ភ្ជាប់​ទៅ​គេហទំព័រ​ទាក់ទង

​លោក​ត្រាំ​ពិភាក្សា​ជម្រើស​ជា​ច្រើន​ដើម្បី​ឆ្លើយ​តបនឹងការ​ឈ្លានពាន​របស់​កូរ៉េ​ខាង​ជើង


រូបឯកសារ៖ យន្តហោះ​ B-1B ពីរ​គ្រឿង​របស់​​ទ័ព​អាកាស​​អាមេរិក កំពុង​ចាក់​សាំង​ក្នុង​ពេល​ហោះហើរ​រយៈ​ពេល​១០​ម៉ោង នៅ​ជិត​កោះ Kyushu ក្នុង​ប្រទេស​ជប៉ុន កាល​ពី​ខែ​សីហា ឆ្នាំ​២០១៧។

នៅ​ពេល​ដែល​ប្រធានាធិបតី​ស.រ.អា. ដូណាល់ ត្រាំ សញ្ជឹង​គិត​ខ្លាំង​អំពី​លទ្ធភាព​នៃ​ការ​វាយ​ប្រហារ​យោធា​ប្រឆាំង​នឹង​ប្រទេស​កូរ៉េខាង​ជើង ពួក​យោធា​របស់​គាត់​ជាមួយ​ប្រទេសកូរ៉េខាង​ត្បូង​និង​ប្រទេស​ជប៉ុន​បាន​បង្ហាញ​កម្លាំង​រួម​គ្នា​ប្រឆាំង​នឹង​រដ្ឋាភិបាល​ក្រុង​ព្យុងយ៉ាង​ ដោយ​បានធ្វើ​សមយុទ្ធ​បាញ់​កាំជ្រួច​មីស៊ីល​ នៅ​ក្នុង​លំហ​សមុទ្រ​ទល់មុខ​នឹង​ឆ្នេរ​សមុទ្រ​ខាង​កើត​និង​ខាង​លិច​នៃ​ឧបទ្វីប​កូរ៉េ​ កាលពី​ថ្ងៃ​អង្គារ​ម្សិលមិញ។​

បើ​តាម​សេចក្តី​ថ្លែង​ការណ៍​មួយ​របស់​អ្នកស្រី​ Sarah Huckabee Sanders អ្នកនាំ​ពាក្យ​សេតវិមាន​ថា​ ដោយ​បាន​ជួប​ជាមួយ​ពួក​សមាជិក​នៃ​ក្រុម​សន្តិសុខ​ជាតិ​របស់​គាត់ ​លោក​ ត្រាំ​ បាន​ពិភាក្សា​អំពី​ជម្រើស​មួយ​ចំនួនដើម្បី​ឆ្លើយ​តប​នឹងទម្រង់​ណា​មួយ​នៃ​អំពើ​ឈ្លាន​ពាន​របស់​ប្រទេស​កូរ៉េខាង​ជើង​ឬ ប្រសិនបើ​ជា​ការ​ចាំ​បាច់​ រារាំង​ប្រទេស​កូរ៉េខាង​ជើង​មិន​ឱ្យ​គំរាម​កំហែង​ស.រ.អា.និង​ពួក​សម្ព័ន្ធមិត្ត​របស់​អាមេរិកាំង​ដោយ​អាវុធ​បរមាណូ។

លោក ​Daniel Pinkston ​ជាអ្នក​វិភាគ​ខាង​សន្តិសុខ​តំបន់​នៅ​ឯសាកល​វិទ្យាល័យ Troy ក្នុង​ក្រុង​សេអ៊ូល។​ លោក​បាននិយាយ​ថា៖ «ខ្ញុំ​យល់​ថា​នេះ​ជា​ការ​និយាយ​យោង​ដល់​ការ​ទប់ទល់​ជា​មុន​ដល់​ការ​វាយ​ប្រហារ​បរមាណូ​របស់​កូរ៉េខាង​ជើង»។

បើ​តាម​សេតវិមាន​ថា​នៅ​ក្នុងការ​ប្រជុំ​គ្នានោះ​ ប្រធានាធិបតី​ ត្រាំ​ បានស្តាប់​ការ​និយាយ​ត្រួសៗ​ដោយ​លោក​រដ្ឋមន្ត្រី​ការ​ពារ​ប្រទេស.រ.អា. James Mattis ​និង​លោក​ឧត្តមសនីយ៍ Joseph Dunford ​ប្រធាន​ក្រុម​នាយ​អគ្គសេនាធិការ​ចម្រុះ​នៃ​កង​យោធពល​ស.រ.អា.។

ការ​ប្រជុំ​គ្នា​នេះ​ស្រប​ពេល​គ្នា​ជាមួយ​សមយុទ្ធ​ពីរ​ដោយ​មាន​បាញ់​កាំជ្រួច មីស៊ីល​ ពី​កង​យន្ត​ហោះ​ចម្បាំង​នៅ​ពី​លើ​លំហ​សមុទ្រ​នៃ​សមុទ្រ​ជប៉ុន​និង​សមុទ្រ​លឿង​ ដោយ​កងយន្តហោះ​ទម្លាក់​គ្រាប់​បែកយុទ្ធសាស្ត្រ​និង​កង​យន្តហោះ​ប្រតិកម្ម​ប្រយុទ្ធ​របស់​ពួក​សម្ព័ន្ធមិត្ត។​

បើ​តាមក្រសួង​កាពារ​ប្រទេស​ស.រ.អា.​ បាន​ឲ្យ​ដឹង​ថា​ សមយុទ្ធ​ទាំង​នេះ​ជា​សម​យុទ្ធ​រួមគ្នា​នៅ​ពេល​យប់​លើក​ទីមួយ​ក្នុង​ចំណោម​កង​យន្តហោះ​ចម្បាំង​ស.រ.អា. កូរ៉េខាង​ត្បូង​ និង​ជប៉ុន។ សមយុទ្ធ​ទាំង​នេះ​មាន​ទាក់ទិននឹង​យន្តហោះធុន​ B-1B Lancers ​ពីរ​គ្រឿង​បាញ់​កាំ​ជ្រួច​មីស៊ីល​ ពី​អាកាស​ទៅដី​ជាមួយ​យន្តហោះ​ប្រតិកម្ម​ធុន F-15K ពីរ​គ្រឿង​នៃ​ប្រទេស​កូរ៉េ​ខាង​ត្បូង​នៅ​ពី​លើ​សមុទ្រ​ជប៉ុន​ហើយ​បន្ទាប់​មក​បាន​ហោះ​ពី​លើផ្នែក​ខាង​ត្បូង​នៃ​ឧបទ្វីបកូរ៉េ៕

XS
SM
MD
LG