ប៉ុន្តែអ្នកគាំទ្រខ្លាំងក្លារបស់លោក ត្រាំ នៅតែគាំទ្រលោកភាគច្រើនដដែល ហើយអ្នកទាំងនោះជាច្រើននាក់បានចូលរួមក្នុងយុទ្ធនាការជួបជុំអ្នកគាំទ្រមួយ កាលពីពេលថ្មីៗនៅក្នុងរដ្ឋ Iowa។
ដូចកាលពីពេលកន្លងទៅអញ្ចឹងដែរ សម្រាប់លោកប្រធានាធិបតី ដូណាល់ ត្រាំ ដែលបានរៀបចំយុទ្ធនាការជួបជុំ ក្រុមអ្នកគាំទ្រសំខាន់របស់លោកនៅក្នុងរដ្ឋ Iowa។
លោកប្រធានាធិបតី ត្រាំ បានថ្លែងថា៖ «វាតែងតែជារឿងល្អ ដែលអាចចាកចេញពីឆាកនយោបាយក្នុងរដ្ឋធានី Washington មកចំណាយពេលជាមួយពលរដ្ឋដែលសកម្មនឹងការងារ។ យើងហៅអ្នកទាំងនេះ ថាជាអ្នកស្នេហាជាតិ និងជាពលរដ្ឋដ៏អស្ចារ្យ»។
លោក ត្រាំ បានអួតថា រដ្ឋបាលរបស់លោក បានធ្វើឲ្យមាននូវអ្វីដែលលោកហៅថា «ការវិវត្តទៅមុខដ៏អស្ចារ្យ» ក្នុងអំឡុងពេលប្រាំខែដំបូងក្នុងសេតវិមាន និងបានផ្ដល់កិត្តិយសដល់អ្នកទាំងឡាយដែលបានធ្វើការជាមួយលោក ចាប់តាំងពីខែដំបូងដែលពោរពេញរឿងរ៉ាវមិនចេះចប់មិនចេះហើយ នៃអាណត្តិប្រធានាធិបតីរបស់លោក។
លោក ត្រាំ បន្តថា៖ «យើងបានធ្វើដំណើររួមគ្នា ដោយគ្មានអ្នកណាអាចធ្វើបាន នៅក្នុងប្រវត្តិសាស្ត្រប្រទេសនេះ។ យើងកំពុងកែប្រែខ្លាំងឡើងៗ តាមរយៈការវិនិច្ឆ័យ និងបេះដូងដ៏ល្អបរិសុទ្ធរបស់យើង។ យើងកំពុងធ្វើឲ្យប្រទេសរបស់យើងរឹងមាំ។ យើងកំពុងពង្រឹងប្រទេសរបស់យើង»។
ការជួបជុំអ្នកគាំទ្ររបស់លោក ត្រាំ ធ្វើឡើងមួយថ្ងៃបន្ទាប់ពីលោកស្រី Karen Handel បានផ្ដល់ឲ្យលោកប្រធានាធិបតី និងអ្នកគាំទ្រគណបក្សសាធារណរដ្ឋទូទៅ នូវជ័យជម្នះដ៏ពិសេស ដែលលោកស្រីទទួលបានក្នុងការបោះឆ្នោតក្នុងរដ្ឋ Georgia។
លោកស្រី Karen Handel សមាជិកសភាជាប់ឆ្នោតបាននិយាយថា៖ «សូមថ្លែងអំណរគុណយ៉ាងវិសេសវិសាលដល់លោកប្រធានាធិបតីសហរដ្ឋអាមេរិក»។
អ្នកគាំទ្រគណបក្សប្រជាធិបតេយ្យខកចិត្តនឹងបរាជ័យក្នុងរដ្ឋ Georgia ដោយបានសង្ឃឹមថា កំណើននៃចលនាប្រឆាំងនឹងលោក ត្រាំ អាចយកជ័យជម្នះក្នុងថ្ងៃនោះបាន។
ប៉ុន្តែអតីតបេក្ខជនប្រធានាធិបតី និងជាសមាជិកព្រឹទ្ធសភាប្រចាំរដ្ឋ Vermont លោក Bernie Sanders ថាលោក ត្រាំ នឹងនៅតែជាចំណុចផ្ដោតសំខាន់សម្រាប់គណបក្ស ដោយសារពួកគេសម្លឹងឆ្ពោះទៅការបោះឆ្នោតសភា នៅឆ្នាំក្រោយៗ ទៀត។
លោក Bernie Sander បាននិយាយថា៖ «ថ្ងៃនេះនៅក្នុងសេតវិមាន យើងប្រហែលជាមានប្រធានាធិបតីដែលអន់បំផុត និងគ្រោះថ្នាក់បំផុតនៅក្នុងប្រវត្តិសាស្ត្រប្រទេសរបស់យើង»។
គណបក្សប្រជាធិបតេយ្យបានចាញ់ការបោះឆ្នោតសំខាន់ប្រាំ ចាប់តាំងពីការស្បថចូលកាន់តំណែងរបស់លោក ត្រាំ មក ហើយនេះប្រហែលជាដល់ពេលដែលត្រូវធ្វើការវាយតម្លៃ និងកែប្រែចំណុចខ្វះខាត។ នេះបើយោងតាម អ្នកវិភាគមួយរូបគឺលោកស្រី Andra Gillespie។
លោកស្រី Andra Gillespie អ្នកវិភាគ មកពីសាកលវិទ្យាល័យ Emory បាននិយាយថា៖ «យ៉ាងណាក៏ដោយ ខ្ញុំគិតថា មានបញ្ហាច្រើន នៅក្នុងគណបក្សប្រជាធិបតេយ្យ។ ពួកគេ កំពុងព្យាយាមរកវិធីផ្សះផ្សាអ្នកកណ្ដាលនិយមរបស់ខ្លួន និងរកវិធីធ្វើឲ្យមូលដ្ឋានបក្សមានភាពប្រសើរឡើង ដូច្នេះហើយ ខ្ញុំរំពឹងថា នឹងមានការពិភាក្សាគ្នាដ៏តឹងតែងមួយ នៅក្នុងគណបក្សប្រជាធិបតេយ្យ»។
សម្រាប់លោកប្រធានាធិបតី បញ្ហាប្រឈមរបស់លោកនឹងត្រូវរំកិលទៅឲ្យផុតពីការស៊ើបអង្កេតលើរដ្ឋាភិបាលរុស្ស៊ី ហើយត្រឡប់មកផ្ដោតលើរបៀបវារៈដឹកនាំប្រទេសរបស់លោកវិញ។ នេះបើតាមសម្ដីរបស់លោក John Fortier នាយកមជ្ឈមណ្ឌលគោលនយោបាយគណបក្សទាំងពីរ។
លោក John បាននិយាយថា៖ «ខ្ញុំគិតថាវាពិបាក នៅពេលដែលមានព័ត៌មានជាបន្តបន្ទាប់ប្រឆាំងនឹងអ្នក ដើម្បីឲ្យអ្នកបញ្ឈប់វា។ ដូច្នេះ ការស្វែងរករឿងផ្សេងមកនិយាយ ដូចជា ផ្លាស់ប្ដូរបុគ្គលិក និងការគ្រោងធ្វើអ្វីជាក់លាក់ណាមួយ ដែលកើតចេញពីទស្សនៈនៃរដ្ឋបាលបច្ចុប្បន្ន ដែលពួកគេអាចអះអាងថាជាហេតុផលល្អមួយ ខ្ញុំគិតថាទាំងនោះគឺជាងរឿងដែលអាចជួយបាន។ ប៉ុន្តែមកដល់ចំណុចនេះ វាជាបញ្ហាសំខាន់ ហើយពួកគេត្រូវតែដោះស្រាយរឿងនេះមួយរយៈសិន»។
បញ្ហាប្រឈមធំបន្ទាប់របស់លោកប្រធានាធិបតី គឺការធ្វើយ៉ាងណាដើម្បីឲ្យរដ្ឋសភាអនុម័តច្បាប់ថែរក្សាសុខភាពថ្មី ដែលបច្ចុប្បន្នកំពុងស្ថិតក្នុងភាពមិនប្រាកដប្រជា៕
ប្រែសម្រួលដោយ សឿន វឌ្ឍនា
