ប្រធានាធិបតីជិតផុតអាណត្តិរបស់សហរដ្ឋអាមេរិក លោក Donald Trump និយាយថា លោកគិតថា រដ្ឋបាលថ្មីនឹង «ទទួលបានជោគជ័យដ៏អស្ចារ្យ» និងអះអាងថា លោកបានកសាងមូលដ្ឋានសម្រាប់ប្រធានាធិបតីបន្ទាប់រួចហើយ។
លោក Trump បានថ្លែងថា រដ្ឋបាលថ្មីមាន «មូលដ្ឋានសម្រាប់ធ្វើកិច្ចការដ៏អស្ចារ្យ»។ លោកបានថ្លែងសុន្ទរកថាក្នុងពិធីជូនដំណើរលោកនៅមូលដ្ឋានទ័ព Joint Base Andrews ក្នុងរដ្ឋ Maryland មុនលោកបានឡើងជិះយន្ដហោះសម្រាប់ដឹកប្រធានាធិបតី Air Force One ក្នុងដំណើរទៅកាន់រមណីយដ្ឋានរបស់លោកក្នុងរដ្ឋ Florida ពេលដែលអាណត្តិជាប្រធានាធិបតីរបស់លោកបញ្ចប់។
លោក Trump មិនបានលើកឡើងពីឈ្មោះប្រធានាធិបតីជាប់ឆ្នោតថ្មីគឺលោក Joe Biden ទេ ក្នុងអំឡុងពេលនៃការថ្លែងសុន្ទរកថារបស់លោក កាលពីព្រឹកថ្ងៃពុធនេះ។
លោក Trump បានថ្លែងទៅកាន់ក្រុមអ្នកគាំទ្ររបស់លោក ដែលកំពុងស្រែកហ៊ោថា លោកនឹងរង់ចាំមើល និងស្ដាប់ដំណឹងពីចម្ងាយ។ លោកបានសន្យាថា លោកនឹងត្រឡប់មកវិញ «ក្នុងតំណែងណាមួយ» ហើយលោកក៏បានជូនពរដល់ក្រុមអ្នកគាំទ្ររបស់លោកឲ្យជួបប្រទះតែ «រឿងល្អៗក្នុងជីវិត» ផងដែរ មុនពេលលោកនិងភរិយារបស់លោកឡើងជិះយន្ដហោះប្រធានាធិបតីនោះ។
លោក Trump ចង់ទៅដល់រដ្ឋ Florida មុនពេលដែលលោក Biden ក្លាយជាប្រធានាធិបតីសហរដ្ឋអាមេរិកនៅពេលថ្ងៃត្រង់៕
