ប្រធានាធិបតីសហរដ្ឋអាមេរិកលោក Donald Trump ដែលបានជួបជាមួយនឹងប្រធានាធិបតីហ្វាំងឡង់លោក Sauli Niinisto នៅឯសេតវិមានកាលពីថ្ងៃចន្ទម្សិលមិញ បាននិយាយថា សហរដ្ឋអាមេរិកមានការការពារយ៉ាងខ្លាំងក្លាចំពោះតំបន់សមុទ្របាល់ទិក ជាពិសេសពាក់ព័ន្ធនឹងទំនាក់ទំនងរបស់បណ្ដាប្រទេសនៅទ្វីបអឺរ៉ុបខាងជើងជាមួយនឹងប្រទេសរុស្ស៊ី។
លោក Trump បានថ្លែងនៅឯសន្និសីទរួមគ្នាមួយជាមួយនឹងប្រធានាធិបតីហ្វាំងឡង់យ៉ាងដូច្នេះថា៖ «សហរដ្ឋអាមេរិកការពារយ៉ាងខ្លាំងចំពោះតំបន់សមុទ្របាល់ទិក។ សហរដ្ឋអាមេរិកមានមិត្តភក្ដិល្អៗ និងទំនាក់ទំនងល្អៗនៅទីនោះ»។
លោក Trump បានបន្ថែមថា លោកជឿជាក់ថា ប្រទេសរុស្ស៊ីគោរពប្រទេសហ្វាំងឡង់ ហើយលោកសង្ឃឹមថា សហរដ្ឋអាមេរិកក៏នឹងមានទំនាក់ទំនងល្អជាមួយនឹងរុស្ស៊ីផងដែរ។
លោក Trump បានថ្លែងប្រាប់អ្នកសារព័ត៌មានថា៖ «ដូចដែលខ្ញុំធ្លាប់បាននិយាយអស់រយៈពេលជាច្រើនឆ្នាំមកហើយ ខ្ញុំសូមនិយាយឲ្យបានឭ និងច្បាស់ថា ខ្ញុំគិតថា វាជាការប្រសើរប្រសិនបើសហរដ្ឋអាមេរិកមានទំនាក់ទំនងយ៉ាងអស្ចារ្យ ឬក៏យ៉ាងហោចណាស់មានទំនាក់ទំនងល្អជាមួយនឹងរុស្ស៊ី»។
ប្រធានាធិបតីហ្វាំងឡង់លោក Niinisto បាននិយាយថា៖ «វត្តមានរបស់សហរដ្ឋអាមេរិក និងអង្គការអូតង់នៅក្នុងទ្វីបអឺរ៉ុប និងនៅក្នុងតំបន់សមុទ្របាល់ទិកគឺពិតជាមានសារៈសំខាន់ខ្លាំងណាស់ ហើយទំនាក់ទំនងនេះកំពុងតែមានភាពប្រសើរឡើងយ៉ាងឆាប់រហ័ស»។ លោកក៏បានបន្ថែមទៀតថា មាននូវវិធានការវិជ្ជមានតិចតួចត្រូវបានធ្វើឡើងដើម្បីឈានទៅដល់ការបើកឲ្យមានការចរចាឡើងវិញរវាងអង្គការអូតង់ និងប្រទេសរុស្ស៊ី។
មេដឹកនាំទាំងពីរក៏ពិភាក្សាគ្នាផងដែរអំពីអំពើភេរវកម្ម ហើយលោក Trump បាននិយាយថា សហរដ្ឋអាមេរិករួមសាមគ្គីជាមួយនឹងប្រទេសហ្វាំងឡង់ក្នុងការប្រយុទ្ធប្រឆាំងនឹងការគំរាមកំហែងភេរវកម្ម៕
