ប្រធានាធិបតីសហរដ្ឋអាមេរិកលោក Donald Trump បាននិយាយថា លោកជឿថា ឥឡូវនេះកូរ៉េខាងជើងត្រៀមខ្លួនរួចរាល់ហើយ «ដើម្បីកសាងសន្តិភាព»។ លោក Trumpថ្លែងដូច្នេះក្រោយពីមេដឹកនាំកូរ៉េខាងជើងលោក Kim Jong Un បានប្រកាសអំពីឆន្ទៈក្នុងការជួបជាមួយនឹងលោក។
លោក Trump បានថ្លែងនៅក្នុងពិធីជួបជុំនយោបាយមួយកាលពីយប់ថ្ងៃសៅរ៍ម្សិលមិញនៅឯអាគារផ្ទុកយន្តហោះមួយកន្លែងនៅតំបន់ភាគខាងលិចនៃរដ្ឋ Pennsylvania យ៉ាងដូច្នេះថា៖ «ខ្ញុំគិតថា វាដល់ពេល [ដែលមេដឹកនាំកូរ៉េខាងជើងត្រូវកសាងសន្តិភាព] ហើយ»។
ស្របពេលដែលការរៀបចំការពិភាក្សាទល់មុខគ្នារវាងមេដឹកនាំកូរ៉េខាងជើង និងមេដឹកនាំសហរដ្ឋអាមេរិកកំពុងតែដំណើរការ លោក Trump បានបញ្ជាក់ថា លោក Kim Jong Un គឺជា «មនុស្សម្នាក់ដែលគំរាមវាយប្រហារដោយគ្រាប់នុយក្លេអ៊ែរគ្រប់កន្លែងទាំងអស់» ប៉ុន្តែឥឡូវនេះ «លោកសម្រេចឈប់បាញ់គ្រាប់មីស៊ីល»។
លោក Trump បានបន្ថែមថា នៅពេលដែលខ្ញុំជួបជាមួយនឹងលោក Kim Jong Un «ខ្ញុំប្រហែលជាចាកចេញពីការប្រជុំនោះភ្លាមៗតែម្ដង ឬក៏ខ្ញុំ និងលោក Kim Jong Un ប្រហែលជាអាចអង្គុយចរចាគ្នាដើម្បីសម្រេចឲ្យបាននូវកិច្ចព្រមព្រៀងដ៏អស្ចារ្យមួយសម្រាប់ពិភពលោក»។
លោក Trump ថាលោកជាអ្នកធ្វើឲ្យដំណើរការប្រកួតកីឡាអូឡាំពិករដូវរងាដែលទើបបញ្ចប់ទៅនាពេលថ្មីៗនេះនៅក្នុងប្រទេសកូរ៉េខាងត្បូង ទទួលបានជោគជ័យ ដោយលោកបានបញ្ជាក់ថា ប្រសិនបើគ្មានកិច្ចប្រឹងប្រែងរបស់លោកនៅក្នុងការកាត់បន្ថយការគំរាមកំហែងនៃការវាយប្រហារនុយក្លេអ៊ែរនោះទេ នោះវា «នឹងក្លាយទៅជាការបរាជ័យទាំងស្រុង»៕
