លោកប្រធានាធិបតីសហរដ្ឋអាមេរិក Donald Trump កាលពីថ្ងៃពុធបានបញ្ជាឲ្យមានការសាងសង់ជញ្ជាំងនៅតាមព្រំប្រទល់ភាគខាងត្បូងជាមួយនឹងប្រទេសម៉ិកស៊ិក ដើម្បីរារាំងការធ្វើចំណាកស្រុកខុសច្បាប់ ហើយនៅក្នុងពេលជាមួយគ្នានេះដែរ លោកក៏ប្រឈមមុខនឹងទីក្រុងរាប់រយរបស់អាមេរិកដែលបដិសេធមិនជួយក្រុមអាជ្ញាធរសហព័ន្ធក្នុងការកំណត់អត្តសញ្ញាណ និងបញ្ជូនខ្លួនជនចំណាកស្រុកដែលគ្មានក្រដាសស្នាមត្រឹមត្រូវនោះទេ។
លោកប្រធានាធិបតីថ្មីរូបនេះបានចុះហត្ថលេខាទៅលើបទបញ្ជាប្រតិបត្តិទាក់ទិននឹងបញ្ហាអន្តោប្រវេសន៍ ក្នុងខណៈពេលដែលលោកធ្វើដំណើរទៅកាន់ក្រសួងសន្តិសុខមាតុភូមិ ឬហៅថា Department of Homeland Security ដែលជាទីភ្នាក់ងាររដ្ឋាភិបាលសហព័ន្ធមួយទទួលបន្ទុកទៅលើការការពារព្រំដែន។
បទបញ្ជាទាំងនោះគឺជាចំណុចដ៏គួរឲ្យភ្ញាក់ផ្អើលយ៉ាងខ្លាំងមួយដែលជួយឲ្យលោកឈ្នះចូលកាន់តំណែងរយៈពេល៤ឆ្នាំនៅក្នុងសេតវិមាន ដោយលោកបានអះអាងថាជនចំណាកស្រុកខុសច្បាប់នៅក្នុងសហរដ្ឋអាមេរិកបានគំរាមកំហែងទៅលើសន្តិសុខរបស់ប្រទេស ហើយបានធ្វើឲ្យពលរដ្ឋអាមេរិកាំងបាត់បង់ការងារធ្វើ។ នៅក្នុងការប្រមូលផ្តុំគ្នាមួយក្នុងអំឡុងពេលយុទ្ធនាការរបស់លោក ក្រុមអ្នកគាំទ្រដ៏ខ្លាំងក្លារបស់លោកបានស្រែកថា៖ «សង់ជញ្ជាំង»។
លោក Trump បានថ្លែងប្រាប់ទូរទស្សន៍ ABC ថា ការសាងសង់ជញ្ជាំងនោះនឹងចាប់ផ្តើមនៅប៉ុន្មានខែខាងមុខ ហើយលោកនៅបន្តថាឲ្យប្រទេសម៉ិកស៊ិកបង់ថ្លៃសាងសង់ជញ្ជាំងនោះ បើទោះបីជាប្រទេសម៉ិកស៊ិកបានបញ្ជាក់ម្តងហើយម្តងទៀតថាខ្លួននឹងមិនបង់ថ្លៃសង់ជញ្ជាំងនេះនោះទេ។ លោក Trump បានថ្លែងថា ថ្លៃសង់ជញ្ជាំងនោះប្រហែលជាបង់ឲ្យក្នុងទម្រង់មួយ ដែលមិនមែនរដ្ឋាភិបាលប្រទេសម៉ិកស៊ិកបង់ឲ្យរដ្ឋាភិបាលក្រុងវ៉ាស៊ីនតោនដោយផ្ទាល់នោះទេ។
អ្នកនាំពាក្យសេតវិមានលោក Sean Spicer បានថ្លែងថា អាមេរិកនឹងសង់មន្ទីរឃុំឃាំងច្រើនជាងមុននៅតាមព្រំដែនដើម្បីឃុំខ្លួនជនចំណាកស្រុកដែលឆ្លងព្រំដែនចូលសហរដ្ឋអាមេរិក ហើយបន្ទាប់មកនឹងផ្តល់សំបុត្រយន្តហោះទៅវិញតែមួយជើងឲ្យពួកគេត្រឡប់ទៅប្រទេសរបស់ពួកគេវិញ។ លោកបានថ្លែងថា រដ្ឋបាលលោក Trump នឹងបញ្ចប់អ្វីដែលលោកហៅថា ជាកម្មវិធីចាប់លែង ចាប់លែង របស់ទីភ្នាក់ងារការពារព្រំដែន។
ក្រុមមន្ត្រីបានថ្លែងថាលោក Trump ក៏កំពុងពិចារណាផ្អាកការអនុញ្ញាតឲ្យជនភៀសខ្លួនចូលមកកាន់សហរដ្ឋអាមេរិករយៈពេល៤ខែ ក៏ដូចជាហាមឃាត់ជនជាតិ អ៊ីរ៉ាក់ អ៊ីរ៉ង់ លីប៊ី ស៊ីរី សូម៉ាលី ស៊ូដង់ និង យេម៉ែន ក្នុងការចូលមកកាន់សហរដ្ឋអាមេរិកយ៉ាងហោចណាស់៣០ថ្ងៃ ដែលប្រទេសទាំងនេះគឺសុទ្ធសឹងតែជាប្រទេសដែលកាន់សាសនាឥស្លាម។ ប៉ុន្តែការហាមឃាត់នេះក៏រួមមានករណីលើកលែងមួយចំនួនសម្រាប់អ្នកដែលមិនសូវប្រកាន់ខ្ជាប់ចំពោះសាសនាខ្លាំងក្លាពេកនិងអ្នកដែលប្រឈមនឹងការធ្វើទុក្ខបុកម្នេញផងដែរ៕
