យោងតាមមន្ត្រីសេតវិមានបានឲ្យដឹងកាលពីថ្ងៃពុធម្សិលមិញថា លោកអនុប្រធានាធិបតីសហរដ្ឋអាមេរិក Mike Pence និងភរិយារបស់លោកនឹងដឹកនាំប្រតិភូសហរដ្ឋអាមេរិកទៅចូលរួមក្នុងការក្រកួតកីឡាអូឡាំពិករដូវរងារនៅកូរ៉េខាងត្បូងនៅខែក្រោយនេះ។ ក្នុងអំឡុងពេលការធ្វើដំណើរនេះ លោកអនុប្រធានាធិបតីក៏នឹងធ្វើដំណើរទៅកាន់រដ្ឋAlaska ដើម្បីត្រួតពិនិត្យមើលប្រព័ន្ធការពារកាំជ្រួចម៉ីស៊ីលផ្លោងឆ្លងទ្វីប ហើយលោកក៏នឹងឈប់សំចតក្នុងប្រទេសជប៉ុនផងដែរ។
សេតវិមានបានឲ្យដឹងដែរថា លោកអនុប្រធានាធិបតី Pence នឹងថ្លែងបញ្ជាក់ទៅកាន់មេដឹកនាំជប៉ុននិងកូរ៉េខាងត្បូង អំពីការប្តេជ្ញារបស់សហរដ្ឋអាមេរិកក្នុងការរក្សាស្ថិរភាពនៅក្នុងតំបន់។
ប្រទេសកូរ៉េខាងជើងកាលពីថ្ងៃអង្គារបានយល់ព្រមបញ្ជូនប្រតិភូជាន់ខ្ពស់របស់ខ្លួន ទៅចូលរួមក្នុងកីឡាអូឡាំពិករដូវរងា ដែលនឹងចាប់ផ្តើមឡើងនៅថ្ងៃទី ៩ ខែកុម្ភៈ នៅក្នុងទីក្រុងព្យូងឆាង ប្រទេសកូរ៉េខាងត្បូង។
ការស្នើនេះត្រូវបានធ្វើឡើងកាលពីថ្ងៃអង្គារ អំឡុងពេលកិច្ចសន្ទនាទល់មុខគ្នារវាងប្រទេសផ្តាច់ការកូរ៉េខាងជើង និងប្រទេសប្រជាធិបតេយ្យកូរ៉េខាងត្បូង នៅក្នុងភូមិ Panmunjom ដែលគេដាក់ឈ្មោះថាជា «ភូមិសន្តិភាព» នៅច្រកព្រំដែន ដែលជាទីតាំងប្រារព្ធពិធីបទឈប់បាញ់គ្នានៅអំឡុងពេលសង្គ្រាមកូរ៉េ។
កិច្ចចរចាកាលពីថ្ងៃអង្គារបានបញ្ចប់ភាពជាប់គាំងនៅក្នុងទំនាក់ទំនងរបស់កូរ៉េទាំងពីរដោយសារតែការបង្កើនកម្មវិធីនុយក្លេអ៊ែរនិងកម្មវិធីកាំជ្រួចផ្លោងឆ្លងទ្វីបរបស់កូរ៉េខាងជើង ដែលបណ្តាលឲ្យមានការដាក់ទណ្ឌកម្មនានាពីអន្តរជាតិ។
លោកប្រធានាធិបតីកូរ៉េខាងត្បូង Moon Jae-in កាលពីថ្ងៃអង្គារ បានថ្លែងអំណរគុណដល់លោកប្រធានាធិបតីសហរដ្ឋអាមេរិក Donald Trump ដោយលោកបានថ្លែងថា លោកប្រធានាធិបតីគឺជាអ្នកជួយឲ្យមានការផ្លាស់ប្តូររវាងប្រទេសទាំងពីរ។ លោកបានថ្លែងបន្តទៀតថា ការដាក់ទណ្ឌកម្មដែលដឹកនាំដោយសហរដ្ឋអាមេរិក និងការបន្តដាក់សម្ពាធលើកូរ៉េខាងជើង បានធ្វើឲ្យរដ្ឋាភិបាលក្រុងព្យុងយ៉ាងត្រឡប់មករកតុចចារឡើងវិញ៕
