នាយកប្រតិបត្តិ Fast Food លោក Andrew Puzder ដែលជាបេក្ខជនដែលលោកប្រធានាធិបតីអាមេរិក Donald Trump បានតែងតាំងសម្រាប់តំណែងរដ្ឋមន្ត្រីក្រសួងការងារ បានដកខ្លួនចេញពីការពិចារណាសម្រាប់តំណែងនេះកាលពីល្ងាចថ្ងៃពុធ មួយថ្ងៃមុនពេលបើកសវនាការតែងតាំងសម្រាប់តំណែងនេះ។
លោក Puzder គឺជាបេក្ខជនទីមួយរបស់លោក Trump ដែលបានដកខ្លួនចេញពីការពិចារណាសម្រាប់តំណែងថ្មីរបស់ខ្លួន ខណៈពេលដែលមានការព្រួយបារម្ភថា លោកមិនបានទទួលការគាំទ្រគ្រប់គ្រាន់ដើម្បីទទួលបានការតែងតាំងពីព្រឹទ្ធសភានោះទេ។
លោក Puzder ដែលជានាយកប្រតិបត្តិរបស់ក្រុមហ៊ុន CKE Restaurants Inc ដែលទទួលសិទ្ធិបន្តដើម្បីលក់ Fast Food ដែលរួមមានHardee's and Carl's Jr. បានស្ថិតនៅក្នុងភាពចម្រូងចម្រាស ការត្បូញត្អែរ និងស្ថានភាពដែលអាចនាំឲ្យមានជម្លោះ។
លោក Puzder បានប្រឈមនឹងការជំទាស់សម្រាប់តំណែងនេះ ដោយសារតែលោកមិនបានបង់ពន្ធរយៈពេល៥ឆ្នាំឲ្យទាន់ពេលវេលាទៅលើអតីតអ្នកមើលថែរក្សាផ្ទះសម្បែងម្នាក់ដែលមិនមានសិទ្ធិធ្វើការនៅក្នុងសហរដ្ឋអាមេរិក។ អ្នកនាំពាក្យរបស់លោក Puzder បាននិយាយថា លោកបានបង់ពន្ធភ្លាមៗបន្ទាប់ពីលោកដឹងថា លោកនៅជំពាក់ថ្លៃពន្ធ។ ប៉ុន្តែភាពមិនស្រុះស្រួលគ្នានៅតែជាបញ្ហានយោបាយកាន់តែរីកធំឡើង សម្រាប់សមាជិកគណបក្សសាធារណរដ្ឋ ដែលមានភាពតឹងតែងទៅលើអន្តោប្រវេសន៍ និងការបង់ពន្ធ។
នៅក្នុងសេចក្តីថ្លែងការណ៍របស់លោក លោក Puzder បាននិយាយថា «បន្ទាប់ពីការពិចារណា និងពិភាក្សាយ៉ាងប្រុងប្រយ័ត្នជាមួយនឹងក្រុមគ្រួសាររបស់ខ្ញុំ ខ្ញុំនឹងដកបេក្ខភាពរបស់ខ្ញុំសម្រាប់តំណែងជារដ្ឋមន្ត្រីក្រសួងការងារ»។ អ្នកនាំពាក្យសេតវិមាន លោក Sean Spicer បានបញ្ជាក់ថា ការដកបេក្ខភាពរបស់លោក Puzder គឺជារឿងពិតប្រាកដមែន៕
