ភ្ជាប់​ទៅ​គេហទំព័រ​ទាក់ទង

លោក​ត្រាំ​​ថា​នឹង​ចរចា​ជាមួយ​កូរ៉េ​ខាងជើង​នៅ​ពេល​វេលា​សមរម្យ​មួយ


ប្រធានាធិបតី​សហរដ្ឋអាមេរិក​និង​ប្រធានាធិបតី​កូរ៉េ​ខាងត្បូង​

ប្រធានាធិបតី​ស.រ.អា. Donald Trump បាន​និយាយ​ថា​គាត់បើក​ចំហដល់​កិច្ចចរចា​ជាមួយ​ប្រទេសកូរ៉េខាង​ជើង​ «នៅពេលវេលា​សមស្រប»។

នៅក្នុង​ការ​សន្ទនា​គ្នា​មួយ​តាម​ទូរសព្ទជាមួយ​ប្រធានាធិបតី​កូរ៉េខាង​ត្បូង Moon Jae-in កាលពី​ថ្ងៃ​ពុធ ប្រធានាធិបតី​ Trump «បានសម្តែងភាពបើកចំហ​របស់​លោកដល់​ការធ្វើកិច្ចចរចារវាង​ស.រ.អា.និង​ប្រទេសកូរ៉េខាង​ជើង​នៅ​ពេល​វេលា​សមស្របនិងនៅ​ក្នុង​កាលៈទេសៈត្រឹមត្រូវ​» នេះ​បើ​តាម​អត្ថបទ​នៃ​ការ​សន្ទនា​គ្នាតាម​ទូរសព្ទនោះ​ដែល​សេតវិមាន​បានចេញ​ផ្សាយ​។​

សេចក្តីថ្លែងការណ៍​នេះ​ចែង​ថា​ «មេដឹកនាំ​ទាំង​ពីរ​នាក់នេះ​បានគូស​បញ្ជាក់​អំពីសារៈសំខាន់​នៃ​ការ​បន្ត​ដាក់​គំនាប​សង្កត់ជា​អតិបរមា​ប្រឆាំង​នឹង​កូរ៉េខាង​ជើង»។

ការិយាល័យ​របស់​លោក​ប្រធានាធិបតី​ Moon បាន​រាយការណ៍​មុន​គេ​អំពី​ការ​សន្ទនា​គ្នា​នេះ​ដែល​បាន​ធ្វើឡើង​មួយ​ថ្ងៃ​ក្រោយ​ពី​ប្រទេស​កូរ៉េខាង​ជើង​និង​ប្រទេស​កូរ៉េ​ខាង​ត្បូង​បាន​ធ្វើការ​ចរចាគ្នា​លើក​ទីមួយ​ក្នុង​រយៈពេល​ជាង​ពីរ​ឆ្នាំ​មកនេះ។​ ឯកសារ​កូរ៉េខាង​ត្បូង​ស្តី​ពី​ការនិយាយ​គ្នា​តាម​ទូរសព្ទ​រវាងប្រធានាធិបតី​ទាំង​ពីរ​នាក់នេះ​ចែង​ថា Trump បាន​យល់​ស្រប​ថា​នឹង​គ្មាន​សកម្មភាព​យោធា​ទេនៅ​ពេល​កំពុងមាន​កិច្ចចរចា​គ្នាណា​មួយ។​

ប្រធានាធិបតី​ Trump និង​ប្រធានាធិបតី Moon បាន​ធ្វើសន្និសីទ​កាសែត​កាលពី​ថ្ងៃ​ពុធ​អំពី​លទ្ធភាពនៃ​ការមាន​ឧបទ្វីបកូរ៉េ​ដែល​មាន​ស្ថិរភាព​ច្រើន​ជាង​មុនដែល​នៅ​ទី​នោះ​ភាព​តានតឹង​បាន​កើនឡើង​ដល់កម្រិត​ខ្ពស់ជា​ច្រើន​ខែ​មក​ហើយ​នោះ៕

XS
SM
MD
LG