លោកប្រធានាធិបតី Donald Trump បានស្នើឈ្មោះតែងតាំងលោក Robert O'Brien ជាទីប្រឹក្សាសន្តិសុខជាតិថ្មី ជំនួសលោក John Bolton ដែលបានត្រូវដកចេញពីតំណែងកាលពីសប្តាហ៍មុន។
លោក Trump បាននិយាយតាម Twitter កាលពីថ្ងៃពុធថា «ខ្ញុំរីករាយនឹងប្រកាសថាខ្ញុំនឹងស្នើឈ្មោះលោក Robert C. O'Brien ដែលនៅពេលបច្ចុប្បន្ននេះកំពុងបម្រើការជាប្រេសីតពិសេសរបស់ប្រធានាធិបតីទទួលបន្ទុកកិច្ចការចំណាប់ខ្មាំងនៅឯក្រសួងការបរទេសឱ្យកាន់តំណែងជាទីប្រឹក្សាសន្តិសុខជាតិថ្មីរបស់យើង។ ខ្ញុំបានធ្វើការយូរមកហើយជាមួយ Robert។ លោកនឹងធ្វើកិច្ចការដ៏អស្ចារ្យមួយ!»។
លោក Trump បាននិយាយថាលោក Bolton ជា «មហន្តរាយ» មួយអំពីគោលនយោបាយស្តីពីប្រទេសកូរ៉េខាងជើង «ខុសឆ្គង» អំពីបញ្ហាប្រទេសវេណេស៊ុយអេឡាហើយមិនត្រូវគ្នាជាមួយមន្ត្រីសំខាន់ៗនៃរដ្ឋាបាលថែមទៀត។
លោក O'Brien ដែលជាទីប្រឹក្សាសន្តិសុខជាតិទីបួនរបស់លោក Trump បានត្រូវជ្រើសរើសក្នុងចំណោមបេក្ខជនប្រាំនាក់ដែលលោក Trump បាននិយាយថា បានឋិតនៅក្រោមការពិចារណា។
លោកបានត្រូវជ្រើសរើសនៅក្រោយបានធ្វើសហប្រតិបត្តិការជាមួយលោករដ្ឋមន្ត្រីការបរទេស Mike Pompeo អំពីករណីចំណាប់ខ្មាំងមួយចំនួន។
នៅពេលលោកកាន់តំណែងក្នុងក្រសួងការបរទេសស.រ.អាចាប់តាំងពីខែឧសភាឆ្នាំ២០០៨មក លោក O'Brien បានធ្វើការយ៉ាងជិតស្និទ្ធជាមួយគ្រួសារពួកចំណាប់ខ្មាំងអាមេរិកាំងនិងផ្តល់ការណែនាំឱ្យរដ្ឋបាលស.រ.អាអំពីបញ្ហាចំណាប់ខ្មាំង។ កាលពីពេលមុនលោកបានជួយដឹកនាំការផ្តើមគំនិតរបស់ក្រសួងការបរទេសអាមេរិកាំងសម្រាប់កំណែទម្រង់យុត្តិធ៌មក្នុងប្រទេសអាហ្វហ្គានីស្ថាននៅក្នុងរដ្ឋបាលរបស់លោកប្រធានាធិបតី George W. Bush និងលោកប្រធានាធិបតី Barack Obama៕
