ប្រធានាធិបតីសហរដ្ឋអាមេរិកដូណាល់ ត្រាំ កំពុងបង្ហាញពីការធ្វើតាមពាក្យសំដីរបស់លោកដែលបានសន្យាក្នុងយុទ្ធនាការឃោសនាបោះឆ្នោតថា លោកនឹងចាប់ផ្តើមអនុវត្តក្រោយពេលលោកចូលកាន់ដំណែងភ្លាមៗ។
ក្នុងអំឡុងពេលនៃសប្តាហ៍ទី១នៅក្នុងសេតវិមាន លោកបានចុះហត្ថលេខាលើបទបញ្ជារប្រធានាធិបតីជាច្រើន រួមមានបទបញ្ជាប្រធានាធិបតីមួយស្តីពីការសាងសង់របងនៅតាមព្រំដែនសហរដ្ឋអាមេរិកជាមួយប្រទេសម៉ិកស៊ិក។ ប្រជាពលរដ្ឋម៉ិកស៊ិកនិងប្រជាពលរដ្ឋអាមេរិកាំងជាច្រើនបានថ្កោលទោសការសាងសង់ដែលចំណាយប្រាក់ច្រើននេះ។ ក៏ប៉ុន្តែ ខណៈដែលមនុស្សខ្លះចាត់ទុកថាការសាងសង់នេះជាការគួឲ្យខ្មាសអៀនមួយ អ្នកខ្លះទៀតនិយាយថា ការសាងសង់របងនេះនឹងដើរតួនាទីដ៏សំខាន់មួយនៅក្នុងការធ្វើឲ្យប្រសើរឡើងនូវសន្តិសុខរបស់សហរដ្ឋអាមេរិក។
ពួកបាតុករបានរង់ចាំលោកប្រធានាធិបតីត្រាំនៅពេលដែលលោកបានទៅដល់ក្រុង Philadelphia កាលពីថ្ងៃព្រហស្បតិ៍ដែលនៅទីនោះលោកប្រធានាធិបតីបានធ្វើសុន្ទរកថាទៅកាន់ពួកសមាជិកសភាខាងគណបក្សសាធារណរដ្ឋដែលប្រជុំនៅកន្លែងសម្រាកលំហែកាយ។ លោកប្រធានាធិបតីត្រាំ ថ្លែងថា៖ «ខ្ញុំបាននិយាយជាច្រើនដងមកហើយថា ពលរដ្ឋអាមេរិកនឹងមិនបង់ថ្លៃសាងសង់របងនេះទេ ហើយខ្ញុំបានធ្វើការបញ្ជាក់យ៉ាងច្បាស់អំពីរឿងនេះដល់រដ្ឋាភិបាលម៉ិកស៊ិក»។
កំណត់សម្គាល់របស់លោកត្រាំបានកើតមានឡើងបន្ទាប់ពីលោក Enrique Nieto ប្រធានាធិបតីនៃប្រទេសម៉ិកស៊ិកបានច្រានចោលការស្នើថា ម៉ិកស៊ិក នឹងបង់ប្រាក់សម្រាប់របងនេះ។
លោក Sean Spicer អ្នកនាំពាក្យរបស់ប្រធានាធិបតីត្រាំ និយាយថា ការសាងសង់របងនេះ អាចត្រូវផ្តល់ថវិការដោយការយកពន្ធលើទំនិញនាំចូលពីបរទេស។
លោកថា៖ «ប្រសិនបើអ្នកគិតអំពីអ្វីដែលជាពន្ធដា ពន្ធដារនាំចូលទំនិញឆ្លងព្រំដែនដូចជាប្រទេសម៉ិកស៊ិកដែលយើងមានឱនភាពពាណិជ្ជកម្មយ៉ាងខ្លាំងនោះ ពន្ធនេះប្រាកដនឹងផ្តល់ថវិការសម្រាប់ការសាងសង់របងនេះ»។
ជំនួបរវាងលោកប្រធានាធិបតីសហរដ្ឋអាមេរិកនិងប្រធានាធិបតីម៉ិកស៊ិកដែលបានគ្រោងធ្វើឡើងនៅសប្តាហ៍ក្រោយបានត្រូវលប់ចោលដោយសារបញ្ហានេះ។ ក៏ប៉ុន្តែ ពួកសមាជិកសភានាំមុខរបស់គណបក្សសាធារណរដ្ឋបាននិយាយថា ពួកគេនឹងគាំទ្រការសាងសង់របងនៅតាមបណ្តោយព្រំដែននេះ។
លោក Mitch McConnell មេដឹកនាំសំឡេងភាគច្រើនរបស់ព្រឹទ្ធសភាខាងគណបក្សសាធារណរដ្ឋនិយាយថា៖ «យើងកំពុងធ្វើការងារបន្ត។នៅពេលដែលលោកប្រធានសភាតំណាងរាស្រ្តបានចង្អុលបង្ហាញដល់ក្រុមរបស់យើងពីអ្វីដែលមានទឹកប្រាក់ពី១២ទៅ២០ពាន់លានដុល្លារ។ ដូច្នេះ យើងមានគោលបំណងដោះស្រាយបញ្ហារបងនេះដោយខ្លួនឯងហើយលោកប្រធានាធិបតី អាចដោះស្រាយទំនាក់ទំនងរបស់លោកជាមួយប្រទេសដ៏ទៃទៀតដោយផ្អែកលើបញ្ហានេះហើយនឹងបញ្ហាផ្សេងទៀត»។
ពួកខាងគណបក្សប្រជាធិបតេយ្យជាទូទៅបានថ្កោលទោសចំណាត់ការនេះ។ លោក Robert O’Rourk តំណាងរាស្ត្រខាងគណបក្សប្រជាធិបតេយ្យមកពីរដ្ឋតិចសាស បាន និយាយថា៖ «ការណ៍នេះនឹងក្លាយជាព្រឹត្តិការណ៍មួយដែលមនុស្សនៅក្នុងប្រទេសអាល្លឺម៉ង់ក្រឡេកមើលទៅជញ្ជាំងទីក្រុងប៊ែឡាំង ឬ សហរដ្ឋអាមេរិកក្រឡេកមើលទៅលើគម្រោងរបស់ខ្លួនដែលឃុំឃាំងជនជាតិអាមេរិកាំងដើមកំណើតជប៉ុនក្នុងសង្គ្រាមលោកលើកទី២»។
ពួកអ្នកស្រុកដែលកំពុងរស់នៅជិតព្រំដែន មានការខ្វែងគំនិតអំពីបញ្ហានេះ។ អ្នកស្រុកម្នាកនិយាយថា៖ «ការសាងសង់របងនេះ មិនគួរកើតមានឡើងទេ។ ខ្ញុំហួសចិត្តអំពីរឿងនេះ»។
ប៉ុន្តែម្ចាស់កសិដ្ឋានមួយនៅរដ្ឋតិចសាសនិយាយថា លោកនិងអ្នកជិតខាងរបស់លោកត្រូវដោះស្រាយឧក្រិដ្ឋកម្មដែលបានប្រព្រឹត្តដោយពួកជនអន្តោប្រវេសន៍។ លោក Michael Vickers ម្ចាស់ចំការនៅរដ្ឋតិចសាសនិយាយថា៖ «មានអារម្មណ៍សប្បាយរីករាយដែលយើងទាំងអស់គ្នាមិនដែលមានកាលពីពេលមុន»។
អ្នកវិភាគខ្លះនិយាយថា លោកប្រធានាធិបតីត្រាំ កំពុងធ្វើទៅតាមអ្វីដែលពលរដ្ឋអាមេ រិកាំងជាច្រើនចង់បាន។ លោក Andreas Akaras នៃអង្គការវេទិកាសេរីភាពនិយាយថា៖ «ពេលខ្លះ ពលរដ្ឋអាមេរិកាំងត្រូវបានសម្លាប់ដោយមនុស្សខុសច្បាប់ដែលបាននៅទីនេះ។ ការណ៍នេះបានកើតមានឡើងនៅក្នុងទីក្រុង San Francisco។ មានស្រ្តីម្នាក់ឈ្មោះ Kate ដែលបានត្រូវសម្លាប់ដោយជនជាតិម៉ិកស៊ិកម្នាក់ដែលបានត្រូវគេបញ្ជូនទៅកាន់ប្រទេសវិញជាច្រើនដង។ អ្នកស្រីបានត្រូវជនជាតិម៉ិកស៊ិកនោះបាញ់សម្លាប់»។
ពួកអ្នករិះគន់និយាយថា ឧទាហរណ៍បែបនេះជាការកម្រហើយថា នៅក្នុងករណីខ្លះ របងនោះនឹងមិនបញ្ឈប់ពួកឧក្រិដ្ឋជនទេ៕
ប្រែសម្រួលដោយ ជឹង ប៉ូជីន
