ឋអាមេរិកលោក Donald Trump ដែលកំពុងប្រឈមនឹងការប្តឹង ចោទប្រកាន់ទម្លាក់ពីតំណែងនៅសប្តាហ៍នេះ បានឈ្លោះជាមួយនឹងសមាជិករដ្ឋសភាខាងគណបក្សប្រជាធិតេយ្យដែលបានចោទប្រកាន់លោកថាបានជាប់ពាក់ព័ន្ធនឹងបទព្រហ្មទណ្ឌជាច្រើនករណី នៅក្នុងអ្វីដែលពួកគណបក្សប្រជាធិបតេយ្យចោទថាលោកបានរំលោភអំណាចប្រធានាធិបតី។
លោក Trump បានសរសេររិះគន់នៅលើ Twitter ថា «ការចោទប្រកាន់ទម្លាក់លោកពីតំណែងប្រធានាធិបតីគឺជាល្បិចបោកបញ្ឆោតដ៏អស្ចារ្យមួយនៅក្នុងប្រវត្តិសាស្រ្តនយោបាយអាមេរិក។ បណ្តាញសារព័ត៌មានក្លែងក្លាយ និងគណបក្សប្រជាធិបតេយ្យដែលជាដៃគូរបស់ពួកគេ កំពុងធ្វើការល្មើសម៉ោងដើម្បីបញ្ចុះបញ្ចូលគណបក្សសាធារណរដ្ឋឲ្យគាំទ្រពួកគេ»។
រដ្ឋសភាដែលគ្រប់គ្រងដោយគណបក្សប្រជាធិបតេយ្យទំនងជានឹងបោះឆ្នោតចោទប្រកាន់លោក Trump នៅថ្ងៃពុធស្អែកនេះ ខណៈលោក Trump បានបង្ហោះសារឡើងវិញពីក្រុមអ្នកគាំទ្ររបស់គណបក្សសាធារណរដ្ឋដែលបានរិះគន់ការចោទប្រកាន់ប្រឆាំងនឹងរូបលោក។
លោក Trump ដែលជាប្រធានាធិបតីអាមេរិកទី៤៥ នឹងក្លាយជាមេដឹកនាំអាមេរិកទី៣ ដែលត្រូវបានប្តឹងចោទប្រកាន់ដកពីតំណែងនៅក្នុងប្រវត្តិសាស្រ្តអាមេរិករយៈពេល២៤៣ឆ្នាំមកនេះ បើទោះបីជាបទចោទប្រកាន់ទាំងនេះទំនងជានឹងមិនទទួលបាន ការអនុម័តពីព្រឹទ្ធសភាដែលគ្រប់គ្រងដោយគណបក្សសាធារណរដ្ឋដែលនឹងបើកសវនាការនៅខែក្រោយនេះយ៉ាងណាក៏ដោយ។
លោក Mitch McConnell មេដឹកនាំសំឡេងភាគច្រើនខាងគណបក្សសាធារណរដ្ឋ នៅព្រឹទ្ធសភាបានប្រាប់សារព័ត៌មាន Fox News កាលពីសប្តាហ៍មុនថា ឱកាសដែលប្រធានាធិបតីនឹងត្រូវបានដកចេញពីតំណែងគឺសូន្យភាគរយ៕
