សហរដ្ឋអាមេរិក និងប្រទេសម៉ិកស៊ិកបានពិភាក្សាគ្នាបន្ថែមទៀតនៅថ្ងៃព្រហស្បតិ៍នេះអំពីគោលនយោបាយសម្រាប់ជនចំណាកស្រុក ស្របពេលដែលកាលបរិច្ឆេទកំណត់របស់សហរដ្ឋអាមេរិកនៅក្នុងការយកពន្ធគយលើទំនិញម៉ិកស៊ិកជិតចូលមកដល់ ប្រសិនបើប្រទេសម៉ិកស៊ិកមិនចាត់វិធានការបន្ថែមទៀតនៅក្នុងការគ្រប់គ្រងចំនួនជនចំណាកស្រុកដែលធ្វើដំណើរមកកាន់ព្រំដែននោះ។
ប្រសិនបើមិនសម្រេចបានកិច្ចព្រមព្រៀងណាមួយ ប្រធានាធិបតីសហរដ្ឋអាមេរិកលោក Donald Trump បានគំរាមថានឹងយកពន្ធគយចំនួន ៥ ភាគរយលើទំនិញនាំចូលពីប្រទេសម៉ិកស៊ិក ដែលនឹងចាប់ផ្ដើមពីថ្ងៃច័ន្ទសប្ដាហ៍ក្រោយនេះតទៅ ហើយការយកពន្ធគយនេះនឹងកើនឡើងជារៀងរាល់ខែរហូតដល់ចំនួន ២៥ ភាគរយនៅត្រឹមខែតុលាខាងមុខ។
លោក Trump បានសរសេរនៅលើ Twitter កាលពីថ្ងៃពុធម្សិលមិញដូច្នេះថា៖ «ការចរចាមានដំណើរវិវឌ្ឍទៅមុខ ប៉ុន្តែមិនទាន់គ្រប់គ្រាន់ទេ។ ប្រសិនបើសហរដ្ឋអាមេរិកយកពន្ធគយកាន់តែខ្ពស់ នោះក្រុមហ៊ុនកាន់តែច្រើននឹងត្រឡប់មកកាន់សហរដ្ឋអាមេរិកវិញ»។
រដ្ឋមន្ត្រីការបរទេសម៉ិកស៊ិកលោក Marcelo Ebrard ដែលជាអ្នកដឹកនាំក្រុមគណៈប្រតិភូចរចាខាងភាគីម៉ិកស៊ិកនៅក្នុងរដ្ឋធានីវ៉ាស៊ីនតោន សហរដ្ឋអាមេរិក ក្នុងសប្ដាហ៍នេះ បាននិយាយថា បន្ទាប់ពីការចរចាបានបញ្ចប់ទៅកាលពីថ្ងៃពុធម្សិលមិញ លោកនៅតែមានសុទិដ្ឋិនិយមថា ភាគីទាំងពីរនឹងឈានទៅដល់ការសម្រេចបាននូវកិច្ចព្រមព្រៀងមួយ។
លោក Marcelo Ebrard បានប្រាប់អ្នកកាសែតដូច្នេះថា៖ «អ្វីដែលយើងចង់បញ្ចៀសមិនឲ្យកើតឡើងនោះគឺផលប៉ះពាល់ដែលបណ្ដាលមកពីការយកពន្ធគយនេះលើសេដ្ឋកិច្ចរបស់ប្រទេសទាំងពីរ លើអ្នកប្រើប្រាស់ និងលើប្រជាជននៃប្រទេសទាំងពីរ»៕
