សប្ដាហ៍ទីមួយនៃការជំនុំជម្រះរបស់ព្រឹទ្ធសភាអំពីថាតើគួរដកលោកប្រធានាធិបតី ដូណាល់ ត្រាំ ចេញពីតំណែងឬក៏អត់នោះបានបិទបញ្ចប់កាលពីថ្ងៃសៅរ៍ ដោយសវនាការបង្ហាញអំណះអំណាងរបស់ក្រុមមេធាវីលោក ត្រាំ ដែលបានអះអាងថា លោក ត្រាំ មិនបានប្រព្រឹត្តខុសឆ្គងនៅក្នុងចំណាត់ការរបស់លោកចំពោះប្រទេសអ៊ុយក្រែននោះទេ។ ក្រុមមេធាវីរបស់លោក ត្រាំ មានរយៈពេលបីថ្ងៃដើម្បីការពារក្ដីឲ្យលោក មុនពេលដែលសមាជិកព្រឹទ្ធសភាដែលមានគ្នា១០០នាក់ សម្រេចថាតើសកម្មភាពរបស់លោក ត្រាំ ស័ក្ដិសមនឹងដកលោកចេញពីតំណែងដែរឬទេ។
នៅក្នុងថ្ងៃបង្ហាញអំណះអំណាងការការពារក្ដីរយៈពេលខ្លី ដែលត្រូវបានគេពណ៌នាថាជាការពិនិត្យមើលជាមុន មុននឹងការពារក្ដីពេញលេញចាប់ផ្ដើមនៅសប្ដាហ៍ក្រោយនេះ ក្រុមមេធាវីរបស់លោក ត្រាំ បាននិយាយវាយប្រហារលើចំណុចមួយចំនួន។ ទីមួយ ពួកគេបានហៅការចោទប្រកាន់ដកប្រធានាធិបតីចេញពីតំណែងនេះថាគ្មានមូលដ្ឋាន ដោយអះអាងថា លោកប្រធានាធិបតីមានអំណាចក្នុងការធ្វើសេចក្ដីសម្រេចចិត្តយ៉ាងទូលំទូលាយ។
លោក Jay Sekulow មេធាវីការពារក្ដីឲ្យលោក ត្រាំ មួយរូបបានថ្លែងថា៖ «ការមិនឯកភាពជាមួយនឹងការសម្រេចចិត្តរបស់លោកប្រធានាធិបតីលើបញ្ហាគោលនយោបាយការបរទេស ឬការណ៍ដែលលោកប្រធានាធិបតីនឹងសម្រេចតាមយោបល់របស់នរណាម្នាក់ មិនមែនជាការចោទប្រកាន់ដែលអាចដកលោកប្រធានាធិបតីពីតំណែងបានទេ»។ មេធាវីរបស់លោក ត្រាំ ក៏បានរិះគន់ផងដែរលើក្រុមរដ្ឋអាជ្ញានៃរដ្ឋសភា ដែលបានចោទប្រកាន់ដើម្បីដកប្រធានាធិបតីពីតំណែងថាបាននិយាយស្មានៗអំពីមូលហេតុដែលលោក ត្រាំ ធ្វើដូច្នេះ។
លោក Mike Purpura មេធាវីការពារក្ដីម្នាក់ទៀតរបស់លោក ត្រាំ ថ្លែងថា៖ «វាជារឿងប្រឌិត។ វាមិនមែនជាកិច្ចសន្ទនាពិតប្រាកដតាមទូរស័ព្ទទេ។ វាមិនមែនជាភស្តុតាងទេ។ វាមិនមែនជាអត្ថបទលាយលក្ខណ៍អក្សរដែលស្រង់ចេញពីខ្សែអាត់សំឡេងសន្ទនាតាមទូរស័ព្ទទេ»។
សមាជិកគណបក្សប្រជាធិបតេយ្យនិយាយថា បញ្ហានេះអាចដោះស្រាយបានយ៉ាងងាយស្រួល តាមរយៈការផ្ដល់សក្ខីកម្មដោយផ្ទាល់របស់សាក្សី ដែលសមាជិកគណបក្សសាធារណរដ្ឋបានច្រានចោល។
លោក Tim Kaine សមាជិកព្រឹទ្ធសភាខាងគណបក្សប្រជាធិបតេយ្យបាននិយាយថា៖ «ចំណាប់អារម្មណ៍ដ៏ខ្លាំងរបស់ខ្ញុំលើការជំនុំជម្រះរយៈពេលពីរម៉ោងដំបូងនេះគឺថា ការកោះហៅសាក្សីឲ្យចូលមកផ្ដល់សក្ខីកម្មនិងភស្តុតាងគឺកាន់តែសំខាន់ជាងមុនទៅទៀត»។
សមាជិកគណបក្សប្រជាធិបតេយ្យចង់ឲ្យមានការផ្ដល់សក្ខីកម្មពីអតីតមន្ត្រីនិងមន្ត្រីបច្ចុប្បន្នមួយចំនួននៃរដ្ឋបាលលោក ត្រាំ ដូចជាលោកឯកអគ្គរដ្ឋទូត John Bolton និងប្រធានស្ដីទីខុទ្ទកាល័យសេតវិមាន លោក Mick Mulvaney ជាដើម។ លោក Mulvaney បានប្រាប់អ្នកកាសែតកាលពីឆ្នាំមុនថា ជំនួយយោធារបស់សហរដ្ឋអាមេរិកសម្រាប់ប្រទេសអ៊ុយក្រែនមានជាប់ពាក់ព័ន្ធនឹងការទាមទាររបស់លោកប្រធានាធិបតី។
លោក Adam Schiff ប្រធានក្រុមរដ្ឋអាជ្ញានៃរឿងក្ដីនេះថ្លែងថា៖ «ប្រសិនបើរឿងនេះពិតជាយុទ្ធសាស្ត្ររបស់លោក ដូណាល់ ត្រាំ ដើម្បីប្រឆាំងនឹងអំពើពុករលួយមែននោះ ហេតុអ្វីបានជាពួកគេលាក់បាំងរឿងនេះមិនឲ្យរដ្ឋសភាដឹង? ហេតុអ្វីបានជាពួកគេមិនប្រាប់ពលរដ្ឋអាមេរិកាំងឲ្យបានដឹងថាពួកគេកំពុងតែធ្វើរឿងនេះ? មូលហេតុដែលពួកគេមិនប្រាប់ពលរដ្ឋអាមេរិកាំងគឺដោយសារតែវាគឺជាអំពើគ្មានគុណធម៌ដើម្បីជួយឲ្យពួកគេអាចបន្លំនៅក្នុងការបោះឆ្នោតបាន»។
គ្រាន់តែការការពារក្ដីឲ្យលោក ត្រាំ រយៈពេលពីរម៉ោង ហាក់ដូចជាធ្វើឲ្យសមាជិកគណបក្សសាធារណរដ្ឋមានប្រៀបជាងអ្វីដែលសមាជិកគណបក្សប្រជាធិបតេយ្យបានអះអាងអស់រយៈពេលជាយូរមកហើយ។
សមាជិកព្រឹទ្ធសភាខាងគណបក្សសាធារណរដ្ឋ លោក Mike Braun បាននិយាយថា៖ «យើងមានសវនាការរយៈពេល២៣ម៉ោង ដែលមិននិយាយអំពីអ្វីទាំងអស់ ក្រៅតែពីនិយាយពីនេះពីនោះនិងលើកឡើងនូវទស្សនៈមួយចំណុច។ ខ្ញុំគិតថា ក្នុងរយៈពេលពីរម៉ោងនេះ យើងមានការវិវឌ្ឍទៅមុខជាងអ្វីដែលពួកគេបានចោទប្រកាន់ពួកយើង ជាមួយនឹងព័ត៌មានយ៉ាងច្រើនសន្ធឹកសន្ធាប់ ព័ត៌មានលម្អិតនានា ប៉ុន្តែមិននិយាយឲ្យចំចំណុចនោះទេ»។
ការជំនុំជម្រះនេះនឹងបន្ដដំណើរការទៀតនៅថ្ងៃច័ន្ទជាមួយនឹងការបន្ដការការពារក្ដីឲ្យលោកប្រធានាធិបតី ត្រាំ៕
ប្រែសម្រួលដោយអ្នកស្រី ហុង ចិន្ដា
