ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

តើទំនាក់ទំនង​រវាង​ចក្រភព​អង់គ្លេស​និង​អាមេរិក​នៅ​តែ​មាន​លក្ខណៈ​ពិសេស​ឬ​ទេ?


ម្ចាស់ក្សត្រី Queen Elizabeth II របស់​អង់គ្លេស​យាង​ទស្សនកិច្ច​ជាមួយ​នឹង​លោក​ប្រធានាធិបតី​អាមេរិក ដូណាល់ ត្រាំ នៅ​រាជវាំង Buckingham ក្នុង​ក្រុង​ឡុងដ៍ កាលពី​ថ្ងៃទី៣ ខែមិថុនា ឆ្នាំ២០១៩។

សម្ព័ន្ធភាព​ពិសេស​ជា​ប្រវត្តិសាស្ត្រ​រវាង​សហរដ្ឋអាមេរិក​ និង​ចក្រភព​អង់គ្លេស​ត្រូវគេ​រំពឹង​ថា​នឹង​មាន​ការ​យក​ចិត្តទុកដាក់​ខ្លាំង​នៅ​អំឡុង​ដំណើរ​ទស្សនកិច្ច​ជា​ផ្លូវ​រដ្ឋ​របស់​ប្រធានាធិបតី​សហរដ្ឋអាមេរិក​លោក Donald Trump ដែល​ទើប​​ទៅ​ដល់​ប្រទេស​អង់គ្លេស​នៅ​ថ្ងៃទី៣ខែ​មិថុនា​ម្សិលមិញ។

ខណៈ​ដំណើរ​ទស្សនកិច្ច​នេះ​ត្រូវ​បាន​គ្រោង​ធ្វើឡើង​ បញ្ហា​ចម្រូងចម្រាស​និង​បាតុកម្ម​នានាត្រូវបាន​ធ្វើ​ឡើង​ប្រឆាំង​ទៅ​នឹង​សេចក្តីថ្លែងការ​របស់​លោក Trump អំពី​បញ្ហា​នយោបាយ​របស់​អង់គ្លេស។ នៅ​ពេល​នេះ​តើ​ពលរដ្ឋ​អង់គ្លេស​យល់​យ៉ាងណា​ចំពោះ​ទំនាក់ទំនង​របស់​ពួកគេ​ជាមួយ​ជនជាតិ​អាមេរិកាំង?

ទីក្រុងឡុងដ៏​កំពុង​ទទួល​ស្វាគមន៍​ដំណើរ​ទស្សនកិច្ច​ផ្លូវរដ្ឋ​របស់​ប្រធានាធិបតី​សហរដ្ឋអាមេរិក​លោក Donald Trump ចាប់ផ្តើម​ពី​ថ្ងៃទី៣ ខែមិថុនា​ម្សិលមិញ។ យោង​តាម​ការស្ទង់មតិ​អំពី​ភាពចម្រូងចម្រាស​របស់​ពលរដ្ឋ​អង់គ្លេស​ប្រឆាំង​នឹងរូប​លោក​បង្ហាញ​ថា​ សាធារណជន​អង់គ្លេស​ភាគច្រើន​មិន​ស្វាគមន៍​វត្តមាន​របស់​លោក Trump ទេ។ ពលរដ្ឋ​អង់គ្លេស​មួយ​ចំនួន​យល់​ថា «ខ្ញុំ​គិត​ថា​លោក Trump​ ជា​មនុស្ស​អាក្រក់។ លោក​និយាយ​កុហក។ លោក​ជា​មនុស្ស​មាន​អត្តចរិត​មិន​ល្អ»។

«ហេតុអ្វី​បាន​ជា​គេ​បណ្តោយ​ឲ្យ​ប្រធានាធិបតី​ដែល​មាន​ចរិត​បែប​នេះ​ចូល​ធ្វើ​នយោបាយ? ខ្ញុំ​គិតថា​វា​គួរ​ឲ្យ​អស់​សំណើច​ណាស់»។

«វា​ជា​រឿង​សំខាន់​ដែល​លោក​មក​ទីនេះ​ដើម្បី​ពង្រឹងទំនាក់ទំនង​រវាង​អាមេរិក​និង​ចក្រ​ភព​អង់គ្លេស។ ប៉ុន្តែ​អ្វី​ដែល​សំខាន់​គឺ​ថា​អាមេរិក​និង​អង់គ្លេស​មាន​ទំនាក់ទំនង​យ៉ាងល្អ​ជាមួយ​គ្នា​ជា​យូរ​មក​ហើយ»។

លោក Trump បាន​រងការ​រិះគន់​យ៉ាងខ្លាំង​នៅពេល​លោក​បង្ហោះ​ឃ្លីប​វីដេអូ​ពី​ក្រុម​អង់គ្លេស​ស្តាំ​និយមជ្រុល​ដែល​ប្រឆាំង​នឹង​ពលរដ្ឋ​កាន់​សាសនា​ឥស្លាម​ និង​នៅពេល​ដែល​លោក​បាន​ចោទប្រកាន់​ទីភ្នាក់ងារ​ស៊ើបការ​សម្ងាត់​អង់គ្លេស​ថា​បាន​ធ្វើ​ចារកម្ម​នៅ​ក្នុង​យុទ្ធនាការ​ឃោសនា​បោះឆ្នោត​របស់​លោក។

ទោះ​ជា​យ៉ាងណាក្តី​ ក្រុម​មន្ត្រី​ចក្រភព​អង់គ្លេស​នៅ​តែ​អះអាង​ថា​ ប្រទេស​ទាំងពីរ​នៅ​តែមាន​ទំនាក់ទំនង​ពិសេស​ជាមួយ​គ្នា។ ការស្ទង់មតិ​នានា​បង្ហាញ​ថា​ ទំនាក់ទំនង​វប្បធម៌​រវាង​ប្រទេស​ទាំងពីរ​មាន​ភាពរឹងមាំ។ ពលរដ្ឋ​អង់គ្លេស​មួយ​ចំនួន​យល់ថា «ខ្ញុំ​មិន​ប្រាកដ​ទេ​ថាតើ​វា​នៅ​តែ​មាន​ភាពរឹងមាំ​នោះ។ ប៉ុន្តែ​ ខ្ញុំ​ពិត​ជា​មាន​អារម្មណ៍​ថា​ វា​នៅ​តែរឹងមាំ​ដដែល»។

«ប្រសិន​បើ​ប្រជាពលរដ្ឋ​ទូទៅ​ចង់​រក្សា​ឲ្យ​វា​នៅ​រឹងមាំ​ នោះ​វា​នៅ​តែ​រឹងមាំ​ ទោះបីជា​អ្នកណា​ឡើង​មក​កាន់​តំណែង​ក៏​ដោយ»។

«ខ្ញុំ​គិតថា​វប្បធម៌​គឺ​ជា​ទំនាក់ទំនង​មួយ​ក្នុង​ចំណោម​ទំនាក់ទំនង​ពីរបីទៀត​នៅក្នុង​ប្រវត្តិសាស្ត្រី​ទំនើប​ ដែល​នឹង​មិន​ទៅ​ណា។ ព្រោះ​ថា​យើង​បាន​ឆ្លងកាត់​ភាពខ្មៅ​ងងឹត និង​ពេល​វេលា​ល្អ​បំផុត​ជាមួយ​គ្នា»។

ទំនាក់ទំនង​ពិសេស​នេះ​គឺ​ជា​ពាក្យ​ដែល​ត្រូវ​បាន​បង្កើត​ឡើង​ដោយ​អតីត​នាយករដ្ឋ​មន្ត្រី​អង់គ្លេស​លោក Winston Churchill ក្រោយ​សង្គ្រាម​លោក​លើកទី២​ ដើម្បី​តំណាង​ឲ្យ​ទំនាក់ទំនង​យ៉ាង​ជិតស្និត​ខាង​ផ្នែកនយោបាយ​ វប្បធម៌​ សេដ្ឋកិច្ច ​យោធា​ និង​ទំនាក់​ទំនង​ទ្វេភាគី​ជា​ប្រវត្តិសាស្ត្រ​វាង​ប្រទេស​ទាំងពីរ។

លោក Charles Kupchan​ អ្នកស្រាវ​ជ្រាវ​ជាន់​ខ្ពស់​នៅ​ឯ​ក្រុមប្រឹក្សា​ទំនាក់ទំនង​ការបរទេស​បាន​និយាយ​ថា «បើ​យើង​ត្រឡប់​ទៅ​កាល​ពី​ចុង​សតវត្សទី១៩វិញ​ វា​ពិត​ជា​ជោគជ័យ​ផ្នែកទំនាក់ទំនងយ៉ាង​សំខាន់​នៅក្នុង​ប្រវត្តិសាស្ត្រ ​ដែល​សហរដ្ឋអាមេរិក​ និង​ចក្រភពអង់គ្លេស​បាន​ចង់​ភ្ជាប់​ជាមួយ​គ្នា​ចាប់តាំង​ពី​ពេល​នោះ​មក»។

ភាពស្និទ្ធស្នាល​នេះ​ពេលខ្លះ​ត្រូវ​បាន​ឆ្លុះបញ្ចាំង​តាមរយៈអតីត​មេដឹកនាំ​នៃ​ប្រទេស​ទាំងពីរ ​រួមទាំង​ទំនាក់ទំនង​កាល​ពី​ជំនាន់​លោក Reagan និង​លោកស្រី Thatcher លោក Obama និង​លោក Blair ក៏​ដូចជា​ជំនាន់​លោក Obama និងលោក Cameron ផង​ដែរ។ ប៉ុន្តែ​វា​ហាក់​ដូចជា​មាន​ភាពខុសគ្នា​រវាង​ទំនាក់ទំនង​រវាង​លោក Trump និង​នាយក​រដ្ឋមន្ត្រី​អង់គ្លេស​លោកស្រី Theresa May ជា​ពិសេស​បន្ទាប់​ពី​លោក Trump បាន​រិះគន់​លោកស្រី​ជា​សាធារណៈ ​ពាក់ព័ន្ធនឹង​ការងារ​របស់​លោកស្រី​ចំពោះការ​ចាក​ចេញ​របស់​អង់គ្លេស​ពី​សហភាព​អឺរ៉ុប។ ប៉ុន្តែ​ទោះ​ជា​យ៉ាងណា​ក៏ដោយ​វា​មិនមែន​សុទ្ធ​តែ​មក​ពី​មេដឹកទាំងអស់​នោះ​ទេ។

លោក Jacob Parakilas មក​ពី​វិទ្យាស្ថាន​ស្រាវជ្រាវ Chatham House បាន​ថ្លែង​ថា «វា​មាន​រឿងរ៉ាវ​ល្អៗ​ជាច្រើន​ទៀត​ ដែល​ធ្វើឲ្យ​នាក់ទំនង​រវាង​ប្រទេស​ទាំងពីរ​កាន់​តែ​មាន​ភាព​ជិតស្និទ្ធ​រួមមាន​ទំនាក់ទំនង​រវាង​ទីភ្នាក់ងារ​ស៊ើបការណ៍​សម្ងាត់​ ទំនាក់ទំនង​រវាង​ទីភ្នាក់ងារ​សន្តិសុខ​ ការធ្វើ​សមាហរណកម្ម​យោធា​ ការសិក្សា​របស់​សិស្ស​អង់គ្លេស​នៅ​តាម​សាកលវិទ្យាល័យ​នៅ​សហរដ្ឋអាមេរិក និង​ការសហការ​ផលិត​ខ្សែ​ភាពយន្ត​រវាង​ប្រទេសទាំងពីរ​ជាដើម។ ចំណុច​ទាំងអស់​នេះ​ហើយ​ដែល​ធ្វើ​ឲ្យ​ទំនាក់ទំនង​រវាង​ប្រទេស​ទាំងពីរ​កាន់​តែ​ពិសេស»។

មាន​បាតុកម្ម​ទ្រង់ទ្រាយ​ធំ​ដែល​ត្រូវ​បាន​គ្រោង​ធ្វើ​ជាច្រើន​ ដើម្បី​ប្រឆាំង​នឹង​ទស្សនកិច្ច​របស់​លោក Trump ​ទៅ​ប្រទេសអង់គ្លេស​លើកនេះ​ដូចកាល​ពី​ឆ្នាំ២០១៨។ ក្រុម​អ្នក​រៀបចំ​បាតុកម្ម​បាន​និយាយ​ថា​ពួកគេ​រំពឹង​ថា​នឹង​មាន​មនុស្ស​រាប់ម៉ឺននាក់​នឹង​ចូលរួម​ធ្វើ​បាតុកម្ម។ ប្រធានាធិបតី​អាមេរិក​ផ្សេងៗ​ទៀត​ក៏​ធ្លាប់​ត្រូវ​បាន​ទទួល​ស្វាគមន៍​ដោយ​មាន​ការ​ខឹង​សម្បារ​ពី​សំណាក់​ពលរដ្ឋ​អង់គ្លេស​ផងដែរ។

កាល​ពី​ឆ្នាំ១៩៨២ អតីត​ប្រធានាធិបតី​អាមេរិក​លោក Ronald Reagan បាន​ប្រឈម​នឹង​បាតុកម្ម​ប្រឆាំង​នឹង​ទស្សនកិច្ច​របស់​លោក​ បន្ទាប់​ពី​មាន​ការដាក់​ពង្រាយ​គ្រាប់ម៉ីស៊ីល​នៅ​ឯ​មូលដ្ឋាន​យោធា​នៅ​អង់គ្លេស។ អតីប្រធានាធិបតី​អាមេរិក​ លោក George W. Bush ក៏​ធ្លាប់​ប្រឈម​នឹង​បញ្ហា​ដូចគ្នា​នេះដែរ​ បន្ទាប់​ពី​មាន​ការវាយលុក​ចូល​ក្នុង​ប្រទេសអ៊ីរ៉ាក់​កាល​ពី​ឆ្នាំ២០០៣។ ដូច្នេះ​វា​មិនខុស​ពី​ទំនាក់ទំនង​ផ្សេងទៀត​ទេ​ ​ដែល​ពេល​ខ្លះ​មាន​ការ​ធ្លាក់ចុះ​ ហើយ​ពេល​ខ្លះ​ទៀត​មាន​ភាពប្រសើរឡើង៕

ប្រែសម្រួលដោយ ស៊ូ ពេជ្រចិន្តា

សេចក្តីរាយការណ៍ពិសេស

  • VOA Khmer Special Report Section

    សេចក្តីរាយការណ៍ពិសេស

XS
SM
MD
LG