ប្រធានាធិបតីសហរដ្ឋអាមេរិកលោក ដូណាល់ ត្រាំ បាននិយាយកាលពីថ្ងៃពុធថា សហរដ្ឋអាមេរិក មានជម្រើសជាច្រើន បន្ថែមទៅលើការវាយប្រហារខាងយោធាដើម្បីឆ្លើយតបទៅនឹងការវាយប្រហារកាំជ្រួចមីស៊ីលនិងយន្តហោះគ្មានមនុស្សបើក (Drone) របស់អ៊ីរ៉ង់ ដែលបានបំផ្លាញផលិតផលប្រេងរបស់អារ៉ាប៊ីសាអូឌីតចំនួនពាក់កណ្តាលកាលពីចុងសប្តាហ៍មុន។
លោកប្រធានាធិបតី ដូណាល់ ត្រាំ បានប្រាប់ពួកអ្នកយកព័ត៌មាននៅចំណតយន្តហោះនៅរដ្ឋកាលីហ្វ័រញ៉ានៅពេលដែលលោកធ្វើដំណើរដើម្បីរៃអង្កៀសប្រាក់ថា «យើងស្ថិតក្នុងស្ថានភាពខ្លាំងមួយ»។ នៅក្នុងប្រទេសអារ៉ាប៊ីសាអូឌីត លោករដ្ឋមន្រ្តីការបរទេសសហរដ្ឋអាមេរិក Mike Pompeo បានចោទប្រកាន់ប្រទេសអ៊ីរ៉ង់ពីការវាយប្រហារនេះ។
សេចក្តីថ្លែងការណ៍របស់ប្រធានាធិបតីត្រាំបានកើតមានឡើងប៉ុន្មានម៉ោង បន្ទាប់ពីលោកប្រធានាធិបតីបានមានប្រសាសន៍ថា លោកកំពុងបង្កើនការដាក់សេដ្ឋកិច្ចប្រឆាំងនឹងប្រទេសអ៊ីរ៉ង់ បន្ទាប់ពីការវាយប្រហារវាលអណ្តូងប្រេងដែលរដ្ឋាភិបាលក្រុងវ៉ាស៊ីនតោននិយាយថា បានត្រូវវាយប្រហារដោយអ៊ីរ៉ង់។
លោកប្រធានាធិបតីត្រាំបាននិយាយក្នុងសារតាម Twitter ថា លោកបានបញ្ជាឲ្យលោក Steven Mnuchin រដ្ឋមន្រ្តីក្រសួងរតនាគាររឹតបន្តឹងការដាក់ទណ្ឌកម្មដែលមានស្រាប់ប្រឆាំងនឹងអ៊ីរ៉ង់ដែលពួកមន្រ្តីអាមេរិកនិយាយថា បានធ្វើឲ្យរាំងស្ទះសេដ្ឋកិច្ចរបស់ប្រទេសនោះរួចហើយ ក៏ប៉ុន្តែមិនបានផ្តល់សេចក្តីលម្អិតពីការដាក់ទណ្ឌកម្មថ្មីនោះទេ។ លោកប្រធានាធិបតីត្រាំបាននិយាយទៀតថា ការដាក់ទណ្ឌកម្មនោះនឹងត្រូវប្រកាសនៅក្នុងរយៈពេល៤៨ម៉ោងនេះ៕
