នៅក្នុងវីដេអូជម្រាបលាមួយ ដែលបានចេញផ្សាយក្នុងថ្ងៃអង្គារ ជាថ្ងៃចុងក្រោយដែលលោកកាន់តំណែងជាប្រធានាធិបតីពេញមួយថ្ងៃ លោក Donald Trump បានធ្វើការបួងសួងនិងជូនពរសព្ទសាធុការដល់លោក Joe Biden អ្នកកាន់តំណែងជំនួសលោក ក៏ប៉ុន្តែមិនបាននិយាយចំឈ្មោះរបស់លោក Biden ទេ។
លោក Trump បាននិយាយនៅក្នុងវីដេអូដែលបានចុះផ្សាយនៅលើអនឡាញ ២០ ម៉ោងមុនពេលបញ្ចប់នៃការកាន់តំណែងរបស់លោកថា៖ «នៅសប្តាហ៍នេះ យើងប្រារព្ធពិធីស្បថចូលកាន់តំណែងរបស់រដ្ឋបាលថ្មីមួយ ហើយសូមបួងសួងឲ្យរដ្ឋបាលថ្មីបានសម្រេចជោគជ័យនៅក្នុងការរក្សាសុវត្ថិភាពនិងវិបុលភាពសម្រាប់សហរដ្ឋអាមេរិក។ យើងក៏សូមជូនពរពួកគេឲ្យមានសំណាងដែរ»។
ក្នុងសន្ទរកថាជិត២០នាទីដែលបានថតទុកកាលពីថ្ងៃច័ន្ទ លោក Trump បានសរសើរចំពោះរដ្ឋបាលលោកក្នុងការបង្កើតអ្វីដែលលោកបានហៅថា «សេដ្ឋកិច្ចដ៏អស្ចារ្យបំផុតនៅក្នុងប្រវត្តិសាស្ត្ររបស់ពិភពលោក»។ លោកក៏បាននិយាយដែរថា លោក«មានមោទនភាពយ៉ាងខ្លាំងដែលបានក្លាយជាប្រធានាធិបតីទី១ក្នុងប៉ុន្មានទសវត្សរ៍នេះដែលមិនបានចាប់ផ្តើមសង្គ្រាមថ្មីមួយទេ»។
នៅពេលដែលវីដេអូនោះបានចេញផ្សាយដោយសេតវិមានតាម Youtube យន្តហោះឯកជនរបស់ប្រធានាធិបតីជាប់ឆ្នោតលោក Joe Biden បានចុះចតនៅអាកាសយានដ្ឋានយោធា Joint Base Andrews នៅក្នុងរដ្ឋ Maryland ជាយរដ្ឋធានីវ៉ាស៊ីនតោន កាលពីល្ងាចថ្ងៃអង្គារ។ នៅទីនោះដែរ ក៏ជាកន្លែងដែលលោក Trump នឹងចូលរួមពិធីលាគ្នាចុងក្រោយនៅព្រឹកថ្ងៃពុធ ម៉ោងនៅរដ្ឋធានីវ៉ាស៊ីនតោនដែរ។ បន្ទាប់មក លោកប្រធានាធិបតី Trump នឹងជិះយន្តហោះប្រធានាធិបតី Air Force One ជាលើកចុងក្រោយទៅកាន់រដ្ឋ Florida៕
