លោកប្រធានាធិបតីសហរដ្ឋអាមេរិក ដូណាល់ ត្រាំនិយាយកាលពីថ្ងៃពុធថា លោកមិនជឿថា រុស្ស៊ីកំពុងបន្តវាយប្រហារសហរដ្ឋអាមេរិកដោយលបចូលក្នុងប្រព័ន្ធកុំព្យូទ័រ ដែលជាការផ្ទុយស្រឡះទៅនឹងការវាយតម្លៃកាលពីសប្តាហ៍មុនដោយលោក Dan Coats នាយកស៊ើបការណ៍សម្ងាត់ជាតិរបស់លោក។
លោកត្រាំដែលបានជួបជាមួយគណៈរដ្ឋមន្ត្រីរបស់លោកនៅសេតវិមាន បានគ្រវីក្បាលហើយបាននិយាយថា «ទេ» នៅពេលដែលសួរថាតើរុស្ស៊ីនៅតែប៉ុនប៉ងជ្រៀតជ្រែកក្នុងការបោះឆ្នោតសហរដ្ឋអាមេរិកនោះ។
លោក Coats នាយកទីភ្នាក់ងារស៊ើបការណ៍សម្ងាត់ជាតិសហរដ្ឋអាមេរិកបានប្រាប់អង្គការស្រាវជ្រាវមួយនៅរដ្ឋធានីវ៉ាស៊ីនតោនថា «ហេដ្ឋារចនាសម្ព័ន្ធខាង Digital ដែលបម្រើប្រទេសនេះ តាមការពិតទៅកំពុងទទួលរងការវាយប្រហារហើយ ហើយបានចុចប្រទេសរុស្ស៊ីថាជាតួឯកបរទេសដ៏គគ្លើនបំផុត មិនមានចម្ងល់អំពីបញ្ហានេះឡើយ»។
លោក Lindsey Graham សមាជិកព្រឹទ្ធសភាខាងគណបក្សសាធារណរដ្ឋ បានលើកឡើងភ្លាមៗរវាងគម្លាតយ៉ាងខ្លាំងរវាងទស្សនៈរបស់ប្រធានាធិបតីត្រាំនិងលោក Coats អំពីប្រទេសរុស្ស៊ីដោយនិយាយថា «មានភាពមិនស្របគ្នាអន្លើៗយ៉ាងខ្លាំងរវាងសេចក្តីថ្លែងការណ៍របស់ប្រធានាធិបតីត្រាំនិងការព្រមានរបស់លោក Coats នាយកភ្នាក់ងារស៊ើបការណ៍សម្ងាត់ជាតិ។ មានភាពចាំបាច់ជាបន្ទាន់ដែលយើងចាំបាច់ធ្វើការកំណត់ពីមូលហេតុអ្វីដែលកំពុងបន្តកើតមានឡើងដែលយើងអាចធ្វើការប្រៀបធៀបដើម្បីការពារខ្លួនរបស់យើងមុនការបោះឆ្នោតឆ្នាំ២០១៨។ ទស្សនៈរបស់ខ្ញុំផ្ទាល់គឺថា រុស្ស៊ីនឹងជ្រៀតជ្រែកការបោះឆ្នោតនេះម្តងទៀត។
ប្រធានាធិបតីត្រាំបានប្រាប់ពួកអ្នកយកព័ត៌មានថា «យើងកំពុងធ្វើកិច្ចការបានយ៉ាងល្អ ប្រហែលគ្មានប្រធានាធិបតីណាបានធ្វើកាលពីពេលមុនជាមួយរុស្ស៊ីទេ។ ហើយមិនមានប្រធានាធិបតីណាស្វិតស្វាញដូចដែលខ្ញុំបានធ្វើលើប្រទេសរុស្ស៊ីនោះទេ»៕
