ប្រធានាធិបតីអាមេរិក លោក ដូណាល់ ត្រាំ និយាយថា ការស្វែងរកប្រធាន FBI ថ្មី កំពុងតែប្រព្រឹត្តទៅយ៉ាងឆាប់រហ័ស បន្ទាប់ពីការសម្រេចចិត្តរបស់លោកកាលពីសប្តាហ៍មុន ក្នុងការបញ្ឈប់ការងាររបស់លោក James Comey ដែលជាអ្នកនាំមុខគេនៅក្នុងការស៊ើបអង្កេតទៅលើការជ្រៀតជ្រែករបស់រុស្ស៊ីទៅក្នុងការបោះឆ្នោតប្រធានាធិបតីកាលពីឆ្នាំមុន និងការជាប់ពាក់ព័ន្ធរវាងជំនួយការយុទ្ធនាការលោក ត្រាំ និងផលប្រយោជន៍របស់រដ្ឋាភិបាលក្រុងមូស្គូ។
លោក ត្រាំ មិនបានបញ្ជាក់នោះទេ នៅពេលដែលគេសួរអំពីបញ្ហានេះកាលពីថ្ងៃចន្ទ។
សមាជិកខាងគណបក្សប្រជាធិបតេយ្យដែលប្រឆាំងមួយចំនួនកំពុងតែលើកឡើងថា ពួកគេនឹងមិនអនុម័តទៅលើអ្នកបន្តវេនពីលោក Comey នោះទេ រហូតទាល់តែរដ្ឋអាជ្ញាពិសេសម្នាក់ ត្រូវបានតែងតាំងដើម្បីធ្វើការអង្កេតឯករាជ្យមួយទៅលើការជ្រៀតជ្រែករបស់រុស្ស៊ីនៅក្នុងការបោះឆ្នោតដែលមានគោលបំណងជួយដល់ជ័យជម្នះរបស់លោក ត្រាំ ទៅលើអតីតរដ្ឋមន្ត្រីការបរទេសលោកស្រី Hillary Clinton ខាងគណបក្សប្រជាធិបតេយ្យ។
ប៉ុន្តែអ្នកនាំពាក្យរបស់សេតវិមាន លោក Sean Spicer បានថ្លែងថា «មិនចាំបាច់ត្រូវការរដ្ឋអាជ្ញាពិសេសម្នាក់នោះទេ» ដោយសារតែការិយាល័យស៊ើបអង្កេតសហព័ន្ធដែលលោក Comey បានដឹកនាំ និងគណៈកម្មាធិការទាំងនៅក្នុងព្រឹទ្ធសភានិងសភាកំពុងតែស៊ើបអង្កេតទៅលើការជ្រៀតជ្រែករបស់រុស្ស៊ីហើយ។
រដ្ឋបាលរបស់លោក ត្រាំ បានសម្ភាសយ៉ាងហោចណាស់បេក្ខជនចំនួន៨នាក់សម្រាប់តំណែងកំពូល FBI ហើយលោក ត្រាំ បាននិយាយថា សេចក្តីសម្រេចចិត្តមួយអាចនឹងធ្វើឡើងនៅមុនពេលលោកចាកចេញនៅថ្ងៃសុក្រនេះ សម្រាប់ដំណើរទស្សនកិច្ចទៅបរទេសជាលើកដំបូងរបស់លោក ក្នុងនាមជាប្រធានាធិបតីអាមេរិក៕
