អ្នកនាំពាក្យរដ្ឋាភិបាលអ៊ីរ៉ង់និយាយថា ការចាកចេញពីដំណែងរបស់ទីប្រឹក្សាសន្តិសុខជាតិសហរដ្ឋអាមេរិកលោក John Bolton អាចធ្វើឲ្យរដ្ឋបាលរបស់ប្រធានាធិបតីអាមេរិកលោក Donald Trump ដោះស្រាយបញ្ហាជាមួយនឹងអ៊ីរ៉ង់តាម «របៀបមិនសូវលំអៀង»។
អ្នកនាំពាក្យរដ្ឋាភិបាលអ៊ីរ៉ង់លោក Ali Rabiei បាននិយាយនៅថ្ងៃពុធនេះថា លោក Bolton គឺជា «និមិត្តរូបនៃគោលនយោបាយបង្កសង្គ្រាមរបស់សហរដ្ឋអាមេរិក» និងគឺជា អ្នកប្រឆាំងនឹងប្រទេសអ៊ីរ៉ង់។
មន្ត្រីអ៊ីរ៉ង់នានា ដែលរួមមានទាំងរដ្ឋមន្ត្រីការបរទេសលោក Mohammad Javad Zarif ផងដែរ កន្លងមកបានលើកឡើងម្ដងហើយម្ដងទៀតថា លោក Bolton គឺជាបុគ្គលប្រឆាំងទៅនឹងការចរចា ដើម្បីដោះស្រាយភាពតានតឹងរវាងសហរដ្ឋអាមេរិក និងអ៊ីរ៉ង់។
កាលពីថ្ងៃអង្គារម្សិលមិញ រដ្ឋមន្ត្រីការបរទេសសហរដ្ឋអាមេរិកលោក Mike Pompeo បានបញ្ជាក់ថា ការបញ្ឈប់លោក Bolton ពីដំណែងនឹងមិនធ្វើឲ្យផ្លាស់ប្ដូរដល់គោលនយោបាយការបរទេសរបស់លោក Trump នោះទេ។
លោក Pompeo បាននិយាយ ក្រោយពីលោក Trump បានប្រកាសតាម Twitter អំពីការបញ្ឈប់លោក Bolton ពីដំណែងមិនដល់ពីរម៉ោងផង យ៉ាងដូច្នេះថា៖ «ខ្ញុំគិតថា គ្មានមេដឹកនាំណាម្នាក់នៅលើពិភពលោកដែលគួរធ្វើការសន្និដ្ឋានថា ដោយសារមន្ត្រីណាម្នាក់ឈប់ពីដំណែង នោះគោលនយោបាយការបរទេសរបស់លោកប្រធានាធិបតី Trump នឹងផ្លាស់ប្ដូរនោះទេ»។
បន្ទាប់ពីបានបញ្ឈប់លោក Bolton ពីដំណែង លោក Trump ថា លោកនឹងប្រកាសឈ្មោះអ្នកដែលត្រូវជំនួសដំណែងលោក Bolton នៅសប្ដាហ៍ក្រោយ។ នាពេលបច្ចុប្បន្ននេះ លោក Charlie Kupperman ដែលជាទីប្រឹក្សារងផ្នែកសន្តិសុខជាតិ នឹងធ្វើជាទីប្រឹក្សាសន្តិសុខជាតិស្ដីទី៕
