លោក Donald Trump បានបើកធ្វើយុទ្ធនាការឃោសនាបោះឆ្នោតទូទៅយ៉ាងខ្លាំងក្លានៅក្រោយលោកបានទទួលសន្លឹកឆ្នោតគាំទ្រគ្រប់គ្រាន់ដើម្បីក្លាយទៅ ជាឥស្សរជនដែលបានត្រូវសន្មតថា ជាបេក្ខជនប្រធានាធិបតីស.រ.អា.ខាងគណបក្សសាធារណរដ្ឋ។
លោក Trump កំពុងធ្វើការវាយប្រហារក្នុងសប្តាហ៍នេះនៅពេលលោកធ្វើការប្រយុទ្ធខាងពាក្យសម្តីជាមួយបណ្តាញផ្សាយព័ត៌មាននិងបណ្តាញសង្គម។ដោយមិនបានប៉ុនប៉ងសម្រាលការបែកបាក់គ្នាយ៉ាងខ្លាំងនៅក្នុងគណបក្សសាធារណរដ្ឋ លោក Trump បានធ្វើការវាយប្រហារលើពួកអ្នកនយោបាយសាធារណរដ្ឋ ពួកសកម្មជនអភិរក្សនិយម ហើយដោយគ្មានងឿងឆ្ងល់ឡើយ គឺវាយប្រហារទៅលើលោកស្រី Hillary Clinton ដែលជាគូប្រជែងរបស់លោកខាងគណបក្សប្រជាធិបតេយ្យ។
លោក Trump បាន Tweet កាលពីព្រឹកថ្ងៃចន្ទថា «ខ្ញុំនឹងទទួលជ័យជម្នះក្នុងការបោះឆ្នោតប្រឆាំងនឹង Hillary ដែលជាមនុស្សទុច្ចរិត ទោះណាជាមានពួកមនុស្សក្នុងគណបក្សសាធារណរដ្ឋដែលកំពុងប្រឆាំងនឹងខ្ញុំក៏ដោយ»។
នៅពេលដែលការបោះឆ្នោតទូទៅនឹងប្រព្រឹត្តទៅក្នុងពេល៦ខែទៀត គណបក្សសាធារណរដ្ឋនៅតែមានការបែកបាក់គ្នារវាងពួកអ្នកគាំទ្រលោក Trump និងពួកប្រពៃណីនិយមនៅក្នុងគណបក្សសាធារណៈរដ្ឋ ឬគណបក្ស GOP។ លោក James Gimpel អ្នកវិភាគនយោបាយនៅឯសាកលវិទ្យាល័យរដ្ឋ Maryland បាននិយាយប្រាប់ VOA ថា «វាហាក់ដូចជាស្មើគ្នាទៅនឹងការបែកបាក់នៅក្នុងគណបក្សសាធារណរដ្ឋ»។
លោក Gimpel ទស្សន៍ទាយថា «យ៉ាងហោចណាស់មានសមាជិកមួយភាគបី»នៃគណបក្សសាធារណរដ្ឋនឹងនៅតែប្រឆាំងនឹងលោក Trump នៅក្នុងពេលប៉ុន្មានខែខាងមុខនេះ។ លោកមានជំនឿថា ពួកអ្នកជំទាស់នឹងលោក Trump នឹងខិតខំព្យាយាមដាក់បេក្ខជនរបស់ពួកផ្ទាល់ឱ្យឈរឈ្មោះឬមួយមិនបោះឆ្នោតឱ្យបេក្ខជនប្រធានាធិបតីណាម្នាក់តែម្តង នៅក្នុងការបោះឆ្នោតទូទៅនៅពេលខាងមុខនេះ។
ឧបសគ្គមួយដែលរារាំងមិនឱ្យគណបក្សសាធារណរដ្ឋមានឯកភាពបានគឺសេចក្តីសម្រេចចិត្តរបស់លោក Paul Ryan ប្រធានសភាតំណាងរាស្ត្រអាមេរិកាំងនិងអ្នកសាធារណរដ្ឋឯទៀតៗ ដែលកាន់តំណែងតាមរយៈការជាប់ឆ្នោតមិនគាំទ្រលោក Trump ទេ។
លោក Gimpel បានថ្លែងថា «នេះជានិមិត្តរូបនៃគោលជំហររបស់ពួកសាធារណរដ្ឋច្រើននាក់ដែលកាន់តំណែងតាមរយៈការជាប់ឆ្នោត។ ពួកគេមិនដឹងច្បាស់អំពីអ្វីដែលលោក Trump ប្រកាន់យកជាគោលជំហររបស់លោកទេ»៕
