នៅក្នុងផ្នែកភាគច្រើននៃសុន្ទរកថារបស់ប្រធានាធិបតីសហរដ្ឋអាមេរិកលោក Donald Trump ស្ដីអំពីស្ថានភាពរបស់សហរដ្ឋអាមេរិកកាលពីថ្ងៃអង្គារទី ៣០ ខែមករា កន្លងទៅនេះ លោកបានលើកឡើងអំពីការកែទម្រង់អន្តោប្រវេសន៍ដែលលោកចង់ឃើញ។
លោក Trump បានហៅគម្រោង ៤ ផ្នែករបស់លោក ថាជាគម្រោងមួយដែលអាចបង្កើត «ប្រព័ន្ធអន្តោប្រវេសន៍មួយដែលមានសុវត្ថិភាព ទំនើប និងត្រឹមត្រូវតាមច្បាប់»។ ចំណែកឯគណបក្សប្រជាធិបតេយ្យវិញ បានហៅគម្រោងរបស់លោក Trump នេះថាជាវិធីសាស្ត្រមួយដែលមានលក្ខណៈ«ប្រមាថមើលងាយ» និង «គ្មានធម៌មេត្តា»។
គម្រោងទីមួយនៃសំណើរបស់លោក Trump នេះ គឺការបង្កើតនូវដំណើរឆ្ពោះទៅកាន់ការទទួលបានសញ្ជាតិអាមេរិកាំងសម្រាប់ជនអន្តោប្រវេសន៍ជិត ២ លាននាក់ ដែលចូលមកក្នុងទឹកដីសហរដ្ឋអាមេរិកដោយខុសច្បាប់នៅពេលដែលពួកគេនៅជាកុមារ។
ក្នុងចំណោមជនអន្តោប្រវេសន៍ជិត ២ លាននាក់នេះ មនុស្សជិត ៨ សែននាក់ត្រូវបានការពារក្រោមកម្មវិធីវិធានការផ្អាកការបញ្ជូនចេញពីសហរដ្ឋអាមេរិកនូវជនអន្តោប្រវេសន៍ដែលចូលមកក្នុងសហរដ្ឋអាមេរិកដោយខុសច្បាប់តាំងពីនៅកុមារ ដែលហៅកាត់ថា DACA។ កម្មវិធីដែលត្រូវបានបង្កើតឡើងកាលពីសម័យលោក Barack Obama ធ្វើជាប្រធានាធិបតីនេះ មានគោលបំណងអនុញ្ញាតឲ្យអ្នកទាំងនោះអាចរស់នៅ និងធ្វើការដោយស្របច្បាប់បាននៅក្នុងសហរដ្ឋអាមេរិក។
ប៉ុន្តែ លោក Trump បានបញ្ជាឲ្យបញ្ចប់កម្មវិធី DACA នេះកាលពីឆ្នាំមុន ដោយទុកពេលឲ្យសភារហូតដល់ដើមខែមិនាខាងមុខនេះដើម្បីស្វែងរកដំណោះស្រាយជាអចិន្ត្រៃយ៍មួយសម្រាប់អ្នកដែលទទួលបានការការពារក្រោមកម្មវិធី DACA នេះ ដែលពេលខ្លះអ្នកទាំងនេះត្រូវបានគេហៅថា «អ្នកដែលមានក្ដីសុបិន»។
នៅក្នុងការពន្យល់អំពីកំណែទម្រង់ដែលលោកចង់បាន លោក Trump បាននិយាយបញ្ឆិតបញ្ឆៀងសំដៅលើជនអន្តោប្រវេសន៍ទាំងនោះនៅពេលដែលលោកបញ្ជាក់អំពីគោលបំណងរបស់លោកនៅក្នុងការ «ផ្ដោតលើផលប្រយោជន៍ដ៏ប្រសើរបំផុតសម្រាប់ពលរដ្ឋអាមេរិកាំងដែលជាអ្នកធ្វើការ និងក្រុមគ្រួសាររបស់ពួកគេ»។
លោក Trump បាននិយាយថា៖ «ករណីយកិច្ចរបស់ខ្ញុំ និងករណីយកិច្ចគួរឲ្យគោរពរបស់មន្ត្រីជាប់ឆ្នោតគ្រប់រូបនៅក្នុងសភានេះ គឺការពារប្រជាពលរដ្ឋអាមេរិកាំង ដូចជាការការពារសុវត្ថិភាពរបស់ពួកគេ ក្រុមគ្រួសាររបស់ពួកគេ សហគមន៍របស់ពួកគេ និងសិទ្ធិរបស់ពួកគេដើម្បីសម្រេចក្ដីសុបិនរបស់ពួកគេនៅលើទឹកដីសហរដ្ឋអាមេរិក»។
ការលើកឡើងដូចនេះបានបង្កឲ្យមានប្រតិកម្មភ្លាមៗពីអ្នករិះគន់ជាច្រើនចំពោះវិធានការរបស់លោក Trump នេះ ដែលក្នុងនោះមានដូចជាលោកស្រី Nancy Pelosi មេដឹកនាំខាងគណបក្សប្រជាធិបតេយ្យនៃរដ្ឋសភាផងដែរ ដោយលោកស្រីបានសរសេរនៅលើ Twitter ថា៖ «អ្នកមានក្ដីសុបិនក៏ជាពលរដ្ឋអាមេរិកាំងដែរ»។
សមាជិករដ្ឋសភាខាងគណបក្សប្រជាធិបតេយ្យលោក Joe Kennedy បានផ្ញើសារគាំទ្របន្ថែមទៀតចំពោះជនអន្តោប្រវេសន៍វ័យក្មេង នៅក្នុងអំឡុងពេលការឆ្លើយតបរបស់គណបក្សប្រជាធិបតេយ្យចំពោះសុន្ទរកថារបស់លោក Trump។
លោក Joe Kennedy បាននិយាយថា៖ «ជនអន្តោប្រវេសន៍វ័យក្មេងគឺជាផ្នែកមួយនៃប្រវត្តិសាស្ត្ររបស់សហរដ្ឋអាមេរិក។ គណបក្សប្រជាធិបតេយ្យនឹងតស៊ូដើម្បីពួកគេ។ គណបក្សប្រជាធិបតេយ្យនឹងមិនដើរចេញពីបញ្ហានេះទេ»។
លោក Trump បាននិយាយថា លោកនឹងទាក់ទងទាំងសមាជិកគណបក្សប្រជាធិបតេយ្យ និងទាំងសមាជិកគណបក្សសាធារណរដ្ឋ ដើម្បីសម្រេចឲ្យបាននូវគោលបំណងអន្តោប្រវេសន៍របស់លោក។
សមាជិកព្រឹទ្ធសភាខាងគណបក្សប្រជាធិបតេយ្យលោក Mark Warner បានបញ្ជាក់ថា លោកយល់ស្របថា ត្រូវតែមាននូវកិច្ចព្រមព្រៀងមួយដែលកើតចេញពីគណបក្សទាំងពីរទាក់ទិននឹងបញ្ហាជនអន្តោប្រវេសន៍វ័យក្មេងគ្មានក្រដាសស្នាមនេះ និងការបង្កើនថវិកាសម្រាប់សន្តិសុខព្រំដែន។
លោក Mark Warner បាននិយាយថា៖ «លោកប្រធានាធិបតី Donald Trump បានបង្ហាញថា លោកមិនមានឆន្ទៈក្នុងការបញ្ឈប់ការគាំទ្រចំពោះអ្នកគាំទ្រជ្រុលនិយម និងគ្មានធម៌មេត្តារបស់លោកនោះទេ។ អ្នកគាំទ្រជ្រុលនិយម និងគ្មានធម៌មេត្តាទាំងនោះចង់ដាក់កំហិតផ្នែកអន្តោប្រវេសន៍ស្របច្បាប់ស្ទើរតែគ្រប់ទម្រង់ទាំងអស់»។
តាំងពីបានចាប់ផ្ដើមធ្វើយុទ្ធនាការឃោសនាបោះឆ្នោតរបស់លោកមក លោក Trump បានជំរុញឲ្យមានការសាងសង់ជញ្ជាំងនៅតាមព្រំដែនរវាងសហរដ្ឋអាមេរិកនិងប្រទេសម៉ិកស៊ិក។ ហើយបន្ថែមពីលើគម្រោងសាងសង់ជញ្ជាំងព្រំដែននៅក្នុងគម្រោងអន្តោប្រវេសន៍របស់លោកនេះ លោកចង់បង្កើនចំនួនភ្នាក់ងារសន្តិសុខព្រំដែន និងចង់បញ្ចប់នូវអ្វីដែលលោកហៅថា គោលនយោបាយ «ចាប់បានហើយលែងវិញ» សម្រាប់អ្នកដែលចាប់ខ្លួនបានពេលព្យាយាមឆ្លងព្រំដែនចូលក្នុងទឹកដីសហរដ្ឋអាមេរិកដោយខុសច្បាប់។
លោក Trump បាននិយាយថា ពួកក្រុមជនអន្ធពាល និងឧក្រិដ្ឋជនដទៃទៀតអាចចូលក្នុងសហរដ្ឋអាមេរិកបាន ដោយសារតែមានបញ្ហា «ចន្លោះប្រហោងធ្ងន់ធ្ងរ»។
លោក Trump ក៏បានស្នើឲ្យបញ្ចប់កម្មវិធីឆ្នោតផ្សងសំណាងដើម្បីទទួលបានទិដ្ឋាការសហរដ្ឋអាមេរិកផងដែរ ដោយលោកចង់ផ្ដោតលើ «ប្រព័ន្ធផ្អែកលើគុណសម្បត្តិរបស់បុគ្គល» វិញ ដែលប្រព័ន្ធនេះនឹងពាំនាំអ្នកធ្វើការមានជំនាញច្បាស់លាស់ចូលមកក្នុងសហរដ្ឋអាមេរិក ដែលអ្នកទាំងនោះ «រួមចំណែកដល់សង្គមរបស់សហរដ្ឋអាមេរិក និងជាអ្នកដែលនឹងស្រលាញ់ និងគោរពសហរដ្ឋអាមេរិក»។
កម្មវិធីឆ្នោតផ្សងសំណាងដើម្បីទទួលបានទិដ្ឋាការសហរដ្ឋអាមេរិកនេះ គឺជាវិធីអន្តោប្រវេសន៍មួយសម្រាប់អ្នកដែលមិនមានសាច់ញាតិគ្រួសារនៅក្នុងសហរដ្ឋអាមេរិក ឬក៏មិនមានកន្លែងការងារណាមួយធានាពួកគេ ហើយខ្លួនពួកគេផ្ទាល់ក៏មិនមែនជាជនភៀសខ្លួនផងដែរ។ កម្មវិធីនេះតម្រូវឲ្យអ្នកចូលរួមមានសញ្ញាប័ត្រមធ្យមសិក្សាទុតិយភូមិ និងបទពិសោធន៍ការងារពីរឆ្នាំ។ ជារៀងរាល់ឆ្នាំ សហរដ្ឋអាមេរិកជ្រើសរើសមនុស្សរហូតដល់ ៥ ម៉ឺននាក់ សម្រាប់កម្មវិធីឆ្នោតផ្សងសំណាងនេះ។
សម្រាប់ផ្នែកចុងក្រោយនៃគម្រោងអន្តោប្រវេសន៍របស់លោក លោក Trump ចង់ដាក់កំហិតលើអន្តោប្រវេសន៍តាមរយៈគ្រួសារចំពោះប្ដី ឬប្រពន្ធ និងកូនៗដែលជាអនីតិជនរបស់ពួកគេ។
ប្រព័ន្ធបច្ចុប្បន្នអនុញ្ញាតឲ្យពលរដ្ឋអាមេរិកាំង និងអ្នកមានសិទ្ធិរស់នៅអចិន្ត្រៃយ៍នៅក្នុងសហរដ្ឋអាមេរិកអាចធានាសមាជិកក្រុមគ្រួសារសែស្រឡាយជាច្រើន ដែលក្នុងនោះមានដូចជាឪពុកម្ដាយ បងប្អូនបង្កើត និងកូនៗពេញវ័យជាដើម។ សម្រាប់សាច់ញាតិដែលមិនមែនជាឪពុកម្ដាយវិញ ពាក្យសុំទិដ្ឋាការអន្តោប្រវេសន៍នេះអាចចំណាយពេលរង់ចាំយូរ និងតម្រូវទៅតាមកូតាចំនួនទិដ្ឋាការអន្តោប្រវេសន៍ដែលនឹងផ្ដល់ឲ្យ។
លោកស្រី Elizabeth Guzman ដែលជាអ្នកតំណាងគណៈប្រតិភូគណបក្សប្រជាធិបតេយ្យនៃរដ្ឋសភាប្រចាំរដ្ឋ Virginia បានប្រឆាំងនឹងទស្សនវិស័យអន្តោប្រវេសន៍របស់លោក Trump ដោយបាននិយាយថា លោក Trump គំរាមធ្វើឲ្យប្រទេសដើរត្រឡប់ក្រោយទៅរកពេលមួយ ដែលមនុស្សត្រូវបានវាយតម្លៃផ្អែកលើពណ៌សម្បុរ និងសាសនារបស់ពួកគេ ជាជាងលើលក្ខណៈសម្បត្តិរបស់ពួកគេ។
លោកស្រីបានធ្វើការឆ្លើយតបជាភាសាអេស្ប៉ាញចំពោះសុន្ទរកថារបស់លោក Trumpយ៉ាងដូច្នេះថា៖ «ក្រុមគ្រួសារជនអន្តោប្រវេសន៍ ដែលទទួលបានជីវិតរស់នៅថ្មីតាមរយៈការប្រឹងប្រែងធ្វើការ និងការជឿជាក់ទៅលើសេចក្ដីថ្លៃថ្នូររបស់សហរដ្ឋអាមេរិក កំពុងប្រឈមនឹងភាពស្រពិចស្រពិល ភាពវិលវល់ និងការភិតភ័យនៅក្រោមការដឹកនាំរបស់លោកប្រធានាធិបតី Trump។ លោក Trump បានជំនួសភាពស្មើគ្នាដោយការមិនចេះអត់ឱនឲ្យគ្នា ជំនួសការគោរពគ្នាទៅវិញទៅមកដោយការរើសអើង»។
រដ្ឋាភិបាលរបស់លោក Trump បានបញ្ជាក់ថា ការហាមឃាត់នេះគឺចាំបាច់ដើម្បីការពារសន្តិសុខជាតិ និងបានប្រឆាំងនឹងអ្នកណាដែលនិយាយថា គោលនយោបាយរបស់លោក Trump ដូចនេះ និងការដាក់កំហិតចំពោះការទទួលយកជនភៀសខ្លួន គឺសំដៅទៅលើអ្នកកាន់សាសនាឥស្លាមនោះ។
លោកស្រី Guzman បាននិយាយថា គម្រោងអន្តោប្រវេសន៍របស់លោក Trump នឹង «ផ្លាស់ប្ដូរជាមូលដ្ឋានចំពោះកិត្តិនាមរបស់សហរដ្ឋអាមេរិក» និងជាគម្រោងមួយដែលប្រឆាំងនឹងឧត្ដមគតិរបស់ស្ថាបនិកសហរដ្ឋអាមេរិក។
លោកស្រីបានបន្ថែមថា៖ «យើងមិនគួរទទួលយក ឬក៏ចាត់ទុកវិធីឃោរឃៅ និងការប្រមាថមើលងាយនេះថាជារឿងធម្មតានោះទេ ដែលវិធីទាំងនេះជាអ្វីដែលលោក Trump ធ្វើឲ្យសហគមន៍របស់យើងទៅជាដូច្នេះ»៕
ប្រែសម្រួលដោយ ភី សុភាដា
