ប្រធានាធិបតីសហរដ្ឋអាមេរិកលោក Donald Trump រំពឹងថានឹងមាន «ការប្រជុំដ៏ជោគជ័យ» មួយនៅក្នុងទីក្រុងអង់ការ៉ា ប្រទេសតួកគី នៅថ្ងៃព្រហស្បតិ៍នេះ នៅពេលដែលអនុប្រធានាធិបតីសហរដ្ឋអាមេរិកលោក Mike Pence និងរដ្ឋមន្ត្រីការបរទេសសហរដ្ឋអាមេរិកលោក Mike Pompeo ជំរុញឲ្យតួកគីបញ្ឈប់ការលុកលុយរបស់ខ្លួននៅភាគខាងជើងប្រទេសស៊ីរី។ ស្របពេលនោះដែរ លោក Trump នៅបន្តបដិសេធថា លោកមិនមែនជាអ្នកធ្វើឲ្យតួកគីបើកប្រតិបត្តិការដែលមានបំណងរុញច្រានពួកយុទ្ធជន Kurd ចេញពីតំបន់ព្រំដែននោះទេ។
លោក Trump បាននិយាយនៅក្នុងសន្និសីទកាសែតមួយកាលពីថ្ងៃពុធម្សិលមិញថា៖ «ប្រសិនបើតួកគីមិនបញ្ឈប់ប្រតិបត្តិការនេះទេ នោះសហរដ្ឋអាមេរិកនឹងដាក់ទណ្ឌកម្ម និងយកពន្ធគយលើប្រទេសទួរគី ដែលនេះនឹងធ្វើឲ្យប៉ះពាល់ដល់សេដ្ឋកិច្ចរបស់តួកគី»។
លោក Trump ថា រដ្ឋបាលរបស់លោកគឺជាអ្នកដែលអាចសម្របសម្រួល រវាងតួកគី និងពួក Kurd បាន ដែលពួក Kurd នេះត្រូវបានសហរដ្ឋអាមេរិកពឹងពាក់នៅក្នុងយុទ្ធនាការរបស់ខ្លួនដើម្បីប្រយុទ្ធប្រឆាំងនឹងពួកសកម្មប្រយុទ្ធរដ្ឋឥស្លាមនៅក្នុងប្រទេសស៊ីរី។
នៅពេលនោះដែរ ប្រទេសរុស្ស៊ីដែលជាសម្ព័ន្ធមិត្តរបស់ស៊ីរីតាំងខ្លួនថាជាអ្នកសម្របសម្រួលដ៏ល្អបំផុតរវាងស៊ីរី និងតួកគី បន្ទាប់ពីពួក Kurd បានសហការជាមួយនឹងប្រធានាធិបតីស៊ីរីលោក Bashar al-Assad ដើម្បីការពារមិនឲ្យកងកម្លាំងទួរគីគ្រប់គ្រងតំបន់ភាគខាងជើងប្រទេសស៊ីរី។
អ្នករិះគន់អះអាងថា ការសម្រេចរបស់លោក Trump នៅក្នុងការដកទាហានសហរដ្ឋអាមេរិកចេញពីតំបន់នោះ បានបើកផ្លូវឲ្យប្រធានាធិបតីទួរគីលោក Recep Tayyip Erdogan ធ្វើការលុកលុយដែលគ្រោងជាយូរមកហើយ ដើម្បីវាយបណ្ដេញពួក Kurd ដោយលោក Erdogan ថា ពួកភេរវជនទាំងនេះមានទំនាក់ទំនងជាមួយនឹងពួកផ្ដាច់ខ្លួននៅភាគអាគ្នេយ៍ប្រទេសតួកគី៕
