ពលរដ្ឋមកពីប្រទេសចំនួន ៨ ដែលមានគោលបំណងធ្វើដំណើរមកកាន់សហរដ្ឋអាមេរិកនឹងប្រឈមនឹងការដាក់កំហិតថ្មីនៅក្រោមបទបញ្ជាហាមឃាត់ការធ្វើដំណើរដែលមានការកែសម្រួលឡើងវិញរបស់លោកប្រធានាធិបតី Donald Trump។ បទបញ្ជានេះត្រូវបានចុះហត្ថលេខាដោយលោក Trump កាលពីថ្ងៃអាទិត្យម្សិលមិញ។
បទបញ្ញត្តិថ្មីដែលនឹងចូលជាធរមាននៅថ្ងៃទី ១៨ ខែតុលា ខាងមុខនេះ នឹងដាក់កំហិតចំពោះពលរដ្ឋមកពីប្រទេសឆាដ (Chad) អ៊ីរ៉ង់ លីប៊ី កូរ៉េខាងជើង សូម៉ាលី ស៊ីរី វ៉េណេស៊ុយអេឡា និងយេម៉ែន។
មន្ត្រីរដ្ឋាភិបាលអាមេរិកបាននិយាយថា ប្រទេសទាំងនេះបានបដិសេធចែករំលែកព័ត៌មានទាក់ទងនឹងអំពើភេរវកម្ម និងបញ្ហាផ្សេងៗទៀតជាមួយនឹងសហរដ្ឋអាមេរិក។
ការប្រកាសនេះបានធ្វើឡើងចំពេលដែលការហាមឃាត់ការធ្វើដំណើរកាលពីលើកមុនរបស់លោក Trump ចំពោះពលរដ្ឋមកពីប្រទេសចំនួន ៦ ដែលមានប្រជាជនភាគច្រើនកាន់សាសនាឥស្លាមផុតកំណត់នៅត្រឹមថ្ងៃអាទិត្យម្សិលមិញ ក្រោយចូលជាធរមានបានរយៈពេល ៩០ ថ្ងៃមក។
លោក Trump បាននិយាយថា៖ «ក្នុងនាមជាប្រធានាធិបតី ខ្ញុំត្រូវតែធ្វើយ៉ាងណាការពារសន្តិសុខ និងផលប្រយោជន៍របស់សហរដ្ឋអាមេរិក និងពលរដ្ឋអាមេរិកាំង។ ការដាក់កំហិតលើកនេះគឺមានលក្ខណៈតឹងតែង និងបានផ្ញើជាសារមួយដល់រដ្ឋាភិបាលបរទេសថា ពួកគេត្រូវតែធ្វើការជាមួយសហរដ្ឋអាមេរិកដើម្បីពង្រឹងសន្តិសុខ»។
មានប្រតិកម្មអវិជ្ជមានភាគច្រើនពីសំណាក់អង្គការសិទ្ធិមនុស្ស និងអង្គការផ្សេងៗទៀតដែលធ្វើការលើផ្នែកអន្តោប្រវេសន៍ បានធ្វើឡើងភ្លាមៗតបទៅនឹងបទបញ្ជារបស់លោក Trump នេះ។
អង្គការ Amnesty International បានព្រលះបទបញ្ជាហាមឃាត់ការធ្វើដំណើរថ្មីនេះ ដោយបានលើកឡើងថា បទបញ្ជាហាមឃាត់ការធ្វើដំណើរកន្លងមករបស់លោក Trump បានរារាំងសិទ្ធិសេរីភាពអ្នកដែលចង់ធ្វើដំណើរមកកាន់សហរដ្ឋអាមេរិកក្នុងគោលបំណងធ្វើដំណើរកម្សាន្ត ធ្វើការ និងសិក្សាជាដើម៕
