បន្ទាប់ពីលោក Michael Cohen អតីតមេធាវីផ្ទាល់ខ្លួនរបស់ប្រធានាធិបតីអាមេរិកលោក Donald Trump បានប្រាប់គណៈកម្មាធិការរដ្ឋសភាត្រួតពិនិត្យកិច្ចការរដ្ឋាភិបាល ថាលោក Trump ជា«មនុស្សប្រកាន់ពូជសាសន៍ មនុស្សបោកប្រាស់ និងមនុស្សមិនស្មោះត្រង់» លោក Trump បាននិយាយនៅថ្ងៃព្រហស្បតិ៍នេះថា លោក Michael Cohen និយាយ «មិនត្រឹមត្រូវ» និង «និយាយកុហកច្រើន»។
ដោយថ្លែងនៅឯសន្និសីទព័ត៌មានក្នុងប្រទេសវៀតណាម បន្ទាប់ពីបានជួបជាមួយនឹងមេដឹកនាំកូរ៉េខាងជើងលោក Kim Jong Un មក លោក Trump បានបញ្ជាក់ថា គ្មានការឃុបឃិតណាមួយរវាងយុទ្ធនាការឃោសនាបោះឆ្នោតរបស់លោក និងរដ្ឋាភិបាលរុស្ស៊ី នៅក្នុងអំឡុងពេលបោះឆ្នោតប្រធានាធិបតីអាមេរិកឆ្នាំ ២០១៦ នោះទេ។
លោក Cohen បានបញ្ជាក់ប្រាប់គណៈកម្មាធិការរដ្ឋសភាត្រួតពិនិត្យកិច្ចការរដ្ឋាភិបាល កាលពីថ្ងៃពុធម្សិលមិញថា លោកគ្មានភស្តុតាងផ្ទាល់ណាមួយអំពីការឃុបឃិតនេះទេ ប៉ុន្តែលោកបាននិយាយថា លោកមាន «ការសង្ស័យ» អំពីរឿងនេះ។
លោក Trump បានបន្ថែមថា លោកសរសើរលោក Cohen ដែលមិននិយាយកុហករឿងឃុបឃិតណាមួយជាមួយនឹងរុស្ស៊ី។
លោក Trump និយាយដូច្នេះថា៖ «សំណួរចម្បងបំផុតគឺសំណួររឿងឃុបឃិត [ជាមួយនឹងរុស្ស៊ី] ហើយលោក Cohen បាននិយាយថា លោកមិនឃើញមានការឃុបឃិតណាមួយនោះទេ»។
លោក Trump បានវាយប្រហារដោយពាក្យសម្ដីលើការស៊ើបអង្កេតកំពុងតែបន្តអំពីទំនាក់ទំនងដែលអាចទៅរួចរវាងយុទ្ធនាការឃោសនាបោះឆ្នោតរបស់លោក និងរដ្ឋាភិបាលរុស្ស៊ី ដោយលោកបានហៅសវនាការរបស់គណៈកម្មការរដ្ឋសភាកាលពីថ្ងៃពុធម្សិលមិញនេះថាជារឿង «គួរឲ្យអៀនខ្មាស់»៕
