ប្រធានាធិបតីអាមេរិក លោក ដូណាល់ ត្រាំ ចចេសចង់ឆ្លើយសំណួរនៅក្នុងការស៊ើបអង្កេតទៅលើការពាក់ព័ន្ធរវាងយុទ្ធនាការឃោសនាបោះឆ្នោតឆ្នាំ២០១៦របស់លោកជាមួយនឹងរុស្ស៊ី ប៉ុន្តែមេធាវីរបស់លោកម្នាក់និយាយថា លោកនៅតែមានមន្ទិលអំពីការអនុញ្ញាតឲ្យលោក ត្រាំ ប្រឈមនឹងសំណួររបស់រដ្ឋអាជ្ញាអំពីថាលោកពិតជាបានរារាំងដល់ដំណើរការយុត្តិធម៌តាមរយៈការបង្អាក់ដល់ការស៊ើបអង្កេតនេះដែរឬយ៉ាងណា។
មេធាវីរបស់លោក ត្រាំ គឺលោក Rudy Giuliani ដែលជាអតីតអភិបាលក្រុង ញូវយ៉ក បានថ្លែងប្រាប់បណ្តាញសារព័ត៌មាន CNN កាលពីថ្ងៃអាទិត្យថា លោករដ្ឋអាជ្ញាពិសេស Robert Mueller ចង់ចោទសួរលោកប្រធានាធិបតីអំពីប្រធានបទពីរសំខាន់ៗ ទីមួយគឺលទ្ធភាពនៃការឃុបឃិតគ្នាជាមួយនឹងរុស្ស៊ីនៅក្នុងរយៈពេលប៉ុន្មានខែ មុនពេលបោះឆ្នោតប្រធានាធិបតីឆ្នាំ២០១៦ និងទីពីរអំពីថាតើលោកក្នុងនាមជាប្រធានាធិបតីបានព្យាយាមរារាំងដល់ការស៊ើបអង្កេតនោះតាមរយៈការបណ្តេញលោក James Comey ដែលជានាយកការិយាល័យ FBI ខណៈដែលលោក Comey ដឹកនាំការស៊ើបអង្កេតលើរុស្ស៊ី មុនពេលលោក Mueller ត្រូវបានតែងតាំងឲ្យកាន់តំណែងបន្តដែរឬទេ។
លោក Giuliani បាននិយាយថា «ករណីឃុបឃិតគ្នាគឺជាអ្វីដែលយើងទុកចិត្តព្រោះថាមិនមានការឃុបឃិតគ្នានោះទេ។ ហើយចំពោះករណីរារាំងដល់ការស៊ើបអង្កេតនោះគឺជាអ្វីដែលខ្ញុំមិនទុកចិត្ត។ លោកប្រធានាធិបតីយល់ថាមិនអីទេ។ លោកមិនដឹងនោះទេ។ ខ្ញុំមិនទុកចិត្តព្រោះវាគឺអាស្រ័យទៅលើការបកស្រាយ វាមិនមែនជាមាននិយមន័យជាក់លាក់ ឬជារឿងពិតឬមិនពិតនោះទេ»។
លោក Giuliani បានបន្ថែមថា «ប្រសិនបើអ្នកបកស្រាយអត្ថាធិប្បាយរបស់លោកត្រាំ អំពីការបណ្តេញលោក Comey ចេញពីតំណែង ប្រសិនបើអ្នកបកស្រាយវាថាជាការរារាំងដល់ការស៊ើបអង្កេត ជាជាងការដកតំណែងនរណាម្នាក់ដោយសារតែគេបំពេញការងារមិនបានល្អ ប្រសិនបើអ្នកយល់ឃើញថាវាជាការរារាំងដល់ការស៊ើបអង្កេត នោះអ្នកអាចនិយាយបានថាវាគឺជារារាំងដល់ការស៊ើបអង្កេត»៕
