ប្រធានាធិបតីអាមេរិកលោក Donald Trump បានប្រកាសនៅក្នុងអំឡុងពេលលោកថ្លែងពីស្ថានភាពសហព័ន្ធទៅកាន់សភាទាំងពីរថ្នាក់កាលពីយប់ថ្ងៃអង្គារម្សិលមិញថា លោក និងមេដឹកនាំកូរ៉េខាងជើងលោក Kim Jong Un នឹងជួបគ្នាជាលើកទីពីរនៅចុងខែនេះ។
លោក Trump បាននិយាយថា ជំនួបលើកទីពីរនេះនឹងធ្វើឡើងនៅប្រទេសវៀតណាមពីថ្ងៃទី ២៧ ដល់ថ្ងៃទី ២៨ ខែកុម្ភៈខាងមុខនេះ។
លោក Trump និយាយដូច្នេះថា៖ «ជាផ្នែកមួយនៃវិស័យការទូតថ្មីដ៏រឹងមាំមួយ យើងបន្តជំរុញជាប្រវត្តិសាស្ត្រឲ្យមានសន្តិភាពនៅលើឧបទ្វីបកូរ៉េ។ ពលរដ្ឋអាមេរិកាំងដែលកូរ៉េខាងជើងចាប់ធ្វើចំណាប់ខ្មាំងបានត្រឡប់មកសហរដ្ឋអាមេរិកវិញហើយ។ ការសាកល្បងនុយក្លេអ៊ែរបានបញ្ឈប់ហើយ ហើយយើងមិនឃើញមានការសាកល្បងមីស៊ីលណាមួយទៀតនោះទេនៅក្នុងរយៈពេល ១៥ ខែចុងក្រោយនេះ»។
លោក Trump បានបន្តថា៖ «ប្រសិនបើខ្ញុំមិនត្រូវបានជ្រើសរើសជាប្រធានាធិបតីសហរដ្ឋអាមេរិកទេ ឥឡូវនេះ បើតាមទស្សនៈខ្ញុំ យើងនឹងមានសង្គ្រាមដ៏ធំមួយជាមួយនឹងប្រទេសកូរ៉េខាងជើង ដោយអាចធ្វើឲ្យមនុស្សរាប់លាននាក់ស្លាប់ជាមិនខាន។ នៅមានកិច្ចការជាច្រើនទៀតដែលត្រូវធ្វើ ប៉ុន្តែទំនាក់ទំនងរបស់ខ្ញុំជាមួយនឹងលោក Kim Jong Un គឺជាទំនាក់ទំនងដ៏ល្អមួយ។ លោកប្រធាន Kim និងខ្ញុំ នឹងជួបគ្នាម្ដងទៀតនៅថ្ងៃទី ២៧ និង ២៨ ខែកុម្ភៈខាងមុខនេះ នៅប្រទេសវៀតណាម»។
លោក Trump មិនបានបញ្ជាក់ទេថាតើការប្រជុំនេះនឹងធ្វើឡើងនៅទីក្រុងណានោះទេ។
លោក Trump និងលោក Kim Jong Un បានជួបគ្នាលើកដំបូងជាប្រវត្តិសាស្ត្រកាលពីខែមិថុនា ឆ្នាំមុននៅក្នុងប្រទេសសិង្ហបុរី ដោយលោកទាំងពីរបានឯកភាពគ្នាលុបបំបាត់នុយក្លេអ៊ែរនៅលើឧបទ្វីបកូរ៉េ៕
