ភ្ជាប់​ទៅ​គេហទំព័រ​ទាក់ទង

ទីប្រឹក្សា​សន្តិសុខ​ជាតិដែល​ទើប​បាន​ជ្រើស​រើស​របស់​ប្រធានាធិបតី​ត្រាំ​ជា​អគ្គមេបញ្ជាការ​កងទ័ព​ជើង​ទឹក​ដែល​គេ​គោរព


លោក​ឧត្តមនាវី​រង​ Robert Harward ថ្លែង​ទៅ​កាន់​មន្រ្តី​អាហ្វហ្គានីស្ថាន​ក្នុង​ពេល​ទស្សនកិច្ច​របស់​លោក​ទៅ​កាន់​ក្រុង Zaranj ប្រទេស​អាហ្វហ្គានីស្ថាន កាលពី​ថ្ងៃទី៦ ខែមករា ឆ្នាំ២០១១។

លោក​ឧត្តមនាវី​រង​ Robert Harward ជា​មនុស្ស​ម្នាក់ដែល​ត្រូវ​បាន​គេ​រាយការណ៍​ថា ជា​ជម្រើស​របស់​លោក​ប្រធានាធិបតី​ត្រាំ​ដើម្បី​ជំនួស​ទីប្រឹក្សា​សន្តិសុខ​ដែល​បាន​បណ្តេញ​ចេញ​ពី​តំណែង។ លោក​ជា​អតីតទាហាន​ពិសេស Navy SEAL ​ដែល​បាន​សិក្សា​នៅ​វិទ្យាល័យ​ក្នុង​ប្រទេស​អ៊ីរ៉ង់ ​ហើយនិយាយ​ភាសា​ Farsi យ៉ាង​រលូន​ដែល​ជា​ភាសា​ផ្លូវ​ការ​របស់​អ៊ីរ៉ង់។

លោក Harward ទទួល​បាន​ការ​គោរព​នៅ​ក្នុង​សហគមន៍​សន្តិសុខ​ជាតិ។​ លោក​មាន​ចំណង​ទាក់​ទង​ដ៏​ជិត​ស្និទ្ធ​ជាមួយ​លោក Jim Mattis រដ្ឋ​មន្រ្តី​ការពារ​ប្រទេស។​ អស់​លោក​បាន​ធ្វើ​ការ​ជាមួយ​គ្នា​ក្នុង​អំឡុង​នៃ​ពេល​ដែល​លោក Harward ​ធ្វើ​ជា​មេបញ្ជាការ​រង​របស់​ទី​បញ្ជា​កណ្តាល​ដែល​ត្រួតត្រា​កងទ័ព​សហរដ្ឋ​អាមេរិកនៅ​ក្នុង​តំបន់​មជ្ឈឹម​បូព៌ា។

លោក Harward មាន​អាយុ​៦០​ឆ្នាំ ​ដែល​បាន​ចូល​និវត្តន៍​ពី​យោធា​នៅ​ឆ្នាំ​២០១៣ បច្ចុប្បន្ន​នេះ​កំពុងធ្វើ​ការ​ជានាយក​ប្រតិបត្តិ​នៅក្រុមហ៊ុន Lockheed Martin ដែល​ជា​ក្រុមហ៊ុន​ផលិត​អាវុធ​ និង​យន្តហោះ​ដែល​នៅ​ទី​នោះ​លោក​ផ្តោត​លើ​ប្រទេស​អេមីរ៉ាត​អារ៉ាប់​រួម​ ឬ United Arab Emirates។

សេតវិមាន​មិន​បាន​ប្រកាស​ជា​សាធារណៈ​អំពី​ការ​តែងតាំង​លោក​ ឬ​ថា​តើ​លោក​សុខ​ចិត្ត​ទទួល​យក​តំណែង​នេះ​ដែលមិន​តម្រូវ​ឲ្យ​មានទទួលការ​យល់​ព្រម​ពី​ព្រឹទ្ធ​សភា​ទេ។

បើ​បាន​ទទួល​ការ​តែងតាំង ​លោក Harward នឹង​ជំនួស​លោក​ឧត្តមសេនីយ៍​ចូល​និវត្តន៍ Michael Flynn ​ដែល​បាន​ចាក​ចេញ​ពី​តំណែងរបស់​លោក​នៅ​សប្តាហ៍​នេះ​បន្ទាប់​ពី​បាន​បំភ័ណ្ឌ​ពួក​មន្រ្តី​នៅ​សេតវិមាន​អំពី​ការ​ទាក់​ទង​របស់​លោក​ជា​មួយ​ពួក​មន្រ្តី​រុស្ស៊ី​ក្នុង​អំឡុង​នៃ​អន្តរកាល​ប្រធានាធិបតី៕

XS
SM
MD
LG