លោក Baik Tae-hyun អ្នកនាំពាក្យនៃក្រសួងបង្រួបបង្រួមកូរ៉េទាំងពីររបស់ប្រទេសកូរ៉េខាងត្បូង បាននិយាយកាលពីថ្ងៃទី ១៨ ខែកញ្ញា កន្លងទៅនេះថា៖ «វាជាជំហរគ្រឹះរបស់រដ្ឋាភិបាលកូរ៉េខាងត្បូង ដែលនឹងបន្តផ្ដល់ជំនួយមនុស្សធម៌ដល់កុមារ ស្ត្រីមានផ្ទៃពោះ និងក្រុមមនុស្សងាយរងគ្រោះក្នុងសង្គម ដោយមិនគិតពីស្ថានការណ៍នយោបាយឡើយ»។
លោក Moon Jae In ដែលជាមេដឹកនាំប្រកាន់ទស្សនៈសេរីនិយម និងជាអតីតមេធាវីការពារសិទ្ធិមនុស្ស បានឡើងកាន់អំណាចជាប្រធានាធិបតីកូរ៉េខាងត្បូងកាលពីខែឧសភាបន្ទាប់ពីមានការចោទប្រកាន់ជាផ្លូវការលើលោកស្រីប្រធានាធិបតី Park Geun Hye ដែលជាអ្នកប្រកាន់ទស្សនៈអភិរក្សនិយមពីបទពុករលួយ និងសំណូកសូកប៉ាន់មក។ នៅពេលនោះ លោកបានប្រើយុទ្ធសាស្ត្រមួយដែលមានទិសដៅពីរដើម្បីធ្វើឲ្យមានតុល្យភាពរវាងការដាក់ទណ្ឌកម្មសេដ្ឋកិច្ច និងការផ្ដល់ជំនួយមនុស្សធម៌ដល់ប្រទេសកូរ៉េខាងជើង ក្នុងគោលបំណងធ្វើឲ្យភាពតានតឹងមានលក្ខណៈធូរស្រាលបន្តិចម្ដងៗ។
ឫសគល់នៃការដាក់ទណ្ឌកម្ម
បន្ទាប់ពីមានការសាកល្បងអាវុធនុយក្លេអ៊ែរលើកទី ៦ របស់កូរ៉េខាងជើងកាលពីដើមខែកញ្ញាកន្លងទៅនេះមក រដ្ឋបាលរបស់លោក Moon Jae In បានបញ្ជាក់យ៉ាងច្បាស់ថា ខ្លួននឹងដកខ្លួនចេញឲ្យឆ្ងាយឈប់ពាក់ព័ន្ធជាមួយនឹងកូរ៉េខាងជើង ហើយងាកទៅគាំទ្រយ៉ាងពេញទំហឹងចំពោះយុទ្ធសាស្ត្រ «ដាក់សម្ពាធកម្រិតអតិបរមា» របស់ប្រធានាធិបតីសហរដ្ឋអាមេរិកលោក Donald Trump ទៅលើប្រទេសកូរ៉េខាងជើង។ យុទ្ធសាស្ត្រនេះផ្ដោតលើការដាក់សម្ពាធខ្លាំងក្លាផ្នែកសេដ្ឋកិច្ចបូករួមទាំងការគំរាមកំហែងដោយសកម្មភាពយោធា ដើម្បីបង្ខំឲ្យរដ្ឋាភិបាលលោក Kim Jong Un លះបង់អាវុធនុយក្លេអ៊ែររបស់ខ្លួន បើមិនដូច្នេះទេនឹងអាចប្រឈមនឹងការដួលរលំ។
ចាប់ពីពេលនោះមក ប្រធានាធិបតីកូរ៉េខាងត្បូងលោក Moon Jae In បានចេញមុខគាំទ្រយ៉ាងខ្លាំងក្លាទៅលើការដាក់ទណ្ឌកម្មថ្មីបំផុតចុងក្រោយរបស់អង្គការសហប្រជាជាតិ ដែលទណ្ឌកម្មនេះត្រូវបានឯកអគ្គរដ្ឋទូតអាមេរិកប្រចាំអង្គការសហប្រជាជាតិលោកស្រី Nikki Haley អះអាងថា បានកាត់បន្ថយ «ការធ្វើពាណិជ្ជកម្មចំនួន ៩០ ភាគរយ និងកាត់បន្ថយការនាំប្រេង ៣០ ភាគរយ» ចូលក្នុងប្រទេសកូរ៉េខាងជើង។ លោក Moon Jae In ក៏បានព្យាយាមបញ្ចុះបញ្ចូលប្រធានាធិបតីរុស្ស៊ីលោក Vladimir Putin ឲ្យគាំទ្រការហាមឃាត់ទាំងស្រុងនូវការនាំប្រេងចូលប្រទេសកូរ៉េខាងជើង។ ប៉ុន្តែទាំងរដ្ឋាភិបាលក្រុងមូស្គូ និងរដ្ឋាភិបាលក្រុងប៉េកាំងមិនមានឆន្ទៈក្នុងការគាំទ្រវិធានការដែលអាចបង្កឲ្យមានអស្ថិរភាពនេះនោះទេ។
បន្ទាប់ពីកូរ៉េខាងជើងបានបាញ់មីស៊ីលឆ្លងទ្វីបមួយគ្រាប់ទៀតរំលងពីលើប្រទេសជប៉ុនកាលពីថ្ងៃទី១៥ ខែកញ្ញាកន្លងទៅនេះ លោក Moon Jae In បាននិយាយថា៖ «កិច្ចសន្ទនាមិនអាចទៅរួចទេ» ជាមួយនឹងរដ្ឋាភិបាលក្រុងព្យុងយ៉ាង ដរាបណារដ្ឋាភិបាលនេះនៅបន្តវិធានការបង្កហេតុរបស់ខ្លួនដូច្នេះ។
កាលពីថ្ងៃទី ១៨ ខែកញ្ញាកន្លងទៅនេះ លោកប្រធានាធិបតី Moon Jae-in បាននិយាយថា រដ្ឋាភិបាលរបស់លោកកំពុងព្យាយាម «ដាក់ទណ្ឌកម្មយ៉ាងធ្ងន់ធ្ងរ» លើប្រទេសកូរ៉េខាងជើង ដើម្បីធ្វើឲ្យច្បាស់ថា រដ្ឋាភិបាលក្រុងព្យុងយ៉ាង «មិនមានជម្រើសអ្វីផ្សេងទៀត ក្រៅពីការលះបង់អាវុធនុយក្លេអ៊ែរ និងមីស៊ីលរបស់ខ្លួន»។
ជំនួយមនុស្សធម៌
ខណៈពេលដែលលោក Moon Jae In ក្នុងរយៈពេលខ្លី ផ្ដល់អាទិភាពលើការគាំទ្រវិធានការតឹងរ៉ឹងរបស់សម្ព័ន្ធមិត្តអាមេរិកចំពោះកូរ៉េខាងជើងនោះ អ្នកវិភាគនានាយល់ថា លោកនៅតែប្តេជ្ញាស្វែងរកដំណោះស្រាយសន្តិភាពរយៈពេលវែងចំពោះវិបត្តិនុយក្លេអ៊ែរ ដែលនេះក៏ជាគោលដៅដែលបានកំណត់រួចជាស្រេចរបស់រដ្ឋាភិបាលក្រុងវ៉ាស៊ីនតោនផងដែរ។
លោក Bong Young-shik អ្នកវិភាគពីបញ្ហាកូរ៉េខាងជើងនៅវិទ្យាស្ថានសិក្សាកិច្ចការកូរ៉េខាងជើងនៅសាកលវិទ្យាល័យ Yonsei ក្នុងទីក្រុងសេអ៊ូល ប្រទេសកូរ៉េខាងត្បូង បានថ្លែងថា៖ «វាមិនមែនមានតែប្រទេសមួយ អត់ប្រទេសមួយនោះទេ ប៉ុន្តែប្រទេសទាំងពីរត្រូវតែសម្រេចឲ្យបាននូវគោលដៅទាំងពីរនេះ»។
ក្រសួងបង្រួបបង្រួមកូរ៉េទាំងពីរនៃប្រទេសកូរ៉េខាងត្បូងបានការពារគម្រោងជំនួយមនុស្សធម៌របស់ខ្លួនថា «មិនជាប់ទាក់ទងជាមួយនឹងការដាក់ទណ្ឌកម្ម និងសម្ពាធនោះទេ» ហើយខ្លួនចាំបាច់ត្រូវជួយជនជាតិកូរ៉េខាងជើងដែលកំពុងរស់នៅក្នុងភាពក្រីក្រស្រាប់ និងកាន់តែដុនដាបថែមទៀតដោយសារតែការដាក់ទណ្ឌកម្មរបស់អង្គការសហប្រជាជាតិ។
កូរ៉េខាងត្បូងមានគម្រោងផ្ដល់ជំនួយចំនួន ៤ លាន ៥ សែនដុល្លារអាមេរិកដើម្បីជួយដល់កម្មវិធីស្បៀងអាហារពិភពលោករបស់អង្គការសហប្រជាជាតិក្នុងការផ្ដល់ជំនួយជាស្បៀងអាហារដល់មន្ទីរពេទ្យនានានៅក្នុងប្រទេសកូរ៉េខាងជើង និងជំនួយចំនួន ៣ លាន ៥ សែនដុល្លារអាមេរិកទៅដល់អង្គការ UNICEF ដើម្បីផ្ដល់ថ្នាំពេទ្យ និងអាហារូបត្ថម្ភជួយដល់កុមារ និងស្ត្រីមានផ្ទៃពោះ៕
ការផ្ដល់ជំនួយដល់អង្គការជំនួយមនុស្សធម៌របស់អង្គការសហប្រជាជាតិ នឹងស្ដារឡើងវិញនូវការផ្ដល់ជំនួយមនុស្សធម៌របស់រដ្ឋាភិបាលកូរ៉េខាងត្បូងដល់ប្រទេសកូរ៉េខាងជើង ដែលសកម្មភាពនេះត្រូវបានផ្អាកកាលពីឆ្នាំ ២០១៦ បន្ទាប់ពីមានការធ្វើតេស្តសាកល្បងនុយក្លេអ៊ែរលើកទី ៤ របស់កូរ៉េខាងជើងមក។ កូរ៉េខាងជើងបានច្រានចោលនូវការផ្តល់ជំនួយ និងកិច្ចសហប្រតិបត្តិការកាលពីលើកមុខរបស់រដ្ឋាភិបាលក្រុងសេអ៊ូល។
រដ្ឋបាលរបស់លោក Moon Jae In ក៏បានបញ្ជាក់ផងដែរថា កាលពីឆ្នាំមុន សហរដ្ឋអាមេរិក និងប្រទេសរុស្ស៊ីបានផ្ដល់ជំនួយមនុស្សធម៌ក្នុងទឹកប្រាក់រាប់លានដុល្លារអាមេរិកទៅឲ្យប្រទេសកូរ៉េខាងជើង តាមរយៈទីភ្នាក់ងារអង្គការសហប្រជាជាតិដូចគ្នានេះ៕
ប្រែសម្រួលដោយ នៀម ឆេង
